Aposkạmi 25
25
Disạm cakʼlaoicʼ samaṅre Pạulakʼ bicạr
1Ado Phestus ona ṭoṭhareye hecʼen khan pe din tayom Kạisạriạ khon Jerusalemteye rakapʼ calaoena. 2Unre maraṅ naekeko ar Jihudi mukhiyạko do uni ṭhen senkate Pạul upạrteko lạlisadea. 3Onko do Phestus ạḍiko nehõradea jemon onkoreye dayakʼte Jerusalemte Pạule ạgu ocoye. Ona reakʼ karon do noage je, onko do horre tãṛãkʼkate Pạul goje reakʼko soṛojontrokan tahẽkana. 4Unre Phestuse menkeda, “Pạul do Kạisạriạ reakʼ hajotre menaea ar iń do usạrage onḍeń calakʼkana. 5Ar aperen adom ektiạrianko do iń sãoteko calakʼma ar uni hoṛ jãhãnakʼe dosakatʼ khan onakoko udukʼạńma.”
6Phestus do onko talare irạl se gel din tahẽkate Kạisạriạteye ruạṛ calaoena. Ar dosar hilokʼ uni do bicạr duṛupʼakʼreye duṛupʼente acʼ samaṅre Pạul ạguiye lạgitʼe hukumkeda. 7Ar okoe Jihudiko Jerusalem khonko hecʼakan tahẽkan onko do Pạul onḍeye hecʼen khan uni beṛhaeteko teṅgo ạcurena ar ạḍi okocʼko dusikedea, menkhan onako reakʼ jãhãn porman do bako em daṛeada.
8Unre Pạul doe roṛ dokʼenteye menkeda, “Iń do Jihudikoakʼ ạn-ạri se mundil se Rom maharaj upạrte jãhãnakʼ cetʼge bạń behok akada.”
9Khan Phestus do Jihudiko kusi ocoko lạgitʼ Pạule metadea, “Noako dos reakʼ Jerusalemre jemoniń bicạr daṛeakʼ ona lạgitʼ cetʼ onḍe calakʼem khaṛagea?”
10Unre Pạul doe menkeda, “Iń do ńitokʼ Kạisạrakʼ bicạr duṛupʼakʼ samaṅreń teṅgo akana ar Rom sorkar ṭhen bicạr ocokʼge lek kantińạ. Am hõ bes okocʼtem baḍaegea je, Jihudiko cetanre jãhãn behokakʼ do bạń kạmi akada. 11Ar gujukʼ lek kạnạń mente jãhãnakʼ iń dos akatʼ khan iń do gujukʼ hõń rạjigea. Menkhan noko Jihudiko iń upạrte okaṭakʼ dosteko dusiyediń kan ona jodi sạriyakʼ baṅ hoylen khan enḍekhan onko tire aṛakʼkạń reakʼ ektiạri do okoeyakʼ hõ bạnukʼa. Iń do Kạisạrgeń dohayae kana.”
12Khange Phestus do acʼren sopolhako tulucʼ solhakateye menkeda, “Am do Kạisạrem dohay akawadea; Kạisạr ṭhengem calakʼa.”
Phestus ar Agrippa raj
13Ado niạ thoṛa din tayom Jihudikoren Ạgrippa raj ar acʼren bạhu Bernike do Phestus johar emae lạgitʼ Kạisạriạtekin hecʼena. 14Ar ḍher din onḍekin tahẽkante Phestus do Pạul reaṅ raje baḍae ocokedea. Uni doe menkeda, “Pheliks do mitʼṭen hoṛ hajotreye doho oṭoakadea. 15Iń do tinre Jerusalemteń senlena unre maraṅ naekeko ar Jihudikoren mukhiyạko nui hoṛ upạrte ạḍi okocʼko lạlisadiń tahẽkana ar sạjại emae lạgitʼko nehõradiń tahẽkana.
16“Iń do onkoń metatʼko tahẽkana, ‘jãhãe hoṛ upạrte jãhãeye lạlis khan enḍekhan okoeko lạlis akatʼ onko samaṅre bin dusạn sạbudokʼ reakʼ ạt ạuriye ńam hạbicʼ sạjại emae do Romikoakʼ niạmre bạnukʼa.’
17“Ado onko Jihudiko iń sãoteko hecʼen khan begor bilomte dosar hilokʼge bicạri lạgitʼ iń duṛupʼena ar uni hoṛ ạguiye reakʼ iń hukumkeda. 18Ar okoe hoṛko uniko dusiyedekan tahẽkan onko do katha roṛ lạgitʼko teṅgoyen khan okań hudisetʼ tahẽkan onkan jãhãnakʼ do bako lạlisleda, 19Menkhan akoakʼ dhorom leka mitʼṭen gocʼen Jisu reaṅko dusikedea. Ar Pạul ńutuman uni hoṛ do jorkateye menetʼ tahẽkana je, Jisu do jiwetʼge menaea. 20Ar noako babotre cekateń tojbija ona bạń bujhạuletʼte uniń kulikedea, noako dusi reakʼ jemonem bicạrokʼ, onate Jerusalemte calakʼem khaṛagea se baṅ. 21Menkhan maharajakʼ ṭhen bicạr ocokʼ lạgitʼe dohayketʼ khan uni ṭhen ạuri kolkae hạbicʼ horhoye reakʼ iń hukumakada.”
22Unre Agrippa do Phestuse metadea, “Iń hõ uni hoṛ reaṅ ańjom sanayediń kana.”
Phestuse menkeda, “Gapagem ańjomtaea.”
Agrippa samaṅre Pạul
23Dosar hilokʼ Agrippa raj ar Bernike do maraṅ subedarko ar nagraharen manotan hoṛko sãote ạḍi ṭhosok sajkate bạisitekin boloyena. Ar Phestuse hukumketʼ khan Pạul do onḍeye ạgu ocoyena. 24Unre Phestus doe menkeda, “E Agrippa raj ar nonḍe menakʼpe sanamkoge, ape do nui hoṛpe ńelekana; nui reaṅ Jihudiko do, Jerusalemre ar Kạisạriạre iń ṭhenko lạlisakada ar hohowateko menetʼ tahẽkana, nui hoṛ do jiwetʼ tahen lek doe baṅkana. 25Menkhan ińiń ńelakada, nui hoṛ do gujukʼ sạjại emae leka jãhãnakʼ bae dos akada. Ar tinre uni do Kạisạre dohay akawadea unre maharaj ṭhen kolkae lạgitʼ iń goṭakeda. 26Menkhan maraṅ maharaj ṭhen olokʼ leka nonkan cetʼge bạń ńamleda. Onate iń do Agrippa raj ar sanamko samaṅreń ạguakadea jemonpe kuliyete ol lạgitʼ jãhãnakʼ iń ńam daṛeakʼ; 27ente iń bujre jãhãe kạidi hoṛ calane jokhecʼ uni upạrte lạlis reakʼ karon udug do jạruṛgea.”
Currently Selected:
Aposkạmi 25: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
