Aposkạmi 6
6
Eae sapʼdapʼko
1Inạko dinre celako doko saṅge idikʼkan tahẽkana. Unre celako modre okoe Jihudiko Junạni pạrsiteko roṛetʼkan tahẽkan onko do Ibri pạrsite roroṛkan Jihudiko nonka mente dusikoko ehopʼena je, dinạmge jomakʼ emokʼ jokhecʼ onkoren rạnḍi maejiuko do cetʼge bako ńametʼa. 2Onate onko gelbar apostolko do joto cela mitʼ jaegare hoho jarwakateko metatʼkoa, “Isorakʼ katha porcar ḍhilạukate, jom ńũ reakʼ sapʼdapʼ kạmi do baṅ ṭhika. 3-4E boehako, ape modkhon Jiu ar akelte perecʼ akan ar sanam hoṛko manotko nonkan eae goṭen hoṛ bachao joṅpe. Ale do onkoge noa sapʼdapʼ kạmi reakʼ bharle emakoa ar ale do koejoṅ ar Isorakʼ katha porcar lạgitʼ jamaṛ akanle tahena.”
5Ado dolren sanamkoge noa katha do mońjko metatʼa. Onko do biswạs ar sonot Jiute perecʼ akan Stephanko bachaokedea. Ona chaḍa Philip, Prokhorus, Nikanor, Timon, Parmenas ar Antiokiạren Nikolasko bachaokedea. Nui Nikolas do boṅgan hoṛ jạtrene tahẽkanre hõ Jihudi dhorome pańjayetʼkan tahẽkana. 6Onko do apostol ṭhenko idiketʼkoa. Ar apostolko do onko lạgitʼko koekeda ar kạmire bahalko lạgitʼ capokateko bhoratʼkoa.
7Nonkate Isorakʼ katha do pasnao idiyena, ar Jerusalemre celako do lekhare ạḍi usạrako saṅge idiyena ar ạḍi utạr naekeko hõ Mạsiyakʼ dhoromreko pạtiạuena.
Stephanko sapʼkede
8Stephan do Isorakʼ daya ar daṛeteye perecʼente hoṛko talare ạḍi lekan cinhạko ar hahaṛa kạmiko kạmiye ehopʼena. 9Ar okaṭakʼ sunạgog do sạdhin hoṛkoakʼ sunạgogko metakʼkan tahẽkan ona sunạgogren adomko hoṛ do Stephan upạrteko teṅgoyena. Onko do Kureni ar Aleksandriạ nagraharen ar Kilikiạ ar Asiạ disạmren Jihudikoko tahẽkana. 10Onko do Stephan sãote reṭepeṭekʼko ehopʼena, menkhan Stephan do sonot Jiu hotete akel salakʼe galmaraoatʼkoa. Onate onko do uni upạrte bako teṅgo daṛeada.
11Unre onko Jihudiko do hape hapete adom hoṛko noa menkateko uskurketʼkoa, “Stephan do Mose ar Isor upạrte henosta reakʼ katha roroṛle ańjomakadea.”
12Nonkate onko do disạm hoṛko, murubbiko ar sostor baḍaekoko ạulạuketʼkoa ar Stephanko sapʼkedete maraṅ bạisi samaṅreko ạgukedea. 13Onko do adom adom eṛe gohakoko teṅgoketʼkoa. Eṛe gohakoko menkeda, “Nui hoṛ do jaoge mundil upạrte ar Moseyakʼ ạn-ạri upạrte kathae roṛeda. 14Ale do noa katha roroṛle ańjomakadea, Nasaretren uni Jisu do noa mundile rạputʼ giḍiya ar Mose oka ạn-ạrikoe emakatʼbon onako hõe pheraoa.”
15Ado ona maraṅ bạisire okoeko duṛupʼ akan tahẽkan onko sanamkoge Stephanko beṅgetʼ uricʼade khan uniyakʼ mẽtʼãhã do sermaren mitʼṭen goḍetakʼ mẽtʼãhã lekako ńelketʼtaea.
Currently Selected:
Aposkạmi 6: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
