Genesis 19
19
Kạite perecʼ Sodom
1Enhilokʼge ạyupʼ jokhecʼ unkin serma goḍet do Sodom nagrahatekin seṭerena. Lot do unre nagraha reakʼ phaṭok duạr ṭhene duṛupʼ akan tahẽkana. Unkin ńelte uni doe beretʼena ar otre ombakʼkate ḍobokʼatʼkinteye menkeda, 2“Ńelben, laha secʼ do ar alo ben calakʼa dayakate abenren gutiyakʼ oṛakʼte bolokʼben ar ti jaṅga ạbukokʼte aṅga hạṭińokʼben. Ar ạḍi setakʼre beretʼkate arhõ calakʼ ben.”
Unkin kin menkeda, “Baṅ, ạliń do noa nagraha reakʼ kulhirege liń tahẽ aṅgakʼa.”
3Menkhan Lot do ạḍiye jorae moṭketʼkin khan unkin do uni sãote senkate uniyakʼ oṛakʼtekin boloyena. Tayomte Lot do bin khạmiyanakʼ piṭhại sekao isinketʼte unkin lạgitʼ mońj jomakʼe tearkeda, arko jom ńũkeda. 4Menkhan unkin ạurikin gitijokʼrege Sodomren sanam juạn ar haṛam hoṛko do hecʼkate oṛakʼko esetʼ ạcurkeda. 5#Bikʼ 19.22-24 Onko do Lot hohoadeteko metadea, “Teheń ńindạ bar hoṛ am ṭhenkin hecʼakan unkin do okare menakʼkinạ? Unkin do ale ṭhen oḍok ạgukinme. Ale do unkin herel hoṛ sãotele loṭghuṭiya.”
6Unre Lot do duạr bahre hoṛko ṭhene oḍokena ar duạr doe siń toraketʼteye menkeda, 7“E boehako, ape ṭheniń nehõrokʼ kana, nonkan bạṛicʼakʼ do alope kạmiya. 8Ńelpe, ińren barea kuṛi menakʼkinạ. Unkin do tisge herelakʼ mẽtʼãhã bạkin ńelakada. Unkin do ape ṭheniń oḍok ạguyetʼkinạ. Unkin sãote apeakʼ sanaleka baṛe kạmipe, menkhan nukin hoṛ cetanre do cetʼ hõ alope cekaea, ente unkin do ińakʼ oṛakʼre asray kin hataoakada.”
9Menkhan onkoko menkeda, “Men, samaṅ khon ocogokʼme! Onko do arhõko menkeda, “Nui hoṛ do upriạ lekate abo ṭhene hecʼakana ar abo cetanreye khobor dariyeda. Ale do ńitokʼ unkin khon hõ am sãote arhõ bạṛicʼle beohara.” Noa menkate onko do Lot ạḍiko ṭhelaokedea ar oṛakʼ reakʼ silpiń rạpudko ehopʼena.
10Unre unkin hoṛ do ti tiạrkate oṛakʼ bhitrete Lotkin aderkedea ar silpiń kin sińkeda. 11#2 Raj 6.18Ona tayom unkin do bahrereko teṅgo akan tahẽkan juạn ar haṛamkoakʼ mẽtʼkin kãṛã ocoketʼtakoa ar onate cetʼge bako ńelńam daṛeada. Onate onko do duạr sendrateko laṅga cabayena.
Lot do Sodome bạgiyakʼkan
12Tayomte unkin hoṛ do Lotkin kulikedea, “Noa nagrahare jãwãe goṅkem, gidrạko se jãhãe peṛako menakʼkotama? Onko sanamko soṅgekate noa ṭhạ̃i khon oḍok calakʼme, 13ente noa ṭhạ̃i ḍahao marao lạgitʼge ạliń doliń sapṛao akana. Ente noa ṭhạ̃iren hoṛkoakʼ rakʼ do Probhu Isor ṭhen seṭer akana, ar ạliń do ona ḍahao marao lạgitʼ liń kol ocoakana. 14Unre Lot do bahrete senkate acʼren okoe jãwãe goṅkekin hoyokʼ onkine metatʼkinạ, “Usạrate noa jaega khon dela oḍok hijukʼben, Probhu Isor do noa nagraha ḍahao marao lạgitʼe sapṛao akana.” Menkhan unkin dokin hudiskeda uni doe khiloḍ kana.
15Setakʼen khan unkin serma goḍet do Lot usạrae lạgitʼkin metadea, “Ma usạragod me. Amren bạhu ar amren banar kuṛi okoe do nonḍe menakʼkin unkin salakʼ oḍok hijukʼme. Ar baṅkhan oka sạjại noa nagraha cetanre pheḍ hijukʼkan onare am hõm paṛaokʼa arem ḍahao marao utạrokʼa.”
16 #
2 Pat 2.7
Lot do menkhan hẽ nõkʼõe calakʼ kangeạńe ehopʼena. Menkhan Probhu Isorakʼ daya do uni cetanre tahẽkante unkin hoṛ do Lot ar uniren bạhu ar hoponerakin nagraha bahretekin or oḍokketʼkoa. 17Arko oḍoken khan unkin bar hoṛ modre mitʼ hoṛ doe menkeda, “Bańcaokʼem menetʼ khan dạṛme. Tayom secʼ alogem koyokʼ ruạṛa ar noa bilạn ṭạnḍire okare hõ alom teṅgokʼa. Burute dạṛpe; ar baṅ khan ape hõpe gujukʼa.” 18Unre Lote menkeda, “Baṅ, baṅ. 19Ńelme, amren guti cetanre am dom kusi akana, ar ińakʼ jiwi rukhiyại lạgitʼ okam ceka akatʼ ona do maraṅgea. Menkhan burute do bạń dạṛ daṛeakʼa. Hoedaṛeakʼa ona laharege muhin do ińre hecʼ paṛaokʼa ar iń doń gujukʼa. 20Ńelme, dạdạṛ hoyokʼtiń khan ona huḍiń ato ma sorrege menakʼ. Jiwi bańcao lạgitʼ iń do onḍege dạṛ ocowạńme. Ona ato do maraṅ baṅkanre hõ.”
21Serma goḍet do uniye metadea, “Iń do amakʼ noa nehõr iń dohoketʼtama. Ar okaṭakʼ ato reakʼ katham lạiketʼ ona do bạń maraoa. 22Menkhan ma usạrate nonḍe khon dạṛme. Ente onḍe ạurim seṭerokʼ hạbicʼ iń do cetʼge bạń ceka daṛeakʼkana.” Lotakʼ katha iạte ona ato reakʼ ńutum do Soar hoyena (metakʼme “Huḍiń”).
Sodom ar Gomora ḍahao maraokʼkan
23Lot do tinre Soarteye seṭerena unre siń cando doe rakapʼena. 24#Mat 10.15; 11.23,24; Luk 10.12; 17.29; 2 Pat 2.6; Jihu 7Ona tayomge Probhu do sermaren Probhu Isor ṭhen khon Sodom ar Gomora cetanre gondhok ar seṅgel dakʼe jạ̃ṛĩkeda. 25Uni do ona banar nagraha, onakin reakʼ sanam jaega, nagraharen sanam hoṛko ar onḍenakʼ jumikore janam akan nonkan sanamakʼe marao giḍikada. 26#Luk 17.32Lotren bạhu do tayomreye tahẽkana ar uni do tayom secʼe koyokʼ ruạṛkeda, ar onate uni doe buluṅ ḍhipiyena.
27Dosar hilokʼ Abraham do ạḍi setakʼre beretʼkate ona jaegae calaoena one okare laha hilokʼ Probhu Isor samaṅreye teṅgo akan tahẽkan. 28Uni do Sodom, Gomora ar bilạn ṭạnḍi secʼe beṅgetʼketʼ khan maraṅ okocʼ culhạre cetʼleka dhũạ rakabokʼ onkageye ńelkeda.
29Nonkate Lot okareye tahẽkan Isor do ona bilạn ṭạnḍi reakʼ nagrahae maraoetʼ tahẽkanre Abrahamakʼ katha disạkate Lot do onḍenakʼ muhin khone ocokʼ ạgukedea.
Moab ar Amonrenkoakʼ janam
30Soarre tahen bae dilletʼte Lot do acʼren banar hoponerawante onḍe khone oḍokena ar buru ṭoṭhateye calaoena. Onḍe uni do mitʼṭecʼ buru danderreye tahẽyena. 31Mitʼ din maraṅicʼ hoponera do huḍińicʼ kuṛiye metadea, “Baba mae haṛamokʼ kan. Ar noa ṭhạ̃ire nonkan herel hoṛ ma bạnukʼko okoe do hecʼkate dhạrti#19.31: goṭa dhạrti; se noa disạm. reakʼ niạm lekate alaṅe baplake laṅ. 32Dela, alaṅ do darkha rasate baba laṅ ńũ bul ocoyea ar uni tulucʼ laṅ giticʼmidokʼa. Ar onate baba hotete alaṅakʼ bõs laṅ rukhiyạ daṛeakʼa.”
33Ona katha lekage enhilokʼ ńindạ jokhecʼ unkin do darkha rasate apattetʼkin ńũ bul ocokedea. Ar ona tayom maraṅicʼ kuṛi do apattetʼ tulucʼe giticʼmitʼena, menkhan uni tinreye giticʼena ar tinreye beretʼena ona do Lot bae disạleda. 34Dosar hilokʼ maraṅicʼ do huḍińicʼ kuṛiye metadea, “Ńelme, hola ńindạ do baba tulucʼ iń giticʼmitʼena. Dela, teheń ńindạ hõ onka gelaṅ bul ocoyea, ar ona tayom do uni tulucʼ am giticʼmidokʼme. Enḍekhan baba hotete alaṅ do alaṅakʼ bõs laṅ rukhiyạ daṛeakʼa.”
35Nonkate unkin do ona ńindạ hõ apattetʼkin bul ocokedea ar huḍińicʼ do apattetʼ sãoteye giticʼmitʼena. Ar uni huḍińicʼ kuṛi do tinreye giticʼena are beretʼena ona do apattetʼ bae disạleda. 36Nonkate Lotren banar kuṛige ạkinren apattetʼ hotetekin bhạrti hoṛmoyena. 37Tayomte maraṅicʼ kuṛiren do mitʼṭen koṛa gidrại hoyena ar uniyakʼ ńutum do Moabe dohoketʼtaea (metakʼme “Baba ṭhen khon”). Nui kangeae Moabkoren janam data do. 38Ar huḍińicʼ kuṛiren hõ mitʼṭen koṛa gidrại hoyena, ar uniyakʼ ńutum do Ben-amine dohoketʼtaea (metakʼme, “Iń bõsren hopon”). Uni do ńitokʼren Amonikoren janam data kanae.
Currently Selected:
Genesis 19: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
