Genesis 21
21
Isahakakʼ janam
1Probhu Isor do acʼakʼ katha lekage Sarae hirikedea ar uni lạgitʼ okaṭakʼe gokʼakatʼ tahẽkan onae onkakeda. 2#Ibr 11.11Onate Sara doe bhạrti hoṛmoyena. Ar Abrahamakʼ haṛam umerre Sarawakʼ kukhire uniren gidrại janamena. Isor oka okte reakʼ kathae menletʼ ṭhik ona okterege uni gidrạwakʼ janam do hoyena. 3Abraham do Sarawakʼ kukhiren uni gidrạwakʼ ńutum Isahake dohoketʼtaea. 4#Gen 17.12; Apos 7.8Isorakʼ hukum lekage Abraham do irạl dinre acʼren hopon Isahake khatna ocokedea. 5Abrahamakʼ umer tinre mitʼsae bochor tahẽkana unre Isahakakʼ janam do hoyena. 6Sarae menleda, “Isor doe landa ocokedińa, ar ona katha ańjomkate eṭakʼko hõko landaea.” 7Uni do arhõe menkeda, “Sara okoeṭakʼ hopon toae ńũnũae noa katha Abraham do okoe lahareye lại daṛekea? Menkhan uniyakʼ noa haṛam umerrege uniren gidrạ do ińakʼ hoborreye hecʼena.”
Hagar ar Ismael dokin oḍok ocokʼkan
8Isahak doe harayena ar gogowakʼ toa ńũ tise bạgiketʼ enhilokʼge Abraham do mitʼṭecʼe bhojkeda. 9Sarae ńelkeda, Hagarakʼ kukhire Abrahamren okoeṭakʼ gidrại janamlen uni ṭhen Isahak doe nisṛạu ocokʼkana. 10#Gal 4.29,30Ar onate uni do Abrahame metadea, “kạ̃ṛmĩ era do gidrạ sudhạ oḍok giḍikaeme, ente Isạhak sãote uni gidrạ do sompotti reakʼ ạidạriyicʼ bae hoedaṛeakʼa.”
11Gidrạ Ismael iạte Abrahamakʼ mon do bạṛicʼentaea. 12#Apos 9.7; Ibr 11.18Menkhan Isor do uniye metadea, “Amren kạ̃ṛmĩ ar uniren gidrạ iạte mon do alom bạṛijtama. Sara okaṭakʼe menakatʼme am do onage onkaeme, ente Isahakren bõskoge amren bõs menteko lekhakʼa. 13Tobe uni kạ̃ṛmĩren gidrạ hotete hõ mitʼṭen maraṅ jạtrenkoń benao rakapʼkoa, ente uni hõe amren hoponkana.”
14Unre Abraham do ạḍi setakʼre beretʼkate thoṛa jomakʼ ar dakʼte perecʼ mitʼṭecʼ kum Hagare emadete tarenrey ladeadea. Ar ona tayom gidrạ hõ tireye caladete uniye bidạkadea. Hagar do onḍe khon oḍokʼkate Ber-Seba reakʼ hahaṅkarre ạcur baṛaye ehopʼena. 15Kum reakʼ dakʼ cabayen khan uni do mitʼṭecʼ jhạuạ latarre acʼren gidrại giticʼkedea. 16Ar ona tayom do mitʼṭecʼ sar tuń sạṅgińre senkateye duṛupʼena. ‘gidrạwakʼ gujukʼ jemon aloń ńel’ mone monte noa menkate onḍeye duṛupʼena ar ãṭ aṛaṅte rarakʼe ehopʼena.
17Gidrạwakʼ rakʼ do menkhan Isorakʼ luturre seṭerena. Unre Isorren goḍet do serma khon Hagar hohowadeteye metadea, “E Hagar, amakʼ do cetʼ hoyakana? Alom botorokʼa, ente gidrạ okare menae onḍe khonge uniyakʼ rakʼ do Isorakʼ luturre seṭer akana. 18Am do beretʼkate gidrạ heweme, ente uni hotete iń do mitʼṭecʼ maraṅ jạtiń benao rakapʼkoa.”
19Ona tayom Isor do Hagarakʼ mẽtʼe saṛ ocoketʼtaea, onate uni do dakʼte perecʼ mitʼṭecʼ ḍạḍiye ńel ńamkeda. Ar ona ḍạḍi ṭhen senkate uni do acʼakʼ kume perecʼketʼte gidrại ńũ ocokedea. 20Isor do uni gidrạ ńel todarote ehopʼena, ar uni gidrạ doe sẽṛã idiyena. Uni do hahaṅkarreye tahẽyena ar akʼ sar enecʼreye paka idiyena. 21Uni do Paran ńutumanakʼ mitʼṭecʼ hahaṅkar ṭoṭhare girobasokʼe ehopʼena. Ar uniren eṅgattetʼ do Misor disạmren mitʼṭen kuṛi sãoteye baplakadea.
Abraham ar Abimelekakʼ bondobos
22 #
Gen 26.26
Ona oktere Abimelek ar acʼren maraṅ senapoti Pikol do Abraham ṭhen hecʼkatekin menkeda, “Am jãhãnakʼgem kạmiyetʼ amakʼ joto kạmirege Isor do am sãote menaea. 23Onate am do Isor ńutumte ńit iń ṭhen noa kiriạkʼme, iń ar ińren hoponko sãote se ińren bõsko sãote am do eṛe bam beohara. Cetʼ leka am tulucʼ pạtiạr salakʼ iń beohar akatʼ, ṭhik onkage amhõ iń sãote ar oka disạmre upriạ menam ona disạmren hoṛko sãote pạtiạr salakʼem beohara.”
24Abrahame menkeda, “Hẽ, iń doń kiriạkʼ kana.” 25Menkhan uni do mitʼṭecʼ kuń babotre Abimelek ṭhene lạliskeda, uniren gutiko do jorkate acʼ ṭhen khon onako hatao akada.
26Abimeleke roṛ ruạṛkeda, “Noa okoeye kạmi akatʼ ona do bạń baḍaea. Am do noa lahare bam lại akawạdińa. Iń do teheńgeń ańjomkeda.”
27Ona tayom Abraham do bhiḍi ar daṅgrakoe ạguketʼkote Abimeleke emadea ar unkin do mitʼṭecʼ kin bandhaokeda. 28Abraham do acʼakʼ bhiḍi pal khon eae goṭen bhiḍi hopone begarketʼkoa. 29Noa ńelte Abimelek doe kuliyana, “Noako do cetʼkana? Ar noko eae goṭen bhiḍi hopon begarko reakʼ mane baṅ cetʼkan?”
30Abrahame menkeda, “Noko do amem hataokoa. Noa kuń ińiń la akatʼ ona reakʼ porman kanako noko do.”
31Onate ona jaega reakʼ ńutum do Ber-seba (metakʼme “Kiriạ reakʼ kuń”), ente nonḍege unkin dokin kiriạlena.
32Ber-sebare noa bondoboskin bandhaoketʼ tayom Abimelek ar acʼren maraṅ senapoti Pikol do ạkinakʼ disạm, metakʼme Philistikoakʼ disạmtekin ruạṛ calaoena.
33Abraham do Ber-Sebare Probhu Isor, metakʼme okoe do etohopʼ ar ses bạnukʼtae uni Isore sewawadea. Ar onḍe do mitʼṭecʼ jhão dareye rohoekeda. 34Abraham do Philistikoakʼ disạmre ḍher dine tahẽyena.
Currently Selected:
Genesis 21: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
