Genesis 27
27
Isahak do Jakobe bhoraekan
1Haṛam umerre Isahak do mẽtʼ reakʼ ńeńel daṛe nunạkʼ kom idiyentaea, uni do ar bae ńeńelkan tahẽkana. Uni do mitʼ din acʼren maraṅicʼ hopon Esau hohoadeteye metadea, “E beṭa.”
Esaue roṛ ruạṛkeda, “Hẽ baba.”
2Isahake menkeda, “Ńelme, iń doń haṛamena; ar tisiń gujukʼa ona do bạń baḍaea. 3Onate am do, amakʼ akʼ-sarante sendra calakʼme ar iń lạgitʼ sendra jel ạguiyme. 4Ar ona tayom do ińiń kusiyakʼ leka sebel jomakʼ tearme ar ạguạńme, jemon gujukʼ lahare ona jomkateń bhor oṭowam.”
5Isahak do acʼren dulạṛiạ hopon Esau sãote tinre kathae roroṛkan tahẽkana unre Rebeka do onae ańjom tiyokʼkeda. Ar Esau sendrae calao akan tahẽkanre, 6Rebeka do acʼren dulạṛiạ hopon Jakobe metadea, “Ńelme, ańjomkedạń, am baba do amren dadame men akawadea, 7‘sendra jel ạgukate mońjte jemone isin aroeate onae jom daṛeakʼ. Ar ona jomkate ạuriye gujukʼre Probhu Isor samaṅreye bhor oṭoae.’ 8Onate beṭa, ńitokʼ okaṭakʼ iń metam ona leka kạmime. 9Am do ńitge bhiḍi meromkoakʼ palte calakʼme ar moṭa soṭa barea merom hopon ạguwạńme. Iń do unkinte am babae kusikʼ leka jomakʼiń teara. 10Ar am baba ṭhen onam idiya ar ona jomkate uni do gujukʼ lahareye bhorama.”
11Unre Jakob do eṅgattetʼe metadea, “Menkhan iń dada Esau ma goṭa hoṛmore hodo hodo upʼ menakʼtae, ar ińakʼ ma bạnukʼtiń. 12Iń baba do tinre tite hoṛmoreye capoyińạ ar unreye hudisa uni doń ṭhoka akadea. Unre uni do bhor bodolteye sarapạńa.”
13Menkhan acʼren eṅgat do uniye metadea, “E beṭa, amakʼ ona sarap do ińre paṛaokʼma. Am do eken ińakʼ katha ańjomme ar senkate barea merom hopon ạguwạńme.”
14Jakob do senkate merom hopone ạguketʼkinte acʼ gogoe emadea, ar Rebeka do Jakob acʼ babae kusiyakʼ leka jomakʼe isinkeda. 15Ar ona tayom do acʼren maraṅicʼ hoponakʼ mońj utạrakʼ kicricʼ huḍińicʼ hopone horokʼadea; ente kicricʼko do oṛakʼrege tahẽkana. 16Uni do Jakobakʼ ti ar hoṭokʼre okakore upʼ baṅ tahẽkan onḍe do merom hoponakʼ hartae paṭheadea. 17Ona tayom acʼakʼ tearakʼ ona sebel jomakʼ ar piṭhạ Jakobe caladea.
18Ar Jakob do acʼ baba ṭhen senkateye hohokeda, “E ba.”
Isahake menkeda, “Am dom okoe kana beṭa?”
19Jakob do acʼren apate metadea, “Iń do amren maraṅicʼ hopon Esau kạnạń. Am okam metadiń tahẽkan iń do onań onka akada. Ńitokʼ am do ma beretʼme ar ińakʼ sendra ạguakʼ jel jomme ar bhorạń.”
20Isahake roṛ ruạṛkeda, “E beṭa, cekate unạkʼ usạra sendra jel dom ńamkeda?”
Jakob roṛ ruạṛkeda, “Amren Probhu Isorakʼ ạyurtege.”
21Unre Isahak do Jakobe metadea, “Dela iń ṭhen hijukʼme, jemoniń tunum ạikạume ariń bujhạ daṛeakʼ am do sạrige ińren hopon Esau kanam mente.”
22Jakob do acʼ baba Isahak ṭhene sen sorena. Ar Isahak do tite tunumkedeteye menkeda, “Aṛaṅ do Jakobakʼ kana menkhan, ti do Esauakʼge.”
23Jakobakʼ ti do acʼren boeha Esauakʼ lekage upʼte perecʼ tahẽkante Isahak do bae bujhạu daṛeadea. Ar Isahak do uni bhorae lạgitʼe sapṛaoena. 24Uni do arhõe kulikedea, “Am do cetʼ sạrige ińren Esau kanam?”
Jakobe menkeda, “Hẽ baba.”
25Isahake menkeda, “Enḍekhan amakʼ sendra jel khon thoṛa ạguạńme, jemon ona jomkateń bhoram.”
Unre Jakob do Isahak ṭhen jomakʼe ạgukeda, ar Isahak do ona khone jomkeda. Ona tayom Jakob do darkha rasa hõe emadea ar uni doe ńũkeda. 26Ar ona tayom Isahake menkeda, “E beṭa, dela hijukʼmeń cokʼamge.”
27 #
Ibr 11.20
Unre Jakob doe sen sorena are cokʼ ocoyena, ar Isahak do uniyakʼ kicricʼ reakʼ soe ńamketʼte noa menkateye bhoradea:
“Nõkʼõe coṅ ińren hoponakʼ so,
Probhu Isore bhor akawatʼ jumi reakʼ lekage noa so do.
28Isor do serma reakʼ sisire emam ma,
ar amakʼ jumiye bhorakʼma;
Am do ḍher phosol ar nãwã darkha rasam ńama.
29 #
Gen 12.3
Eṭakʼ jạtrenko do amko sapʼ sorama,
ar sanam hoṛge amko ḍobokʼama.
Am gusṭiren hoṛkoren mạlikkem hoyokʼa,
onko do amko ḍobokʼama.
Okoe amko sarapam
onko cetanre hõ sarap paṛaokʼma;
ar okoe amko bhoram
onko hõ bhor hecʼakoma.”
Bhor ńam lạgitʼ Esauakʼ nehõr
30Isahak do Jakobe bhoradea. Ar Jakob acʼ baba ṭhen khon ạuriy ocogokʼrege dadattetʼ Esao do jel sendra khon oṛakʼteye ruạṛ hecʼena. 31Ar sebel jomakʼe isinketʼte acʼ baba ṭhen idikateye menkeda, “E ba, ma beredokʼte duṛubokʼme ar amren hopone ạguakatʼ sendra jel jomme ar bhorạńme.”
32Isahak do uniye kulikedea, “Am dom okoekana?”
Esaue menkeda, “Iń do amren maraṅicʼ hopon Esau kạnạń.”
33Noa katha ańjomkate Isahak doe thar tharaoena. Uni doe menkeda, “Enḍekhan sendra jel do okoeye ạguạdińa? Iń do am hijukʼ laharege onań jomkeda ar uni hõń bhoradea, ar ona bhor reakʼ jo do unigeye ńama.”
34Esau do acʼ babawakʼ katha ańjomkate ạḍi ãṭe rakʼkeda. Ar ona tayom do acʼ babae metadea, “E ba, ińhõ bhorạńme.”
35Isahake menkeda, “Amren bokom do eṛekate amakʼ bhore idiakada.”
36Esaue menkeda, “Jakob#27.36: Jakob: Noa reakʼ Hebrew mane do hoyokʼkana “ekʼṛeyicʼ.” ńutum emae do ṭhikge hoyakana, ente uni do bar dhao ińakʼ jaega khone ocokʼkedińa. Uni do ińakʼ maraṅ hoponakʼ ạidạri hõe hatao akada ar niạ dhao do ińakʼ bhor hõe idikeda.”
Esau do arhõe menkeda, “Iń lạgitʼ do cetʼ jãhãn bhor bam dohoakada?”
37Isahake roṛ ruạṛkeda, “Ńelme, uni do amren mạlik iń hoyoco akadea ar uniyakʼ gusṭiren sanamko do acʼren gutiń hoe ocoakatʼkoa. Iń do uni lạgitʼ phosol ar nãwã darkha rasań bondobos akada. Am lạgitʼ do ńit cetʼ iń cekaea?”
38 #
Ibr 12.17
Unre Esau do acʼ baba nehõrkateye metadea, “E ba, am ṭhen do cetʼ ona mitʼṭecʼ bhorge tahẽkana? Am do iń hõ bhorạńme.” Noa menkate Esau do ãṭ aṛaṅte rarakʼe dhurạuena.
39 #
Ibr 11.20
Unre acʼ babae menkeda,
“Am okaṭakʼ jumirem girobasokʼ
ona do bhage hasa baṅ hoyokʼa;
onḍe do serma reakʼ sisir hõ baṅ ńurokʼa.
40 #
Gen 36.8; 2 Raj 8.20 Amakʼ tarwaṛegete jiwetʼem tahena,
ar am do bokomren gutim hoyokʼa.
Menkhan khạtirjoma tinre bam tahẽ daṛeakʼa
unre am do amakʼ taren khon
uniyakʼ araṛem giḍikakʼa.”
41Jakob do acʼ baba ṭhen khon bhore ńamketʼ khan Esau ṭhen hiskạ ocokʼe ehopʼena. Uni do mone monteye menkeda, “Iń baba lạgitʼ rakʼjoṅ din do sor hijukʼ kana. Ar ona tayomge ińren boeha Jakob doń khũnea.”
42Rebeka do acʼren maraṅicʼ hopon Esauakʼ joto kathae ańjomketʼ khan hoṛ kolkate huḍińicʼ hopone hoho ạgu ocokedete uniye metadea, “Ańjomme, amren boeha Esau do ame gocʼmea ar onate acʼakʼ jiwiye raṛejtaea. 43-44Onate beṭa, ińakʼ katha ańjomme. Am do Haran nagrahate ińren boeha Laban ṭhen dạṛme ar amren boehawakʼ raṅgao ạuri cabakʼ hạbicʼ onḍege tahenme. 45Thoṛa din tayom tinre raṅgao cabakʼtaea ar uni upạrte cetʼem cekaleda mente onae hiṛińa, unre hoṛ kolkate onḍe khoniń ruạṛ ạgumea. Ente cedakʼ mitʼ dinte bana hoṛiń atʼbena?”
46Tayomte Rebeka do Isahake metadea, “Noko Hitti kuṛiko iạte iń do jiwetʼ tahen baṅ sanań kana. Ar Jakob hõ noa disạmren jãhãe Hitti kuṛiye baplaye enḍekhan ińakʼ jiwetʼ tahen do cetʼ lab?”
Currently Selected:
Genesis 27: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
