Luk 1
1
Onoṛ katha
1-2Manotan Thiophil, aboko talare okako ghoṭna hoylen ar pạhil khon okoekoko ńelletʼ ar Isorakʼ bhage sombatko porcarletʼ, onko do ale sanamakʼko baḍae ocoakatʼlea, ar onkoakʼ katha lekage ḍher hoṛ do ona reaṅko ol akada. 3Ar iń do onako reaṅ pạhil khonge mońj okocʼte suṭhik hataokate, mitʼṭecʼ mitʼṭecʼkate olam do besiń hudiskeda. 4Onate am okaṭakʼem ańjomakatʼ ona sạrikana se baṅa, onam baḍae daṛeakʼa.
Johan bạbạptisicʼakʼ janamokʼ reaṅ lại lahakʼkan
5 #
1 Bõs 24.10
Herod do tinre Jihudạ Prodesren raje tahẽkana unre Abiạ thokren Sakariạ ńutuman mitʼṭen hoṛ do Jihudikoren naekeye tahẽkana. Uniren bạhutetʼakʼ ńutum do Elisabet. Uni hõ naeke Aron bõsrene tahẽkana. 6Isor samaṅre unkin bana hoṛge dhorom kin tahẽkana. Ar Probhu Isorakʼ sanam hukum ar niạmko ṭhik lekakin manaoetʼ tahẽkana. 7Unkinren do cele gidrạge bako hoyakan tạkin tahẽkana ente Elisabet do bạńjhigeye tahẽkana. Inạ chaḍa unkinakʼ umer hõ ạḍi aema hoyakan tahẽkana.
8Mitʼ dhao Sakariạ do acʼakʼ dol reakʼ pạlire Isor samaṅre naeke reakʼe kạmikan tahẽkana. 9Naeke kạmi reakʼ cạli leka gulibãṭ hotete unirege paṛaoena jemon uni do Probhu Isorakʼ mundil reakʼ sonot jaegare dhupe jeretʼ daṛeakʼ. 10Ar uni dhupe jered oktere bahrere do ạḍi utạr hoṛko koejoṅkan tahẽkana. 11Unre Probhu Isorren mitʼṭen goḍet do ackage hecʼkate dhup pinḍ reakʼ jojomsa aṛere Sakariạ ṭhene ńel ocoyena. 12Ar Sakariạ do serma goḍete ńelkede khan ạḍiye torasena ar botor caṛhaoadea.
13Serma goḍet do uniye metadea, “Alom botorokʼa, Sakariạ, ente Isor do amakʼ koejoṅe ańjomakada. Amren bạhu Elisabetren do mitʼṭen koṛa gidrại hoyokʼtaea. Ar uniyakʼ ńutum do Johanem dohoytaea. 14Uni do amakʼ jionre maraṅ rạskạwạnicʼe hoyokʼa ar uniyakʼ janam khạtirte arhõ ạḍi utạr hoṛko rạskạkʼa. 15#Num 6.3 Ente Probhu Isorakʼ mẽtʼãhã samaṅre uni do maraṅe hoyokʼa. Uni do tishõ darkha rasa se eṭakʼ jãhãn bubulakʼko bae ńũiya ar eṅgatakʼ kukhireye tahen khonge sonot Jiuteye perejokʼa. 16Israelko modren ḍherkoge akoren Probhu Isor secʼe ruạṛ ạgukoa. 17#Mal 4.5 Uni do Eliạ nạbi reakʼ Jiu ar daṛete Probhu Isor laha lahateye hijukʼa. Ar apatkoakʼ mon hoponko secʼe ruạṛtakoa ar bebatao hoṛkoakʼ mon reakʼ buje pheraotakote Isor sewa hoṛkoakʼ buj lekae hoy ocoytakoa. Nonkate uni do Probhu Isor lạgitʼ mitʼṭecʼ sapṛao akan jạtrenkoe tearkoa.”
18Unre Sakariạ do serma goḍete metadea, “Cekateń bujhạu daṛekea? Iń ma coń haṛamge ar ińren bạhuakʼ umer hõ ạḍi ḍher hoyakantaea.”
19 #
Dan 8.16; 9.21 Serma goḍete menkeda, “Iń doń Gabriel kana; iń do Isor samaṅre teṅgo akaniń tahenkana. Am saõte galmarao ar noa bhage sombat emam lạgitʼge Isor doe kol akadińạ. 20Ńelme, ińakʼ katha do okterege purạukʼa, menkhan ińakʼ katha bam pạtiạuatʼte am do guṅgạm tahena. Ar noako ạuri hoyokʼ hạbicʼ katha bam roṛ daṛeakʼa.”
21Hoṛko do Sakariạ lạgitʼko koyokʼ hor akatʼ tahẽkana. Ar mundil reakʼ sonot jaegareye bilomokʼkana ńelte onko do hahaṛakʼko ehopʼena. 22Ado Sakariại oḍok hecʼen khan hoṛko sãote katha bae roṛ daṛeada. Ar noateko bujhạukeda, uni do sonot jaegare jãhãn dorsone ńelakada. Uni do hoṛko sãote isạrate kathae roṛkeda ar guṅgạgeye tahẽyena.
23Ado naeke kạmi reakʼ pạli mucạtʼentae khan uni do oṛakʼteye calaoena. 24Ar inạ tayom acʼren bạhu Elisabet doe bhạrti hoṛmoyena ar mõṛẽ cando hạbicʼ oṛakʼ khon bahrete bae oḍok baṛalena. Uniye menkeda, 25“Noa do Probhu Isorakʼ kạmikana. Manwako ṭhen khon ińakʼ lajaoe cabaetiń lạgitʼge uni doe beṅgetʼ akawạdińa.”
Jisu Mạsiye janamokʼ reaṅ lại lahakʼkan
26Elisabet turui cando bhạrti hoṛmoe tahẽkanre Gabriel ńutuman mitʼṭen serma goḍet do Isor ṭhen khon Gạlil reakʼ Nasaret atoren Mạriạm ńutuman mitʼṭen kũạ̃ri kuṛi ṭhene kol ocoyena. 27#Mat 1.18 Uni do Dạud bõsren Joseph ńutuman mitʼṭen hoṛ sãote baplakʼ lạgitʼe horokʼ cikhnạ akan tahẽkana. 28Serma goḍet do Mạriạm ṭhen hecʼkate joharadeteye metadea, “Probhu Isor do am soṅgere menaea are bhor akatʼmea.”
29Noa katha ańjomkate Mạriạm do monreye ạndukʼ mạndukʼena. Uni do hudisokʼe ehopʼena, noa baṅ cetʼlekan joharkan. 30Serma goḍet do uniye metadea, “Mạriạm, alom botorokʼa, ente Isor do ạḍiye daya akatʼmea. 31#Mat 1.21 Ńelme, am dom bhạrti hoṛmokʼa ar mitʼṭen koṛa gidrại hoyokʼtama. Uniyakʼ ńutum do Jisum dohoytaea. 32#2 Sam 7.12,13,16; Jes 9.7 Uni do maraṅe hoyokʼa. Ar maraṅ Isorren Hopone ńumogokʼa. Probhu Isor do uniren hapṛam Dạudakʼ siṅghạsone emaea. 33Uni do Jakob bõsrenko cetanre jaejug hạbicʼe rajokʼa. Ar uniyakʼ raj do tishõ baṅ mucạdokʼtaea.”
34Mạriạm do serma goḍete metadea, “Noa do cekate hoedaṛekokʼa? Ińakʼ ma baplage coṅ baṅ hoyakantiń.”
35Serma goḍete menkeda, “Sonot Jiu do am cetanreye hijukʼa ar maraṅ Isorakʼ daṛegeye umulkama. Noa iạte okoeṭakʼ sonot Hopone janamokʼ uni do Isorren Hopone ńumogokʼa. 36Ar ńelme, niạ buḍhi umerre amren peṛa Elisabet hõ hoṛmore koṛa gidrại ńam akawana. Hoṛko menetʼ tahẽkana uniren do gidrạge bako hoyokʼtaea, menkhan ńitokʼ do turui candoreye paṛao akana. 37#Gen 18.14 Isor ṭhen do bin daṛeanakʼ mente cetʼge bạnukʼa.”
38Mạriạme menkeda, “Iń doń Probhu Isorren kạ̃ṛmĩ kana, amakʼ katha lekage ińre jotowakʼ baṛe hoyokʼma.” Ona tayom serma goḍet do Mạriạm ṭhen khone calaoena.
Elisabetakʼ oṛakʼre Mạriạm
39Inạko din tayom Mạriạm do usạrage Jihudạ Prodes reakʼ mitʼṭen atoteye calaoena. Ona ato do buru ṭoṭhare tahẽkana. 40Mạriạm do onḍe Sakariạwakʼ oṛakʼre bolokate Elisabete joharadea. 41Elisabet do Mạriạmakʼ johare ańjomketʼ khan acʼakʼ kukhiren bale gidrạ doe keṭel gotʼena. 42Uni do sonot Jiuteye perecʼente ãṭ aṛaṅteye menkeda, “Sanam maejiuko modre am dom bhạgangea ar amren okoeṭakʼ gidrại hoyokʼ, uni hõe bhạgangea. 43Ińren Probhu Isorren eṅgat iń ṭhene hecʼakana, noa do cekate hoyena? 44Ente amakʼ johar kathań ańjomketʼ sãote, ińakʼ kukhiren gidrạ do rạskạteye keṭel gotʼena. 45Bhạgan geam am do, ente am dom pạtiạu akana, Probhu Isor okae men akawatʼme ona purạukʼa mente.”
Mạriạmakʼ sarhao sereń
46 #
1 Sam 2.1-10
Unre Mạriạme menkeda,
“Ińakʼ jiwi do Probhu Isore sarhaoede kana;
47ińren babańcaoicʼ Isor iạte,
ińakʼ jiwi do rạskạte perecʼ akana,
48 #
1 Sam 1.11
ente acʼren kạ̃ṛmĩ secʼ
uni doe beṅgetʼ akada.
Ńitokʼ khon sanam hoṛ do bhạganko mitạńa,
49ente daṛeanicʼ Isor do iń lạgitʼ
tinạkʼ maraṅakʼkoe kạmi akada.
Uni doe sonotgea.
50Ar okoe uniko sewawaekan
uni do onkoreye dayakʼ kana,
piṛhi cetan piṛhige.
51Uni do ti tiạrkate maraṅ daṛeakʼkoe kạmi akada;
ar okoeyakʼ mon hiskạte perecʼge
onko doe chir chạturakatʼkoa.
52 #
Job 5.11; 12.19 Uni do siṅghạson khon rajkoe ńurhạketʼkoa,
menkhan nindhạnko doe tul rakapʼ ketʼkoa.
53Ar okoekoko reṅgecʼge,
bhage, bhage jiniskote
uni do onkoakʼ reṅgecʼe purun akatʼtakoa,
menkhan kisạ̃ṛko do eken tiye bidạkatʼkoa.
54-55 #
Gen 17.7
Ar aboren hapṛamko ṭhen
okae menletʼ tahẽkan,
onkage uni do acʼren guti
Israelkoe ńel sãohãketʼkoa.
Abraham ar uni bõsren hoṛko cetanre
jaejug hạbicʼ mãyãwako reakʼ kathae disạ dohoakatʼa.
56Mạriạm do Elisabet ṭhen pe cando tahẽkate acʼakʼ oṛakʼteye ruạṛ calaoena.
Johan bạbạptisicʼakʼ janam
57Okte purạuen khan Elisabet do mitʼṭen koṛa gidrại janamkedea. 58Ar uni cetanre Probhu Isorakʼ aema mãyã reakʼ katha ańjomkate aḍepaserenko ar peṛako do uni sãote rạskạkʼko ehopʼena. 59#Lev 12.3 Ado Jihudikoakʼ niạm leka irạl din hilokʼ onko do gidrạ khatnaye lạgitʼko hecʼena. Ar acʼ babawakʼ ńutum leka Sakariạ ńumeko menetʼ tahẽkana, 60menkhan uniren eṅgattetʼ doe menkeda, “Ona do baṅ, nuiyakʼ ńutum do Johan dohoy hoyokʼa.
61Onko do Elisabetko metadea, “Amren peṛako modre okoeyakʼ hõ coṅ onkan ńutum ma bạnukʼ.”
62Ado gidrạren apattetʼ ṭhen baḍae sanaketʼko khan, onko do isạrawateko kulikedea cetʼ ńutum dohoyem khojkana. 63Sakariạ do mitʼṭecʼ olokʼ paṭa koekateye olkeda, “Nuiyakʼ ńutum do Johan dohoy hoyokʼa.”
Ar ona iạte sanamkoko hahaṛayena, 64Ar unrege Sakariạwakʼ moca do jhicʼgotʼentaea ar alaṅ do ulṭạuentaea ar Isor sarhaoate katha roroṛe ehopʼena. 65Noa ńelte aḍepaseren hoṛ do botor caṛhaoatʼkoa, ar Jihudạ reakʼ goṭa buru ṭoṭharen hoṛko noa reaṅ galmaraoko ehopʼena. 66Okoe noa kathako ańjomketʼ onko do mone monte hudisokʼko ehopʼena arko menkeda, “Nui gidrạ do enḍekhan cele bhalae hoyokʼa?” Noa kathako menkeda ente Probhu Isorakʼ daṛe do gidrạ sãote tahẽkana.
Sakariạ do Isore sarhaoede
67Tayomte gidrạren apat Sakariạ do sonot Jiuteye perecʼen khan, nạbi lekate noa katha roroṛe ehopʼena,
68“Israelkoren Probhu Isorakʼ sarhao hoyokʼtaema,
ente uni do acʼren hoṛko secʼe beṅgetʼ akada
are chaḍao akatʼkoa.
69Uni do abo lạgitʼ
acʼren guti Dạudakʼ bõs khon
mitʼṭen daṛeanicʼ babańcaoicʼe omonkedea.
70Noa katha do acʼren sonot nạbikoakʼ moca hotete
uni do ḍher din laharegeye roṛletʼ tahẽkana.
71Uni do bạirikoakʼ ti khon
ar hirkhạkʼ kankoakʼ ti khon
aboe bańcao akatʼ bona.
72Uni do aboren hapṛamko mãyãwako lạgitʼ
acʼakʼ sonot bondobos, metakʼme acʼakʼ gokʼakʼ purạu lạgitʼ,
aboe rukhiyạ akatʼ bona.
73Ona gokʼakʼ do aboren hapṛam
Abraham ṭhene kiriyạlena.
74-75Uni do bạirikoakʼ ti khon
aboe bańcaoketʼbona
jemon tinạkʼ din jiwetʼbon tahen
sonot ar dhoromre acʼ samaṅre teṅgo akan
begor botor salakʼ bon sewa daṛeae.
76 #
Mal 3.1
E bachatiń,
am do coṭ utạricʼ Isorren nạbiyem ńumogokʼa,
ente am do uniyakʼ hor tear lạgitʼ
uni laha lahatem calakʼa.
77-78Am do uniren hoṛkom baḍae ocokoa,
cetʼ leka aboren Isorakʼ mãyãte
kại reakʼ ikạ ńamokʼte
kại khon bańcao bon ńama.
Uniyakʼ mãyãte serma khon mitʼṭecʼ jolokʼkan marsal
abo cetanreye pheḍ hijukʼ kana,
79 #
Jes 9.2
jemon ńut ar gujukʼ umulreko duṛupʼ akan
Onko do marsale emako,
ar suluk reakʼ horteye ạyur idi bon.”
80Ar Johan doe hara idiyente Jiureye daṛe idiyena. Ar Israelko samaṅre ạuriye bahalokʼ hạbicʼ uni do hahaṅkarregeye tahẽyena.
Currently Selected:
Luk 1: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
