Luk 24

Jisui jiwetʼ beretʼen

(Mathae 28.1-8; Mark 16.1-8; Johan 20.1-10)

1Ado hapta reakʼ pạhil hilokʼ ạḍi setakʼre onko maejiu do ona mahkaokʼ mosolawante topa ṭhenko calaoena. 2Onko do topa duạr khon dhiri ocokʼ akatʼko ńelkeda. 3Menkhan topa bhitriteko boloyen khan Probhu Jisuakʼ hoṛmo do bako ńel ńamleda. 4Ar hahaṛakʼ tulucʼ ona reaṅko hudisokʼkan tahẽkanre bijli leka pĩṛĩtʼ pĩṛĩtʼ kicricʼ horokʼ akatʼ bar hoṛ onko samaṅre hecʼkatekin teṅgoyena. 5Onate maejiuko do botorteko ombakʼena. Unkin dokin metatʼkoa, “Jiwetʼicʼ do gocʼko talare cedakʼpe ńam baṛayede kana? 6#Mat 16.21; 17.22,23; 20.18,19; Mrk 8.31; 9.31; 10.33,34; Luk 9.22; 18.31-33 Nonḍe do bạnugicʼan; uni doe jiwetʼ beretʼ akana. Gạlilreye tahẽkanre okae metatʼpe tahẽkan ona baṛe disạipe. 7Uniye menletʼa, Manwa Hopon do kại hoṛkoakʼ tireko soprotea. Ar ona tayom doko kuruskaea ar tesar hilokʼ uni doe jiwetʼ beredokʼa.”

8Unre onko do ona katha disạ hecʼatʼkoa. 9Ar topa khon ruạṛ senkate gelmitʼ celako ar eṭakʼ sanamko noa kathako baḍae ocoketʼkoa. 10Onko maejiuko modre Magdalini Mạriạm, Johanna ar Jakob eṅgat Mạriạm hõkin tahẽkana. Ar onko sãoteko tahẽkan eṭakʼ maejiuko hõ noa sanamakʼ katha do apostolko ṭhenko lạikeda. 11Menkhan onako katha do onko ṭhen ạuṛiyakʼ lekage bujhạuena. Onate onko maejiukoakʼ kathate bako pạtiạulena. 12Menkhan Patras doe beretʼente topa ṭhene ńir calaoena are oyoṅketʼ khan eken kicricʼkogeye ńel ńamkeda. Ar oka hoyakan onate hahaṛakʼ tulucʼe ruạṛ hecʼena.

Emao atotekin calakʼkan cela ṭhen Jisui sodoren

(Mark 16.12,13)

13Enhilokʼge barea cela do Emaoko metakʼ mitʼṭecʼ atotekin calakʼkan tahẽkana. Ona ato do Jerusalem khon eae mail sạṅgińre tahẽkana. 14Ar oka hoyakan ona reakʼkin galmarao kan tahẽkana. 15Ona jokhecʼ Jisu do unkin ṭhene hecʼ sorente unkin tulucʼe sen idiyena. 16Ar unkinakʼ mẽtʼ do akoṭ akan tahẽkante Jisu bạkin orom daṛeadea. 17Unre Jisui metatʼkinạ, “Cetʼ ben galmarao idiyetʼkana?”

Unkin cela do mulingekin teṅgo tahẽyena. 18Unre unkin modre Kleopa ńutuman mitʼ hoṛ do Jisui kulikedea, “Am eskarge cetʼ Jerusalemre upriạ menama ar niạko dinre onḍe hoyakanakʼko bam baḍaea?”

19Jisu do unkine metatʼkinạ, “Cetʼ hoyakana?”

Ado Nasaretren Jisu babotre hoyakanakʼ kin lạiyadea. Uni do nạbiye tahẽkana. Kạmire ar kathate Isor ar sanam hoṛko ṭhen daṛeanicʼe tahẽkana. 20Aleren maraṅ naekeko ar sostor baḍaeko do Romren hoṛkoakʼ tireko soprotledea jemon bicạrete gujukʼ sạjạiko emae. Ar Jihudi mukhiyạko do uniko kuruskedea. 21Menkhan alele asokʼkan tahẽkana uni do Israel jạtrenkoe chaḍaokoa. Ar eken ona do baṅ, teheń noako ghoṭna do pe din hoyokʼ kana. 22Arhõ ale modren adom maejiuko do aleko hahaṛa ocoketʼlea. Onko do ạḍi setakʼre Jisuakʼ topa ṭhenko senlena, 23menkhan uniyakʼ hoṛmo onḍe do bako ńamletʼtaea. Ar ruạṛ hecʼkateko lạikeda, onko do serma goḍetko ńelketʼkinạ ar unkin serma goḍet dokin lạiyatʼkoa Jisu doe jiwetʼgea. 24Unre ale soṅgete tahẽkanko modre adomko do topa ṭhen senkate maejiuko lạiletʼ lekageko ńelkeda, menkhan Jisu do bako ńel ńamledea.”

25Khange Jisu do unkine metatʼkinạ, “Aben do cetʼge baben bujhạu akada. Abenakʼ mon do goṛdho akana, onate nạbikoko roṛakatʼ katha hõ baben pạtiạuakʼ kana. 26Mạsi do cetʼ noako duk jomkate ṭhonok ńam reakʼ katha baṅ tahẽkantaea?” 27Inạ tayom uni do Moseyakʼ ar joto nạbikoakʼ olakʼ khon ehopʼkate sanam sonot sostorre acʼ reaṅ okako olakan ona jotoe bujhạuatʼkinạ.

28Ado okaṭakʼ atotekin calakʼkan tahẽkan, ona ato sorko hecʼen khan Jisu do arhõ laha secʼe sen idikʼkan tahẽkana. 29Unre unkin do nehõradetekin metadea, “Ber hõe danaṅena, ar ạyubokʼkana. Am do ạliń tulucʼ tahenme.”

Onate uni do unkin tulucʼ tahen lạgitʼ oṛakʼteye boloyena. 30Ado unkin tulucʼ jojome duṛupʼenre uni do piṭhạ ataṅkate Isore gunmanao joharadea are kecakʼketʼteye ematʼkinạ. 31Unre unkinakʼ mẽtʼ do jhicʼena ar Jisukin oromkedea, menkhan ona são sãote uni doe changotʼena. 32Ado ạkin talare kin menjoṅana, “Horre uni do alaṅ sãoteye galmaraokan tahẽkanre ar sonot sostor reakʼe bujhạu alaṅkan tahekanre mon do cetʼ baṅ lolokʼkan tahẽkana?”

33Ar beretʼkate unkin do Jerusalamte kin calaoena ar onko gelmitʼ celako sãote eṭakʼko hõ mitʼ jaegarekin ńel ńamketʼkoa. 34Onko doko galmaraokan tahẽkana, Probhu Jisu do sạrigeye jiwetʼ beretʼ akana ar Simon ṭhene ńel ocoakana. 35Ar unkin cela do horre hoylenakʼ kin baḍae ocoketʼkoa. Unkin do arhõkin lạiyatʼkoa, piṭhại kecakʼetʼ tahẽkanre cetʼlekate kin oromkedea mente.

Jisu do apostolko ṭhene sodoren

(Mathae 28.16-20; Mark 16.14; Johan 20.19,20; Aposkạmi 1.6-8)

36Ado noako reaṅko galmaraokan tahẽkanre Jisu do hecʼkate onko talare teṅgoyente sanamkoe metatʼkoa, “Suluk ape ma.”

37Onko do bhutko ńele kana menteko hudisketʼte ạḍiko botorena. 38Jisu do onkoe metatʼkoa, “Cedakʼpe torasokʼkana ar monre cedakʼpe digdhạkʼkana? 39Ińakʼ ti ar jaṅga ńelpe. Tunum legayińpe, ińkangeạń, ente bhutakʼ do iń leka jel ar jaṅ do bạnukʼtakoa.”

40Noa katha menkate Jisu do acʼakʼ ti ar jaṅgae udukʼatʼkoa. 41Menkhan nunạkʼko rạskạyena arko hahaṛayena je, onko do pạtiạu hõ bako pạtiạu daṛeakʼkan tahẽkana. Unre Jisui kuliketʼkoa, “Nonḍe jãhãn jomakʼ menakʼtapea?”

42Onko do mitʼ kuṭrạ rapakʼ hakoko emadea. 43Uni do ona ataṅkate onko samaṅreye jomkeda. 44Ar ona tayome metatʼkoa, “Iń do ape sãote tahẽkanreń menleda, Mose reakʼ ạnre, nạbikoakʼ olakʼre ar sereńkore iń reakʼ okako katha olakan ona sanamakʼ do purạukʼtehõ purạukʼgea.”

45Uni do sonot sostor bujhạu ocoko lạgitʼ celakoakʼ bude jhicʼketʼtakoteye metatʼkoa, 46“Ol menakʼa, Mạsi do duk jojom hoyokʼtaea ar pe din hilokʼre gocʼko khone jiwetʼ beredokʼa. 47Arhõ ol menakʼa, Jerusalem khon ehopʼkate sanam jạtrenko ṭhen kại ikạkʼ lạgitʼ mon ạcur porcarokʼa. 48Apege noa sanamakʼko reaṅ goha do. 49#Apos 1.4 Ńelpe, ińren Baba okaṭakʼ emokʼ reakʼe gokʼakatʼ, onań kolapea. Serma khon daṛe ạuripe ńam hạbicʼ ape do noa nagraharege tahẽ hataṛokʼpe.”

Jisu sermateye rakapʼen

(Mark 16.19,20; Aposkạmi 1.9-11)

50 # Apos 1.9-11 Jisu do acʼren celako sãote Bethaniạ hạbicʼe calaoena. Ar onḍe uni do acʼakʼ ti tiyạrkate onkoe bhoratʼkoa. 51Are bhorakokan tulucʼge onkoe bạgiyatʼkoa ar sermateye rakapʼ idi ocoyena. 52Unre onko do uniko sewawadea ar ạḍi rạskạ salakʼ Jerusalemteko ruạṛ senena. 53Ar jaoge mundilre hecʼkate Isorko sarhaoedekan tahẽkana.

Currently Selected:

Luk 24: SBT

Highlight

Copy