Luk 4

Jisu do soetan ṭhene bidạu ocokʼkan

(Mathae 4.1-11; Mark 1.12,13)

1Jisu do sonot Jiuteye perecʼen khan, Jordan gaḍa khone calaoena. Ar Jiu reakʼ ạyurte pongel din hạbicʼ hahaṅkar jaegakoreye tahẽyena. 2Unre Soetan do Jisu laloce udukʼaete kạire ńurhạye reakʼe kurumuṭukeda. Ar niạ pongel din Jisu do cetʼge bae jomleda; ar onako din purạuen khan uni do reṅgecʼkedea.

3Unre Soetan do Jisui metadea, “Isorren Hopon kan khanem, enḍekhan noako dhiri do piṭhạ hoeocoyme.”

4 # Bib 8.3 Jisu do uniye roṛ ruạṛadea, “Sonot sostorre ol akana, ‘piṭhạ motote manwa do jiwetʼ bako tahena.’ ” 5Ona tayom Soetan do Jisu mitʼṭecʼ usul jaegateye idikedea ar mitʼ ripitʼte dhạrti reakʼ sanam rajosṭi udukʼadeteye metadea, 6“Noako joto reakʼ ektiạri ar ṭhonokiń emama, ente noako joto do ińre jimạ akana. Ar jãhãege sanań unige onań em daṛeaea. 7Ńitokʼ am do ińem ḍobokʼạń ar Probhu mentem aṅgociń, enḍekhan noako joto do amakʼge hoyokʼa.”

8 # Bib 6.13 Jisu do uniye roṛ ruạṛadea, “Sonot sostorre ol menakʼa, ‘am do amren Isorem ḍobokʼaea, ar eken uni eskargem dewa sewawaea.’ ”

9Unre Soetan do Jisu Jerusalemteye idikedea ar mundil reakʼ coṭ cuṛạre teṅgokedeteye metadea, “Isorren Hoponkan khanem nonḍe khon latarte donme, 10#Ser 91.11,12 ente sonot sostorre ol akana,

uni do acʼren goḍetko am reaṅe hukumakoa

onko do amko rukhiyạmea.

11Onko do titeko sepeńmea

jemon dhirire jaṅga alo bajaokʼtam.”

12 # Bib 6.16 Jisu do uniye metadea, “Sonot sostorre roṛ akana, ‘amren Probhu Isor do alom biḍạuea.’ ”

13Ado joto lekan lalockoe udukʼ mucạtʼade khan Soetan do thoṛa okte lạgitʼ Jisu bạgiyadeteye calaoena.

Jisu gạlilre kạmiye ehopʼetʼ kan

(Mathae 4.12-17; Mark 1.14,15)

14Jisu do sonot Jiu reakʼ daṛeteye perecʼen khan Gạlil Prodesteye ruạṛ calaoena. Ar uniyakʼ sombat do ona ṭoṭha reakʼ goṭa ṭạnḍire pasnao idiyena. 15Uni do onḍenakʼ sunạgogkore cetʼakoe ehopʼena. Ar sanamkoge uni sabasiaeko ehopʼena.

Nasaretre Probhu Jisuakʼ hukum

(Mathae 13.53-58; Mark 6.1-6)

16Inạ tayom Jisu do Nasaretteye hecʼena. Ar nonḍege uni doe haralena. Uni do acʼakʼ niạm leka jirạukʼ mãhãre sunạgogreye boloyena, ar sostor paṛhao lạgitʼe teṅgoyena. 17Ado Jesaea nạbiyakʼ puthiko caladea. Ar guṛhạ akan puthiye oṭakʼketʼ khan ona jaegae ńamkeda one ol akan,

18 # Jes 61.1,2 (LXX) “Probhu Isorren Jiu doe decʼ akawạdińa,

ente uni do ińe ojokʼ akadińạ

jemon reṅgecʼ orecʼko bhage sombat iń porcarako.

Uni doe kol akadińa,

bondi akanko chaḍaoko lạgitʼ,

kãṛã hoṛko ńeńel reakʼ katha

lại pasnao lạgitʼ,

ar talga tạuạkʼ akan hoṛ khalaskate

bidạkako lạgitʼ.

19Ona chaḍa Probhu Isore kusiyakʼ bochor hõ lại sodor lạgitʼe kol akadińa,.”

20Ona tayom uni do puthi guṛhạ ruạṛkate sapʼdapʼicʼe cal ruạṛadeteye duṛupʼena. Ar sunạgogren sanam hoṛkoakʼ nońjor do unire paṛaoena. 21Unre Jisui metatʼkoa, “Sonot sostor reakʼ katha teheńpe ańjomketʼ são sãote ona do purạuena.”

22Ar sanam hoṛ do uniko sabasiyadea ar uniyakʼ moca khon oḍokokʼkan mońj mońj katha ańjomte ạḍiko hahaṛayena. Onkoko menkeda, “Nui do cetʼ Josephren hopon doe baṅkana?”

23Jisui metatʼkoa, “Ape do noa hõpe mitạńa, ‘E raranicʼ amge baṛe bogekokʼme.’ Arhõpe mitạńa, ‘Kapharnạhumre okako kạmi reakʼ kathale ańjomakatʼ, onako ńitokʼ nijakʼ atorehõ udugme.’ ”

24 # Jhn 4.44 Uni do arhõe menkeda, “Sạrigeń metapekana, okoe nạbi hõ acʼakʼ nij atoren hoṛ do bako monewaea. 25#1 Raj 17.1 Eliại tahẽkan oktere pe bochor turui cando bae dakʼleda ar goṭa disạmre maraṅ akal hoylena, unre Israel disạmre ạḍi utạr rạnḍi maejiuko tahẽkana. 26#1 Raj 17.8-16 Menkhan onko okoe ṭhen hõ Eliạ do bae kol ocolena, eken Sidon ṭoṭha reakʼ Sareptaren rạnḍi maejiu ṭhengeye kol ocolena. 27#2 Raj 5.1-14 Elisa nạbi oktere Israel disạmre aema murhucʼ jom rog hoṛko tahẽkana, menkhan onko do okoehõ bako boge ocolena, Eken Siriạ disạmren Naman motogeye boge ocoyena.”

28Noako katha ańjomkate sunạgogren sanam hoṛko do edrete pit caṛhaoatʼkoa. 29Onko do beretʼente ato bahrete Jisuko oḍok ạgukedea ar buru latarte ṭhelao ńurhạye lạgitʼ coṭ cuṛateko idikedea. 30Menkhan uni do hoṛko talateye sen tapʼ calaoena.

Besapha jiu menaetae hoṛe bogeyede

(Mark 1.21-28)

31Ado Gạlil Prodes reakʼ Kapharnạhum nagrahateye calaoena ar jirạukʼ mãhãre hoṛkoe cetʼ atʼakoa. 32#Mat 7.28,29 Ar hoṛko do uniyakʼ cecetʼakʼteko hahaṛa cabayena, ente uni do ektiạri menakʼtae hoṛ lekae cetʼakokan tahẽkana.

33Ona sunạgogre bhut capaṛ akawade mitʼṭen hoṛe tahẽkana. Uni do ãṭ aṛaṅte hohowateye menkeda, 34“E Nasaretren Jisu, ale tulucʼ amakʼ do cetʼ? Ale maraole lạgitʼem hecʼakana? Baḍaegeạń okoe kanam mente; am do Isorren uni sonoticʼ kanam.”

35Jisu do bạṛjicʼ jiu dhomkao kedeteye metadea, “Thirokʼme ar uni khon oḍok calakʼme.” Unre bạṛicʼ jiu do onko talare uniye mocṛao bhindạṛkedea ar jãhãnakʼ begor hạ̃nete uni khone oḍok calaoena.

36Noa iạte jotogeko hahaṛayena ar ako akore menjoṅko ehopʼena, “Noa baṅ oka lekan katha kan! Uni do ektiạri ar daṛe salakʼ bạṛicʼ jiukoe hukumako kana ar onko doko oḍok calakʼkana!” 37Ar ona ṭoṭha reakʼ joto jaegare Jisuakʼ katha do pasnao idiyena.

Jisu do dukhạlikoe bogeyetʼko

(Mathae 8.14-17; Mark 1.29-34)

38Inạ tayom Jisu do sunạgog bạgikate Simonakʼ oṛakʼteye calaoena. Unre Simonren hanhartetʼ do ruạteye jạbun akan tahẽkana. Ar uni bogeye lạgitʼ Jisuko nehõradea. 39Unre Jisu do Simon hanhartetʼ pheḍre teṅgokate ruạye dhomkaokeda. Ar inạtege ruạ do chuṭạuentaea, ar beretʼkate uni do jomakʼ sapʼsorakoe ehopʼena.

40Ado bere hạsurokʼkan tahẽkanre aema lekan rugiko Jisu ṭhenko ạguketʼkoa. Onko do ạḍi lekan rogteko jạbun akan tahẽkana. Ar Jisu do onko sanamko capokateye bogeketʼkoa. 41Unre ạḍi utạr hoṛko khon bạṛicʼ jiuko oḍok calaoena. Onko bạṛicʼ jiu do kikiạuate memenko ehopʼena, “Am dom Isorren Hopon kana.” Onko do Mạsi kanae menteko baḍae akade tahẽkana. Ona iạte uni do onkoakʼ mocae bondketʼtakoa.

Jisu Sunạgogreye porcaretʼkan

(Mark 1.35-39)

42Ado ạḍi setakʼre oḍok senkate Jisu do mitʼṭecʼ nisun jaegateye calaoena. Ar hoṛko do uniko sendra ńamkede khan ako ṭhen khon aloe calakʼa menteko doho dohokadea. 43Unre Jisui metatʼkoa, “Iń do arhõ aema jaegakore Isorakʼ raj reakʼ bhage sombat porcar hoyokʼtińạ, ente noa lạgitʼge Isor doe kol akadińạ.”

44Ona tayom uni do Jihudạ disạm reakʼ eṭakʼ eṭakʼ sunạgogkore porcare ehopʼena.

Currently Selected:

Luk 4: SBT

Highlight

Copy