Mark 13
13
Jug reakʼ mucạtʼ dinko
(Mathae 24.1,2; Luk 21.5,6)
1Ado Jisu mundil khone oḍok calakʼkan tahẽkanre acʼren mitʼṭen cela do uniye metadea, “E Guru, ńelme, tinạkʼ lạṭu lạṭu dhiri ar tinạkʼ mońj mońj dolanko!”
2Jisu do uniye metadea, “Am ma noako lạṭu lạṭu dolanem ńeletʼkan, menkhan noa reakʼ mitʼṭecʼ dhiri hõ ar mitʼ dhiri cetanre baṅ tahena; joto do rạputʼ giḍi ocokʼa.”
Kosṭo ar santao reaṅ
(Mathae 24.3-14; Luk 21.7-19)
3Jisu do mundil samaṅ senakʼ Joitun burureye duṛupʼ akan tahẽkanre Patras, Jakob, Johan ar Andreasteko do hape hapete hecʼkate uniko kulikedea, 4“Lạiyaleme, noako do tis hoyokʼa? Ar okalekan cinhạko ńeltele bujhạu daṛeakʼa noako purạukʼ lạgidokʼ ghuṛi do seṭer akana mente.”
5Jisui metatʼkoa, “Ńelpe, okoe hõ jemon aloko bulạupe. 6Ente ḍher hoṛge iń ńutumte hecʼkateko mena, ‘iń kangeạń uni do,’ ar aema doko bulạu ocokʼa. 7Ape do lạṛhại reakʼ saḍekope ańjomlere alope bilbilạukʼa. Noako do hoyokʼgea, menkhan unrehõ mucạdokʼ okte do baṅkana. 8Mitʼ jạtko do eṭakʼ jạtko upạrte, ar mitʼ rajosṭi do eṭakʼ rajosṭi upạrteko lạṛhạiya; ar aema jaegare dhạrti laṛaokʼa ar akal hoyokʼa. Menkhan noako do eken saset reakʼ etohopʼ kana.
9 #
Mat 10.17-20; Luk 12.11,12 “Sontor akan tahenpe. Maraṅ bạisiren hoṛko ṭhenko soprotpea ar sunạgogkoreko dalpea. Iń iạte disạm cakʼlaoko ar rapajko samaṅre teṅgokʼ hoyokʼtapea; ar onko samaṅre iń reaṅ goha emokʼ hoyokʼtapea. 10Sanam jạt jạtrenko ṭhen Isorakʼ bhage sombat do porcar maṛaṅ hoyokʼa. 11Ar bicạr lạgitʼko sapʼ idilepere laha khon alope bhabnakʼa cetʼko roroṛ hoyokʼtapea mente. Ona jokhecʼ oka kathape lại ocokʼ, onage roṛpe, ente apege roroṛ hoyokʼtapea ona do baṅ bickom sonot Jiugeye roṛa.
12“Boeha do boehatetʼe soprotea, apat do hopontetʼ gocʼ ocoye lạgitʼe sapʼocoyea. Gidrạko do go-baba upạrteko teṅgona arko khũn ocokoa. 13#Mat 10.22 Iń iạte sanamkogeko hirkhạwapea, menkhan mucạtʼ hạbicʼ okoeye ṭarhao tahen uni do bańcaoe ńama.
Ujạṛ utạrakʼ hirkhạwakʼ
(Mathae 24.15-28; Luk 21.20-24)
14 #
Dan 9.27; 11.31; 12.11 “Ar ujạṛ utạrakʼ hirkhạwakʼ okare tahen baṅ ganokʼ, ona tinre onḍe tahẽ akanpe ńela (Paṛhaoicʼ doe moneyakʼma) unre Jihudạre tahenko do buruteko ńir joṅma. 15#Luk 17.31 Chatre menaeicʼ do jãhãnakʼ oḍok idi lạgitʼ aloe pheḍokʼma ar oṛakʼte aloe bolokʼma. 16Baṛgere menaeicʼ hõ oyonakʼ ạgui lạgitʼ aloe ruạṛma. 17Unre bhạrti hoṛmoanko ar okoe gidrạko nunuwako kan onkore do hae hae! 18Koejoṅpe, jemon rabaṅ dinre noako alo hoyokʼ, 19#Dan 12.1; Sod 7.14 ente unre nonkan santaoko hoyokʼa one oka do dhạrti sirjạu khon ńit hạbicʼ baṅ hoyakan ar ona tayom do ar baṅ hoyokʼa. 20Probhu Isor do onako din bae khaṭo ocole khan okoe hõ ohoko bańcao daṛekokʼa. Menkhan Isor do acʼren bachao akan hoṛko lạgitʼ ona dinkoe khaṭo akada. 21“Unre jãhãegeko metape, ‘ńelpe, Mạsi do nonḍe menaea,’ se ‘hanḍe menaea,’ alope pạtiạuakʼa; 22ente eṛe Mạsi ar eṛe nạbikoko upelokʼa ar maraṅ maraṅ hahaṛa kạmi ar cinhạkoko uduga, hoydaṛeakʼ khan Isorren bachaoko hõko bulạu daṛeakoa. 23Menkhan ape do sontor akae tahenpe. Ńelpe, laharege jotowakʼ iń lại dohowatʼpea.
Manwa hopon reakʼ seṭerokʼ
(Mathae 24.29-31; Luk 21.25-28)
24 #
Jes 13.10; Joe 2.10,31; 3.15; Sod 6.12;
Jes 13.10; Jeh 32.7 “Ona okte reakʼ santao tayomge siń cando doe ńutokʼa, ar ńindạ cando do bae terdeja, 25#Jes 34.4; Sod 6.13; Joe 2.10 Ipilko serma khonko ńurokʼa, siń cando, ńindạ cando ar ipilko do bako ṭarhaokʼa. 26#Dan 7.13; Sod 1.7 Unre hoṛko do Manwa Hopon maraṅ daṛe ar ṭhonokante rimilte hijukʼkanko ńelea. 27Uni do acʼren serma goḍetkoe kolkote dhạrti reakʼ mitʼ mucạtʼ khon eṭakʼ mucạtʼ hạbicʼ ponon secʼ khon Isorren sanam bachao akan hoṛkoe jarwa mitʼkoa.
Loa dare khon cecetʼakʼ
(Mathae 24.32-35; Luk 21.29-33)
28“Loa dare ńelte cetʼ joṅpe. Ente ona reakʼ dạrko balekate sakam sagenlen khanpe baḍae daṛeakʼkana, lolo din do seṭer akana. 29Onkage noako hoyokʼkanpe ńellere bujhạupe, Manwa Hopon doe seṭer akana, hẽ; duạr ṭhengeye teṅgo akana. 30Sạrigeń metapekana, noako hoylenre hõ niạ piṛhiren thoṛa hoṛ do bańcaoko tahena. 31Serma ar dhạrti do cabakʼa menkhan ińakʼ kathako do jaejug hạbicʼ tahena.
Din ar okte reakʼ do okoe hõ bae baḍaea
(Mathae 24.36-44)
32 #
Mat 24.36
“Ona din ar ona okte reakʼ katha do okoe hõ bako baḍaea, sermaren goḍetko hõ baṅ, ar Hopon hõ baṅ, eken Babageye baḍaea. 33Ape do sontor akan tahenpe, jagwar tahenpe ar koejoṅpe, ente bape baḍaea oktetetʼ do tiskan coṅ. 34#Luk 12.36-38 Ona din do nonkan mitʼṭen hoṛ lekana okoe do eṭakʼ disạmteye calao lạgidokʼkan. Ar oṛakʼe bạgiyakʼ jokhecʼ acʼren gutiko joto lekan dạyike em baṛawatʼko. Ar apan ạpin kạmikoe batlao baṛawatʼkote horhoicʼ do jagwar akae tahene men oṭowadea.
35“Ape hõ onkage jagwar akae tahenpe, ente oṛakʼren mạlik baṅ do ạyupʼ, baṅ do tala ńindạ, baṅ do simrakʼ okte, baṅ do setakʼ jokhecʼe hijukʼkan ona do bape baḍaea. 36Uni do ackage hecʼkate jạpitʼ akatʼ jemon bae ńampe. 37Okaṭakʼ iń metapekan ona do sanamkoń metakokana, jagwar akae tahenpe.”
Currently Selected:
Mark 13: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
