Mark 4
4
Mitʼṭen casa hoṛakʼ phen
(Mathae 13.1-9; Luk 8.4-8)
1 #
Luk 5.1-3
Jisu do arhõ Gạlil doreão aṛere hoṛko cetʼakoe ehopʼena. Ar acʼ beṛhaete ạḍi utạr hoṛko bhiṛkeda; onate uni do doreãore mitʼṭecʼ lạukạre decʼenteye duṛupʼena ar gadel hoṛ do ghuṭureko teṅgo tahẽyena.
2Uni do phenkote ạḍi okocʼakʼko reaṅ cetʼatʼkoe ehopʼena. Uni doe metatʼkoa, 3“Mitʼṭen casa hoṛ do itạ erokʼ lạgitʼe oḍok calaoena. 4Ado erokʼ jokhecʼ adomakʼ itạ do hor aṛere ńurena, ar cẽṛẽko hecʼkate onako halaṅ jomkeda. 5Ar adomakʼ itạ do dhiri hasare ńurena. Menkhan onḍe dạriạ hasa baṅ tahẽkana. Ar dạriạ hasa baṅ tahẽkante itạ do usạrate janam rakapʼena. 6Ado siń candoe rakapʼen khan onako do tolmocʼ cabayena ar mońjte baṅ rehetʼlente rohoṛ kạrcupʼena. 7Adomakʼ itạ do jạnumko talare ńurena. Ar jạnumko hara idiyen khan onae jhurkeda, ar onate baṅ gele belelena. 8Menkhan thoṛa itạ do bhage hasare ńurente janamkate harayena ar gele beleyena, adom do pegel doboṛ, adom do turui gel doboṛ, ar adom do mitʼ sae doboṛ phosole hoyocokeda.”
9Ado mucạtʼreye menkeda, “Ańjom lạgitʼ lutur menakʼtae hoṛ doe ańjomma.”
Phen lại reakʼ monsubạ
(Mathae 13.10-17; Luk 8.9,10)
10Ado bhiṛ komaoen khan acʼren gelbar celako ar beṛhaeten hoṛko do ona phen reakʼ maneko kulikedea. 11Jisui metatʼkoa, “Ape do Isorakʼ raj reakʼ sạri okoakʼkope baḍae ocoakana, menkhan eṭakʼko ṭhen do phen talate lạiyạgokʼ kana, 12#Jes 6.9,10 (LXX) sonot sostor reakʼ katha leka,
‘ńeńel doko ńeńelgea menkhan bako oroma,
ańjom doko ańjomgea, menkhan bako bujhạua.
Jemon aloko ạcurokʼ ar alo ikạkʼtako.’”
Casa hoṛakʼ phen reakʼe bhoṅetʼkan
(Mathae 13.18-23; Luk 8.11-18)
13Ona tayom Jisui metatʼkoa, “Noa phen reakʼ mane do cetʼ bape bujhạuleda? Enḍekhan eṭakʼ phenko reakʼ mane do cekatepe bujhạua? 14Casa hoṛ oka itại erketʼ ona itạ do Isorakʼ katha kana. 15Ar hor aṛere ńuren itạte do nonkanko reaṅge roṛ akana okoe do ona kathako ańjomketʼ, menkhan Soetan do hecʼkate unrege onkoakʼ ontorre erakan kathakoe halaṅ ạtkira. 16Ar dhiri hasare ńuren itạte do onko reaṅge roṛ akana okoe do ona katha ańjomkate, unrege rạskạ seletʼko ataṅetʼkan, 17menkhan onkore mońjte rehetʼ baṅ bạisạukʼkante eken thoṛa din lạgitʼko ṭarhao tahenkana. Ente ona katha khạtirte tinre santao ar khedreko paṛaokʼkana unre onko doko pạcokʼkana. 18Jạnumko talare erlen itạte do onko reaṅge roṛ akana okoe do ona kathako ańjomketʼ, 19menkhan gharońj reakʼ dạndi, ar dhon reakʼ mãyã ar emanteakʼ laloc hecʼakokante onko do onako ten loṭomkakʼ kana; 20ar onate onkore jãhãn jo do baṅ jokʼ kana. Ar bhage hasare ńuren itạte do onko reaṅge roṛ akana okoe do ona katha ańjomkateko ataṅetʼkan arko jokʼ kan. Okoe do pegel doboṛ, okoe do turui gel doboṛ, ar okoe do mitʼ sae doboṛ.”
Marsal reaṅ
(Luk 8.16-18)
21 #
Mat 5.15; Luk 11.33 Jisu do arhõe metatʼkoa, “Jãhãege diuhe jeretʼkate cetʼ khạclạkʼ se cạuki latarreko dohoygea? Ona do cetʼ diuhe dohowakʼ cetanre bako dohoya? 22#Mat 10.26; Luk 12.2 Jãhãnakʼge danaṅ tahen ona do sodorokʼ lạgitʼge danaṅ tahena; arhõ jãhãnakʼge poṭom tahen ona do oṭag lạgitʼge poṭom tahena. 23Ańjom lạgitʼ lutur menakʼtae hoṛ doe ańjom ma.”
24 #
Mat 7.2; Luk 6.38 Ona tayom Jisui metatʼkoa, “Okaṭakʼpe ańjometʼkan ona reaṅ luturakʼpe. Oka sosoṅakʼtepe soṅa, inạtege ape hõko soṅapea; arko em juṭucʼapea. 25#Mat 13.12; 25.29; Luk 19.26 Okoeyakʼ menakʼtae uni do arhõe emocokʼa, menkhan okoeyakʼ bạnukʼtae uni do oka menakʼtae ona hõe recʼ ocokʼa.”
Phosol reakʼ phen
26Jisu do arhõe metatʼkoa, “Isorakʼ raj do nonka lekana: one mitʼṭen hoṛ do otre itạye erketʼ. 27Uni do siń ar ńindạ gitijokʼ ar beredotʼte okteye khemaokeda. Ar inạ oktere itạ do janamkate harayena, menkhan cekate hoyena uni do bae baḍaelakʼa. 28Hasa do acʼtege phosole janam ocokeda, pạhil do gạchi, ona tayom gele ar gelere do danage. 29#Joe 3.13 Ado phosol beleyen khan uni do datrome calaokeda, ente phosol samṭao okte do hoyena.”
Tuṛi jaṅ reakʼ phen
(Mathae 13.31-35; Luk 13.18,19)
30Ona tayom Jisui metatʼkoa, “Isorakʼ raj do cetʼ sãote bon jurikea? Oka lekan phen hotete ona doń bujhạu ocoya? 31Ona raj do mitʼṭecʼ tuṛi jaṅ lekana. One oka do joto itạko khon huḍiń utạrge. 32Menkhan haralen khan do joto aṛakʼ sakamko khon napṛakʼge hoyokʼa, ar nunạkʼ maraṅ maraṅ ḍạrko hoyokʼa je, coṭren cẽṛẽko hõ ona reakʼ ḍạrkore tukạko benaojoṅa.”
33Nonkage Jisu do arhõ ạḍi utạr phenkote Isorakʼ kathakoe galmaraoako kan tahẽkana. Ar tinạkʼ ganko bujhạu daṛeakʼkan tahẽkan inạkʼgeye lại akokan tahẽkana. 34Phen chaḍa uni do bae cetʼakokan tahẽkana, menkhan celako acʼ sãote eskarko tahenre jotowakʼe bhoṅako kan tahẽkana.
Birbão hoeye thirocoyetʼ
(Mathae 8.23-27; Luk 8.22-25)
35Enhilokʼ ạyupʼen khan Jisu do acʼren celakoe metatʼkoa, “Dela, doreão hanasate bon parom calakʼa.”
36Unre celako do gadel hoṛko bạgiyatʼkote Jisu okaṭakʼ lạukạreye tahẽkan ona lạukạtege uniko idi torakedea. Menkhan onḍe do arhõ eṭakʼ lạukạko tahẽkana. 37Ado lạukạ calakʼkan tahẽkanre mitʼṭecʼ maraṅ birbão do hecʼgotʼena ar ḍheoko nunạkʼ ãṭ chilkạu bolokʼkan tahẽkana, onate lạukạ do dakʼte perejokʼ ehopʼena. 38Unre Jisu do lạukạ reakʼ tayom secʼre bạlisre bohokʼateye jạpitʼ akatʼ tahẽkana. Khange celako do beretʼ kedeteko metadea, “E Guru, abo bon gujukʼkan do cetʼ bam hetawakʼ kana?”
39Jisu doe beretʼena ar birbãoe dhomkaoketʼte doreãoe metatʼa, “Thirokʼme ar hapekʼme,” Onate hoe do thirgotʼena ar jotowakʼ ḍel ḍel nijhumena.
40Ado celakoe metatʼkoa, “Cedakʼpe botorokʼ kana? Cekate biswạs do bạnukʼtapea?”
41Noate celako do ạḍi bạṛicʼko botorena ar ako ako talare memenko ehopʼena, “Nui doe okoekante hoe hõ hoe ar doreão hõ doreãokin bataoetʼtaea?”
Currently Selected:
Mark 4: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
