Yoa 7
7
Bobenyañ be Yésus be nji buni nye
1E mvuse mame ma, Yésus a nga ke a lôtan e Galilé; a nji fe kômbô wulu e Yudé amu Beyude be mbe be jeñe na be wôé nye. 2Valé étôkan Beyude ba loone na bibem é nto bebé, 3e nde bobenyañe bé be nga jô nye na: Kôlô'ô mu, ô ke Yudéa, beyé'é bôé be yene ñhe fe e mame wo bo. 4Amu na, môt éziñ a se ngule ya bo jam asoé nge a jeñe na a yené; e vôme wo bo e mame ma, liti'i womiene bôt. 5Bobenyañ be mbe fo'o teke buni nye. 6E nde Yésus a nga jô be na: Eyoñ jam é ngenan te kpwaan, ve éyoñ jenan é ne nkôman kom ése. 7Bôte ya *si nyô be se ngule ya siñe mia, ve ba siñe ma, amu ma tyi'i mva'a na mimboone miab mi ne *abé. 8Mfa'a wônan, betan, mi ke abôk; ve mfa'a wom maa ye ke tame bet a ke abô'ô te, amu éyoñe jam é ngenane te kpwaan. 9Eyoñ a maneya kobô nalé, ane nye a nga li'i a too e Galilé.
Yésus a ne abô'ô bibem
(Lv 23:34-43)
10Ake bobenyañ be nga mane ke abôk, ane nye fe a nga téé a ke, sa éngengeñ, ve aval ane asoé. 11Beyude be nga ke ñhe ba jeñe nye abôk été be jô'ô na: A ne vé' 12Abui menyiñ e nga bo ñhe e bôte bôt ajô dé. Bevo'o be jô'ô na a ne mbamba môt, ba bevo'o na, teke'é, a viane yale bôt zene fe. 13Ve môt éziñ teke kobô ajô dé bôte be wô'ôk amu be ko Beyude woñ. 14Eyoñ abô'ô e nto ézezañ, ane Yésus a nga a zu nyiin e Nda Zambe, a nga ye'ele bôt. 15E nde beyude be nga semé be jô'ô na: Z'avale ñyemane môte nyô a yeme mintilane di, nye teke mie ye'é! 16Ane Yésus a nga nyoñe nkobô a jô na: Miñye'elane miam mi nji bo émiam, ve mi mi môt a nga lôme ma. 17Nge môt éziñ a kômbô bo nkômbane wé, a ye yem a miñye'elan, nge mia so be Zambe, nge ke na ma kobô ajô dame mamien. 18E môt a kobô ajô dé émien, a jeñe fe ve duma dé émien; ve nyô ki a jeñ duma môt a nga lôme nye, e nye a ne bebela, a ékotekot éziñ é nji bo be nye. 19Ye sa Môze nye a nga ve mia metiñ? A teke môt éziñe ya be mia a bo ane metiñ mete ma jô. Amu jé mia jeñe na mi wôé ma' 20E nde bôt be nga yalane na: Mbia *nsisim a bili wo, za a jeñe na a wôé wo' 21Ane Yésus a nga nyoñe nkobô, nyee be na: Me nga bo ve jame da, nde mia bese mia semé. 22Mbôl Môze a nga ve mia *atiñ ntyi'an atyel, akôsa bo e nji so be Môze, e nga so e be bôbetô, e nde mia tyi'i môt atyel ja'ane e môse Sabat. 23Nge môt a tyi'iban atyel e môse Sabat, a nji tyam atiñe Môze, ve amu jé mia viane wô'ô ôlun a yaa ma amu na ma ke bo ngumba môte *mvo'é e môse Sabat! 24Te mia tyi'i mejô e ñyenane ya mis, ve tyi'ane mejô *zôsôô ntyi'an.
Ye nyuna a ne Krist
25Bôte ya Yérusalém bevok be nga jô na: Ye sa môte nyuna nye ba yi na be wôé' 26Ke mia yen ane a kobô éngengeñ, be teke nye jô jôm. Ye bejôô nlam be yemeya bebela na e nye a ne Krist' 27E môte nyô bia kôme yem e mfa'a a so; ve Krist kik, éyoñ a ye so, teke'e môt a ye yem e mfa'a a so. 28Ane Yésus a nga yôtan, a ye'ele'e bôt e Nda Zambe été, a jô na: Ma fo'o mia yem, mi yeme fe mfa'a ma so; ve me nji so asu dam mamien; amu môt a nga lôme ma a ne bebela, e nye mi nji yem. 29Ma ma yeme nye, amu ma so be nye, a e nye a nga lôme ma. 30Bôte be nga jeñe ñhe na be bi nye, ve môt teke futi nye mo e nyôl, amu awolo dé e ngenane te kpwaan.. 31E nkunda bôt été va, abui e nga buni nye, be jô'ô na: Krist émien, éyoñ a ye so, ye a ye bo bitua bi mam bia dañe e bi môte nyuna a boya!
B'ôkeminlôman ba ke bi Yésus
32Eyoñe Befarizieñ be nga wô'ô nkunda bôt wo ke wo nyiñe mame mete, ane bivet Betuni a Befarizieñ be nga lôme bôte na be bi nye. 33E nde ñhe Yésus a nga jô na: Me ngenane ve mon étun éyoñ, bia be mia, me bulan e be môt a nga lôme ma. 34Mia ye jeñe ma, teke yene ma, a e vôme ma ye tabe, mi se ngul ya zu wôé.. 35Beyude be nga ke ba kobô zañe jab na: E môte nyô a kômbô ke avale vôm avé na bi bo te yene nye? Ye a zu ke e be ba be nga mane mialan e be, Begrék, a tame fe ke ye'ele Begreek' 36Jé é ne avale nkobô a kobô di na, Mia ye jeñe ma, mi teke yene ma, a na, e vôme ma ye tabe, mi vo'o zu wôé'
Asôé bevevee mendim
37E môse wo su'ulan, e ñwô wo dañe beta môse ya Abôk, ane Yésus a nga kôlô si a yôtane na: Nge môt a wô'ô évé, a za'a be ma a zu nyu. 38E môt a buni ma, aval ane Ntilane wo jô: Asôé mendime ma ve ényiñ da ye kui nye abum été. 39Ve a nga jô nalé a kobô'ô ajô ya Nsisim bôte ba buni nye ba ye nyoñ. Valé Nsisimi a ngenane te bo, amu éyoñ éte Yésus a ngenane te nyoñe duma.
Bôt ba kandane zañ ajô Yésus
40E nkunda bôt été va, éyoñe bôte be maneya wô'ô mame ma, be nga ke ba jô na: E môte nyô a ne fo'o *nkulu mejô bebela. 41E bôte bevo'o na: E môte nyôna nye a ne Krist, e ba bevo'o ke na, ye Krist a ne so e mfa'a ya Galilé' 42Ye Mintilan mi nji jô na Krist a ye so e mvoñe bôte David, e Bétéléhém, nlame David a nga too' 43Ane bôt be nga kandan a bo metyiñ metyiñ ajô dé. 44Bevo'o ya été be nga jeñe na be bi nye, ve môt éziñ teke bete nye mo nyôl. 45E nde ñhe bekeminlôman be nga bulan e be bivet betuni a Befarizieñ, ane be nga jô bôte bete na: Amu jé mi nji soo nye' 46E nde be nga yalane na: Môt éziñ a ngenane te yeme nkobô avale ane môt ate. 47Ane Befarizieñ be nga yalane be na, ye mia fe mi maneya du'uban' 48Za éziñ ya betebe ôsu nge Befarizieñ a buniya nye' 49Ke fo'o ve zezé babôtô a ne te yeme metiñe nyô, mbe be ne biyo'é. 50Eyoñe te Nikôdem, e môt a nga tame taté ke be Yésus ôsusua, a too fe wua ya be be, a nga jô be na: 51Ye metiñe mangan me ne tyi'i ajô môt, te taté wô'ô nkobô wé a yeme jam a nga bo' 52Be nga yalane nye na: Ye wo fe ô ntoo môte ya Galilé? Tame tu'a fas ô yene na *nkulu mejô a ne teke so e Galilé.
Minga mejian
(Besam 50:16-21; Berôm 2:1-3, 17-23)
53E nde be nga téé môt ase a kele *nda jé.
Currently Selected:
Yoa 7: BDCB
Highlight
Share
Copy
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.
