Lk 11

Meye'elan me Nti

(Mt 9:13)

1Yésus a mbe a ye'ela'ane *môs éziñ e vôm éziñ. Eyoñ a nga man, wua ya beyé'é bé awôm a mebaé a nga jô nye na: A Nti, ye'ele'e bia ane bi ye'elan, avale Yôanes a nga ye'ele beyé'é bé. 2A nga jô be na: éyoñ mia ye'elan, jô'ane na:

A Esaa!

E jôé dôé e bo'o étyi;

éjôé jôé é za'ak!

3Va'a bia bidi biangan ya *môs ôse.

4Jamé'é bia e mam *abé mangan, amu bia fe bia

jamé e ba bese ba bo bia abé;

a te bo bia na bi ku e *mebôbela'a été.

Mengaka'a ma tôñe meye'elan

(Mt 7:7-11; Lk 18:1-8; Yak 1:5-7; 1Yo 5:14-15)

5A nga beta jô be na: e *mbé ya be mia a ye bi mvôé ja ye ke be nye e zañ alu asu ya jô nye na: a mvôé jam, kôlé'é ma belet élaa, 6amu wua ya bemvôé bam a te kui be ma a so'o dulu, a me nji bi jôme ya ve nye' 7Nge môte mbok a yalane nye e *nda été na: Te ndeñele ma, *mbé ô ntoo ndiban, bia be bone bam bi bômbeya si, me se fe nguleya kôlô si na me ve wo belet, 8ma jô mia de na: to'o a nji kôlô si asu ya ve nye je a mu na a ne mvôé jé, a ye kôlô si amu éndeñela'a jé a a ye ve nye e jôm ése a kômbô. 9A ma ma jô mia na: Jaka'an a ba ye ve mia; jeñan, a mia ye yen; kutane *mbé a ba ye diine mia wô. 10Amu nyô ase a ja'é a nyoñ, nyô a jeñ, a yen a nyô a kute *mbé, ba dii nye wô. 11Esaa *mbé ya be mia, nge monafame wé a sili nye belet, a ye viane ve nye akok? Nge na nge a sili nye kos a ye viane ve nye nyo éjiane kos' 12Nge na nge a sili atyi kup, a ye viane ve nye kata ôlet' 13Nge mia mi ne mbia be bôt mia yeme ve bone benane mbamba be biôm, kô fé Esaa a ne yôp a ye dañe ve Mfufube Nsisim e be ba ba sili nye nye.

Mvumvu'u mbe'e mbia *nsisim wo saéban

(Mt 12:22-45; Mk 3:22-30; Mt 9:32-34)

14Yésus a mbe a saék mvumvu'u mbe'e mbia *nsisim. Eyoñe mbia *nsisim ô nga kui atan, e nde mvuvu'u ô nga kobô, a bizu'u bi bôt bi nga semé. 15Ve bevo'o be nga jô na: A vaa mimbia minsisim a ngule njôô mimbia minsisim. 16Ba bevo'o ki, asu ya ve'ele nye, be nga sili nye e ndem éziñ ja so yôp. 17Mbôlô a mbe a yemek asimesane dap, a nga jô be na: éjôé ése é ne nkaban é wosa'an ébien ja dilibane bita a menda mé ma ku si jia é betebe'e nyô fo'o yôp. 18Ajô te ñhe nge Satan a kandane zañ a wosan émien éjôé jé ja ye tebe aya mbôlô mia jô na ma titane mimbia minsisim a ngule njôô mimbia minsisim' 19A nge ma ma titane mimbia minsisim a ngule njôô mimbia minsisim wôna bone benan ba titane mie a ngule fé? Amu ajô te bebiene ba ye bo betyi'i mejô benan. 20Ve nge ma ma titane mimbia minsisim a e wo Zambe, wôna éjôé Zambe é siseya ñhe a kui be mia. 21Eyoñe môt a ne ngu a bili fe mengaa abime da yian a ba'ale éfuse si jé, akume dé e ne tek'atyelé nleme yôp. 22Ve nge nyô a dañe nye ngul a so atemetem a dañe nye, a mane wôlé nye mengale mese a too me ndi a mane kabe biôme a te wôlé nye. 23Nyô bia nye bi nji bo nsamba a ne ma e ngame yat, a nyô bia nye bi nji kôane biôm a tyamelane bie.

24Eyoñe mbia *nsisim a kôlôya be môt, a tulane mevôm me ne ayet, a nga jeñ awo'on, a amu a nji yene de, nye na: Ma ye bulan e *nda jam e vôme me nga kôlô; 25a éyoñ a kuiya, a koone je mvosan a nkôman. 26Wôna a ke a nyoñe minsisime mife zamgbwa mia dañe nye *abé, mi ve nyiin a tabe valé, a été môt ate a zu su'ulane tebe ve zu dañe ji y'ôsu *abé.

27Yésus a ngenan a kobô'ô nalé, minga éziñ ve bete *tyiñ ézezañe bôt a jô nye na: Ebotan a abum e nga be'e wo a mebé me nga nyaa wo! 28Ve a nga yalane na: ébotan é viane'e ñhe bo e be ba ba wô'ô mejô me Zambe a bo me!

Yésus a bene bo étua jam

(Mt 12:38-42; Mt 16:1-4)

29Bôt be mbe be sula'ane beta nsamba, e nde a taté na a jô be na: e miaé bôte wu ô ne mbia miaé; wo jeñe ndem; e ndem ja ye vebane be je é ne fo'o ve nyô Yôna. 30Amu avale Yôna a mbe ndem e be bôte ya Ninive, avale te fe Mona Môt a ye bo ndem asu miaé wu. 31Njô bôte minga ya jôp da tôô a ye kôlô si, baa be bôte ya miaé wu a ve be mekua éyoñe ntyi'ane mejô, amu a nga so e meku'u ya si na a vô'ôlô e fe'e Solômon, ve yene na môt a dañe Solômon a ne va. 32Bôte ya Ninive ba ye tebe éyoñe ntyi'ane mejô baa be bôte ya miaé wu a ve be mekua, amu be nga kôñelane minlem e nkobane mejô me Zambe Yôna; ve yene na e môt a dañe Yôna a ne va.

Nkana lambe

(Mt 6:22-23; Mt 5:15; Lk 8:16-18)

33Môt éziñ a nji bo'é lambe asu ya telé nye asoé nge éwolo si, ve ba telé nye ételé lambe yôp, ndembene ba ba nyiine *nda ba ye yen éfufup. 34Dise dôé é ne lambe ya nyôle jôé. Eyoñe dise dôé e ne *mvo'é, nyôle jôé ése fe é ne éfufub été; ve nge é ne *abé, e nyôle jôé fe é ne e dibi été. 35Tabe'e ñhe ntyele na éfufup é nee be wo é bo te bo dibi. 36Nge nyôle jôé ése é ne ñhe éfufub été, teke ébu'a éziñ e dibi été, ése ja ye bi éfufup aval ane éyoñe lambe a faé wo éfufube jé.

Yésus a ve Beyem bekalate a Befarizieñ mekua

(Mt 23:1-36; Mk 7:1-16)

37Yésus a kobô'ô, e nde Farizieñ éziñ a ye'elane nye na a di be nye. A nga nyiin a tabe tawôlô. 38Farizieñ a nga yen a kamek na a nji ke sôbe mo te na a di. 39Ve Nti a nga jô nye na: Mia, Befarizieñ, mia fubu *élaé a ésua atan, ve éfase y'été, mi ne njalan a mbia be mam a *abé. 40A bôt be ne *te fek! Nyô a nga bo atan ye saa e nye fe a nga bo été' 41E mvolan ô va'aba'an ataté e *nlem été, a biôm bise bia ye bo *mfuban asu denan.

42Ve ngo'é mia Befarizieñ! Amu mia ya'ane *ngab awômô ya biôme mevale meva, ve mia biasé *zôsôô a nye'ane Zambe: e jam mi nga yiane taté bo e nde le, teke vaa ma ma li'i.

43Ngo'é mia Befarizieñ! Amu mia nye'e éto y'ôsu e meba me Zambe, a mebatan e mevôme bôt ba sulan.

44Ngo'é mia! Amu mia funane mesoñ me ne tee ndem a e mme bôt ba wulu yôp teke yeme nalé.

45Wua ya beye'ele metiñ a nga nyoñe nkobô a jô nye na: éyoñe wo jô nalé a Nye'ele, bia fe wo bo bia *abé. 46Yésus a nga yalane na: Ngo'é mia, beye'ele metiñe fe! Amu mia beté bôt mimbe'e mi ne ayaé ya be'e, e mie miabebien mi nji nnambe a soso'o anyu.

47Ngo'é mia! Amu mia lôñe mesoñe bekulu mejô, ve e too na beésoo e mbe be nga wôé be. 48Ajô te mi ne bengaa a mi ayebe mimboone beésoo, amu mfa'a wop, be nga wôé be a mia mia lôñe mesoñe map! 49Ajô te fe'e Zambe é nga jô na: Ma ye lôme be bekulu mejô a minlôman; ba ye wôé be a kpwe'ele be. 50Ajô te sito'o a ye siliban e be miaé bôte wu ajô metyi bekulu mejô mese me nga sôéban ataté éyoñ émo é nga téban. 51Ataté metyi m'Abél a kui e ma me Zakari, nyô a nga wôéban e zañe ata'a metuna'a a Nda Zambe; Yaa, ma jô mia de na: Sito'o y'été a ye siliban e be miaé bôte wu.

52Ngo'é mia beye'ele metiñ, amu mi nga vaa édiba'a ñyemane mam, miabebien mi nji ke nyiin été, a mi nga kamane ba be nga kômbô nyiine na be bo te nyiin.

53Eyoñ a nga kôlô valé, *beyeme bekalate a Befarizieñ be nga taté na ba bametane nye a ayo'o ese a bo nye na a kobô abui mam, 54be lame nye melam na be nyoñ bifia biziñ bia so nye anyu.

Currently Selected:

Lk 11: BDCB

Highlight

Copy