Lk 17
17
E mam ma kolé môt ôbak. Mbunan. Bebo bisaé be ne teke mfi.
(Mt 18:6-9, 21-22; Mk 11:22-26; 1Ko 8:9-13; 10:13)
1Yésus a nga jô beyé'é bé na: E se nguleya bobane na e mam ma kolé ôbak me bo te kui, ve ngo'é nyô a bo na me kui! 2E nga ye dañe bo nye mfi na be tiñeti nye ako'o ba ko'o bidi *tyiñ a wua nye mañ été, a dañ éyoñ a nga ye bo ékolé ôbak e be wua ya ayôme bone di. 3Taba'ane miabebiene ntyel.
Nge monyoñ a te bo *abé, komeka'ane nye, a nge a tyendé, jamé'é nye. 4A nge a bo wo *abé biyoñe zamgbwale e *môs, a a zule be wo biyoñe zamgbwal, a jô'ô na: ma jôban, wo ye jamé nye.
5Minlôman mi nga jô Nti na: Kô'ôla'ane bia mbunan. 6A Nti a nga jô na: Nge mi nga ye bi mbunan ane fes ôndôndôô, mi nga ye jô élé murié jina na: Fumi'i si a béba'an e mañ été; a é nga ye wô'ô mia.
7Za ya be mia, nge a bili mbo ésaé a senan si, nge na a ve mimbame biyeme bidi, a ye jô nye éyoñ a soya mefube na: za'a tabe tawôlô ndian éto ébiene ji' 8Ngaa a ye viane jô nye na: kôme ma ndian, jaék mengômesane ya saane ma, akekui me maneya di a nyu; mvus éte, wo wo ye di a nyu. 9Ye a ye ve mbo ésaé ate akéva amu a nga bo e jam be nga bendé nye' 10Mia fe, éyoñ mi maneya bo e jam be nga bendé mia, jô'ane na: Bi ne bebo bisaé be ne teke mfi, bi nga bo e jam bi nga yiane bo.
Minzezam awôm
(Lk 5:12-14; Mt 8:2-4; 2Bb 5:1-15)
11E dulu dé ya ke Yérusalém, Yésus a mbe a lôtôk e zañe Samari a Galilé. 12Mbôlô a nga nyiin e nlam éziñ, *minzezam awôm mi nga zu tôbane nye mi tele ôyap.
13Mi nga bete metyiñ a jô na: A Yésus, Nye'ele, koo bia éngôngol! 14Eyoñ a nga yene mie, a nga jô mie na: Kela litane miabebien e be betuni. E dulu zañ, e nga kui na be ntoo *mfuban. 15Wua ya be be éyoñ a yeneya na a ntoo *mvo'é, a nga bulane mvus, a kañe Zambe tyiñe yôp. 16A nga ku mebo me Yésus asu é butu si a ve nye akéva. A mbe môte ya Samari. 17Yésus a nga nyoñe nkobô a jô na: Ye be nji tuneban bôt awôm? Ve ba bevok ébul be ne vé' 18Ye mone bikule nyô étam a te yené asu ya bulane zu ve Zambe duma' 19Wôna a nga jô nye na: Kôlô'ô si, kelek; e mbunane wôé ô nyiiya wo.
Mendem m'éjôé Zambe
(Mt 24:3-42)
20Befarizieñ be maneya sili nye nsili ajô éyoñ éjôé Zambe é ne so, a nga yalane be na: Ejôé Zambe é nji ke zu avale be ne nguleya yene je. 21Ba ye bo te jô na: Yenan é ne va, nge na: é ne li. Amu yenan, éjôé Zambe é ne e be mia été.
22A a nga jô beyé'é bé na: Melu ma ye bo e mme mete mia ye kômbô yene wua ya mimôse mi Mona môt, ve mia ye bo teke wô yen. 23Ba ye jô mia na: A ne va, a ne li. Te keane wé, a te matane mbile wé. 24Yaa, aval ane feleves a ngeñeban abui ataté aku'u yôbe di a kui di avok, nalé ate Mona môt a ye bo e môse wé. 25Ve a yiane taté tôbane minju'u abui a e miaé bôte wu ô bene nye.
26E jam e nga kui melu Noé, da ye fe kui e melu Mona môt. 27Bôt be nga di, be nga nyu, be nga lu'u befam a binga, be nga ke fe meluk, akekui e môse Noé a nga nyiin e *ark été; ndôn é nga kui a mane wôé bese. 28Da ye boban ane éyoñe Lot. Bôt be nga di, a nyu, a kuse biôm a kuane biôm a bé biôm, a lôñe menda. 29Ve môse Lot a nga kôlô Sodom, mveñe nduan a sufre é nga so yôp a wôé be bese. 30Avale te da ye boban e môse Mona môt a ye yené.
31Môs ôte, e nyô a ne e nseñ andile ya *nda jé, biôm bi too nye e *nda été, a bo'o te sise si na a ke nyoñe bie; a na nyô a nee mefup, nye fe a bo'o te bulane mvus. 32Simesa'ane minga Lot. 33Nyô a ye jeñe na a kaman ényiñe jé a ye dimili je, a nyô a ye dimili je a ye beta yene je. 34Ma jô mia de na: Alu te, e bôte bebaé be bôô énoñe jia, wua a ye nyoñeban, nyô mbok a li'i; 35e binga bebaé ba ko'o bidi vôme wua, wua a ye nyoñeban nyô mbok a li'i. 36E befame bebaé ba ye bo afup, jia ja ye nyoñeban, nyô fok é li'i.
37Beyé'é be nga jô nye na: jame te da ye bobane vé? A nga yalane be na: E vôme mbim ô né vôm ate fe bingbwañ bia ye sulan.
Currently Selected:
Lk 17: BDCB
Highlight
Share
Copy
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.
