Lk 21

E mveane nkuse minga

(Mk 12:41-44)

1Yésus a nga bete mis a yene minkukum mi mbe mi futi'i mimvean éwolo été. 2A nga yene fe éngôngole nkuse minga, nye a mbe a futi'i bone minsañ bebaé, éwolo te. 3A a nga jô na: ma jô mia de bebela na: éngôngole nkuse minga é veya a dañe bôte bevo'o bese; 4amu mimveane bana bese ba te ve éwolo été ba te nyoñe mie e biôme biap bia fuuku été, ve nye a te futi jôm ése a be a bili na a nyiñ.

Yérusalém a ye tyamban a e nsoone Mona Môt

(Mt 24:1-14; Mk 13:1-13)

5E mbôlô bôte bevo'o be mbe be jô'ô ajô *nda Zambe na é mbe é bili abeñe *mekok a biôme be nga soo bie ane mimvean Yésus a nga jô na: 6Melu ma zu e mme mete e biôme bise mi lôô bi, teke akok da ye li'i e bete di avo'o yôp teke na ba sô'ôlô de si.

7Be nga sili nye na: A nye'ele, éyoñ évé ñhe jame te da ye boban, a ndeme fé ja ye kate foé ya mam mete'

8Yésus a nga yalane na: Taba'ane ntyele ya woneban. Amu abui bôt da ye zu a jôé dam a jô na: ma le, a éyoñ é ntoo bebé. Te tôñane be. 9Eyoñe mia ye wô'ô be kobô'ô ajô bita a nzameta'an, te koone woñ, amu nalé a yiane taté boban ôsusua. Ve nalé aa ye ke jô na asu'ulan é soya éyoñe te ébien. 10A nga jô be na: Ayoñ da ye wosan ayoñ, éjôé ja ye wosan éjôé. 11Beta mimfô'ôsan mi si mia ye boban, a e mevôm mevôm, bim a bemfumbale zaé; angôndô bibubua a ye bo a beta mendem e yôp. 12Ve da, te na mam mete mese me boban, ba ye bi mia a ba ye tibili mia; ba ye kee mia e meba me Zambe, ba ye futi mia e menda mimbôk, ba ye kee mia asu betyi'i mejô a asu bengovina amu jôé dam. 13Nalé a ye ve mia afôla ya bo bengaa. 14Futa'ane ñhe de e nsisime wônan été na mi bo te fas ane mia ye kamane miabebien. 15Amu ma ye ve mia anyu a fek e mbie besiñe benane bese be se nguleya jibi nge té si. 16Ja'ane bebiaé benan ba ye kuane mia, nalé fe bobenyoñ, bivuvumane bienan a bemvôé benan, a ba ye bo na be wôé abui ya be mia. 17Bese ba ye vini mia amu jôé dam. 18Ve teke kongo ésile jia ya nlô wônan ja ye jañ; 19mia ye nyii minsisime mienan amu mbane wônan.

Yérusalém a tyi'iban ajô

(Mt 24:15-51; Mk 13:14-17)

20Eyoñe mia ye yene Yérusalém mbôma'ane *minsamba mewosan, yemane na éyoñ a yiane tyamban e kpwaneya. 21Eyoñe te, e ba ba ye tabe Yudé be tubuk e minkô, e ba ba ye tabe Yérusalém be kôlô'ô a e ba ba ye tabe mefup be bo'o te bulane tison. 22Amu melu mete ma ye bo ma me akuna'a, asu ntôébane ya mam mese me ne ntilan. 23Ngo'é binga ba ye bo mebum a e ba ba ye nyaa bone mebé melu mete! Amu beta ôlun a ye bobane si, a ayaa da wosan ayoñ. 24Ba ye ku a meyo me kpwaté mekôn. Ba ye kee be minkôm e be *meyoñ bikule mese, a meyoñe bikuu ma ye tibi Yérusalém a mebo, akekui biyoñ meyoñe bikuu bi kpwaneya.

Nsoone Mona môt

(Mt 24:29-31; Mk 13:24-27)

25Mendem ma ye boban e jôp, e ngon, ateté. Meyoñe bikuu ma ma ye kumetane minleme *si nyô, teke yeme jam be bo amu éduñe mañ a mendim; 26bôt ba ye wu a woñ, be yange'e jam da ye kui si, amu mengule ya yôp ma ye su'uban. 27Eyoñe te ba ye yene Mona môt a za'ak e minkut été a abui ngul a étôtok. 28Eyoñe nalé a ye taté na a boban, teba'ane tetele, a telé minlô, amu nkôtane wônan ô ntoo bebé. 29A a nga kane be *nkana na: fomba'an figié a bilé bise. 30Eyoñe bia kui bisôsoñe mekaé, miabebien mia yem, éyoñ mia fombô, na ésep é ntoo bebé. 31Avale te fe, éyoñe mia ye yene mam mete me boba'an, yemane na éjôé Zambe é ntoo bebé. 32Ma jô mia de bebela na: Miaé bôte wuna wo ye bo teke lôt te na mam mete mese me boban. 33Yôp a si bia ye lôt ve mejô mam ma ye bo te lôt.

34Taba'ane miabebien ntyel, amu woñe na minleme mienan mi za bo adit amu e nnembane mboone mam a nso'one bilam, a e mam ma tyelé nleme yôp ényiñ, a na *môs ôte ô zaa kuu mia yôp éyoñ mi ne te buni, 35aval ane avot, amu wo ye zu e be bôt be too *si nyô ése. 36Momba'ane ñhe a ye'elan éyoñ ése nalé mia ye bi ngule ya fame mam mese ma yiane kui, a litibane tetele asu be Mona môt.

37A amôs, Yésus a mbe a ye'elane e *nda Zambe, a a mbe a kele bômbô e nkôle beôlivié. 38A bôte bese, ataté mametyé, be mbe be kele be nye, e *nda Zambe, asu ya vô'ôlô nye.

Currently Selected:

Lk 21: BDCB

Highlight

Copy