Lk 9

Yésus a lôme beyé'é awôm a bebaé

(Mt 10:5-15; Mk 6:7-13; Lk 10:1-16)

1A nga loone beyé'é awôm a bebaé a ve be ngul a éjôé e be mimbia minsisim mise, nalé fe ngule ya yete akon. 2A nga lôme be be yôtan éjôé Zambe a saé minkôkon. 3A nga jô be na: te mia nyoñe jôm asu dulu, nge *ntum, nge mfek, nge belet, nge moné, a te biane melô'ô mebaé. 4E *nda éziñ mi ne nyiin, taba'an été a e nne mia ye kôlô valé a ke. 5E vôm ase bôt be nji nyoñe mia, éyoñe mia kôlô tison éte, sasane mbulu'u mebo menan aval ane ngaa a wosane be. 6Be nga kôlô a ke e minlam minlam; be mbe be kañete'e mbamba foé a saé bôt e mevôm mese.

Hérôde a tele fe'e ne vema

(Mt 14:1-2; Mk 6:14-16)

7Hérôde wua bejôô benyine ya nlam, a nga wô'ô foé ya mam mese me mbe me boba'an, a a mbe fe'e ne vema. Amu bevok be mbe be jô'ô na Yôanes a wômôya miñwuan; 8ba bevo'o na Elie a beteya so a ba bevo'o na wua ya minnôme bekulu mejô a wômôya. 9Ve Hérôde a mbe a jô'ô na: me nga bo na be tyi'i Yôanes nlô; e nde ñhe nyôna a ne za ma wô'ô be kobô'ô avale mame di ajô dé? A a mbe a jeñe na a yene nye.

Yésus a bulu bidi

(Mt 14:13-21; Mk 6:30-44; Yo 6:1-14; Mt 15:32-38)

10E mebulane map, minlôman mi nga kañete Yésus e mam mese be nga bo. A nga nyoñe be a kee be e vôm be ne ve be be éfase tison ba loone Bétsayida. 11Minsamba mi bôt mi nga yene be a tôñe be. Yésus a nga nyoñe be, a a mbe a kobô'ô be ajô éjôé Zambe; a nga saé fe ba bese be nga bili nkômbane ya saéban.

12Môs ô nga taté na wo ndeñ beyé'é awôm a bebaé ve zu nye bebé a jô nye na: su'u ndulu bôt na a ke minlam a mefup ya mefôla ma na a yen étaba'a, a jeñe bidi, amu bi ne vana *nkôte si. 13Yésus nye be na: Miabebien va'ane be bidi. Ve be nga yalane na: bi bili ve belet étan a kos ébaé, vengevenge ve biabebien bia ke kuse bidi asu bôte bana bese. 14Beyôm befame ki be mbe bebé toyini étan. Yésus a nga jô beyé'é bé na: bo'one be na be tabe si minnoñ minnoñ, nnoñ ôse bôte mewôm metan. 15Be nga bo nalé; be nga bo na bese be tabe si. 16Yésus a nga nyoñe belet étan a kos ébaé, ve bete mise yôp a botane bie. Wôna a nga be'e bie a ve bie beyé'é bé be kabe bie bôt. 17Bese be nga di a jaé a be nga kee minkoé awôm a mibaé ya afufus e nga buk njalan.

Pierre a Meme Yésus; Yésus a kate foé ya mintaé mié

(Mt 16:13-28; Mk 8:27 a kui 9:1)

18Môs éziñ Yésus a ye'ela'an vôm étam baa beyé'é bé be too, e nde a sili be nsili wu na: bôt ba jô na me ne za' 19Be nga yalane na: Yôanes Babtist; bevo'o na: Elie; ba bevo'o na wua ya minnôme bekulu mejô a wômôya. 20Nye be na: ve mia mia jô na me ne za? Pierre a nga yalane na: Krist a so be Zambe. 21Yésus a nga bendé be a ayo'o ese na be bo te kate de môt éziñ.

22A nga beté bifia bife na Mona Môt a nga yiane tôbane nju'u abui, bemvendé be nga yiane bene nye, nalé fe minlô betuni a *beyeme bekalate, a nga yiane wôéban a wômô e môse lale.

23Wôna a nga jô bese na: nge môt éziñ a kômbô tôñe ma, a vu'an émien, a beke'e Krôa jé *môs ôse a a tôñe ma. 24Yaa môt ase a ye kômbô nyii ényiñe jé a ye dimili je, ve nyô ase a ye dimili ényiñe jé amu ma a ye nyii je. 25A da volô môte jé na a bi émo ése nge a dimili émien nge na a ndaman émien' 26Yaa, e nyô ase a ye wô'ô ma ôson a mejô mam, Mona môt a ye wô'ô nye ôson éyoñ a ye zu étôto'o jé été a e ji Esaa a mimfufube beéngele. 27Ma jô mia de bebela na: bevo'o ya ba be tele va ba ye bo te tye'e awu te na be taté yen éjôé Zambe.

Yésus a tyendé asu dé

(Mt 17:1-9; Mk 9:2-10; Yo 1:14; 2 Pi 1:16-18)

28Melu me lôteya bebé muam, valé a ndôme mane kobô be mejô mete, Yésus a nga nyoñe Pierre, Yôanes a Yakob e nsamba wé, a a nga bete nkôle yôp asu ya ye'elan. 29Ezezañe meye'elan, éyeka'a y'asu dé é nga tyendé, a e ngômesane jé é nga bo éfumulu ja faé abui. 30A teme na baa befame bebaé be nga laan: be mbe Môze a Elie, 31mbe bete, éyoñ be yenéya étôto'o te, be mbe be kobô'ô ajô nkeane wé e ñwô ô nga yiane tôéban e Yérusalém. 32Oyo ô nga bili Pierre a bôt baa be nye be mbe nsamba; ve be nga tabe évevé a be nga yen étôto'o Yésus a e bôte bebaé baa be nye be mbe. 33Eyoñe bôte bete be nga kandane Yésus, Pierre a nga jô nye na: a Nye'ele, e ne mvaé na bi tabe va; e nlôñane menda bindelé melaa: jia asu dôé, jia asu Môze a jia asu Elie. A mbe teke yem e jam a mbe a jô'ôk. 34A ngenan a kobô'ô nalé, e nde *nkut ô nga zu yandane be a beyé'é be nga ko woñ, éyoñe be mbe be nyi'in e *nkut été. 35A *tyiñ é nga so e *nkut été na: nyôna a ne e ntobane Mone wom: vô'ôla'ane nye. 36Eyoñe tyiñe é nga wô'ôban, Yésus a ntoo étam. Beyé'é be nga tabe bivô teke kañete môt éziñ jame ya mam be nga yene melu mete.

Môt a be'e mbia *nsisim a saéban

(Mt 17:14-21; Mk 9:14-29; Mk 1:23-27)

37Tyé kpwaa, valé be soya e nkôle yôp, beta nsamba bôt a nga zu tôbane Yésus. 38A teme na ézezañe ndula bôt, nnôme fam éziñ a nga yône na: a Nye'ele, ma ye'elane wo, fombô'ô monafame wom, amu a ne atyi'i mone dam. 39Nsisim éziñ wo bi nye, a awolo te ebien a nga yôn, a nsisime te wo bo nye na a nkpwemetan, avul é kui nye anyu, nju'u na ô kôlô be nye éyoñ ô tatéya mane tya'a nye nyôl. 40Ma te ye'elane beyé'é bôé na be vaa wô, ve be nji bo ngul. 41Yésus a nga yalane na: A mvoñe betebuni a tyabetyabe, ma ye tabe bia be mia a kui éyoñ évé a jibi mia? Za'a nyô mone va. 42A za'a nye bebé, e nde mbia *nsisim wo dume nye si a bo nye na a nkpwemetan. Ve Yésus a nga bamé mvimvine *nsisim, a saé mongô a kee nye be ésaa. 43A bese be nga biban a anene Zambe.

Yésus a kate foé awu dé a ñwômane wé

(Mt 17:22-23; Mk 9:30-32)

Bôte bese be ngenane be kamek e mam mese Yésus a mbe a bo'ok, nye beyé'é bé na: 44e mfa'a wônan, tuka'a keane melo e mejô ma: e Mona môt a ye keeban e mo me bôt. 45Ve beyé'é be nji ke wôk nkobô te; ô mbe nsolan asu dap, nalé ate ba ye bo te yem atinane y'été; a be nga ko woñe ya sili nye minsili été.

Za a dañ? E môt a vaa mimbia minsisim

(Mt 18:1-7; Mk 9:33-42)

46Bisô bi nga boban e zañe beyé'é ajô ya yeme za ya be be a dañ. 47Amu Yésus a mbe a yemek asimesane ya minleme miap, a nga nyoñ ôyôme mongô, ve telé wô fefele jé 48a jô be na: nyô ase a nyoñ ôyôme mongô wu a jôé dam, mamiene le a nyoñ; a nyô ase a nyoñe ma, a nyoñe fe e nyô a nga lôme ma. Amu nyô a dañe tyôtyoé e mia bese été e nye ñhe a dañ.

49Yôanes a nga nyoñe nkobô a jô na: a Nye'ele, bi nga yene môt a va'a mimbia minsisim a jôé dôé; bi nga kamane nye na a bo te bo nalé amu a nji ke tôñe wo bia be be. 50Yésus a nga jô nye na: Te kamane nye, amu na nyô a nji wosane mia a ne mia e ngam.

Ataté Besamariteñ

(Yo 4:9-20)

51Eyoñe mimôse ya a nga yiane kôlô *si nyô mi nga subu bebé, a nga tyi'i ngume ntyi'ane na a ke Yérusalém 52ve lôme bebe'e mbañete ôsu wé. Be nga téé dulu a nyiin e nlame Besamariteñ éziñ asu ya kômesane mam asu dé. 53Ve be nga bo teke nyoñe nye, amu a mbe a kelek e mfa'a ya Yérusalém. 54Eyoñe be nga yene nalé, beyé'é, Yakob a Yôanes, be nga jô na: a Nti, ye wo kômbô na bi jô nduan é so yôp a di'i be' 55Ane a nga kôñelan e mfa'a be mbe a komekane be a ayo'o ese a jô be na: mi nji yem e *nsisim wo fô'ô mia. 56Amu Mona môt a nga zu saa amu na a dimili binyiñ bi bôt, ve na a nyii bie. Eyoñe te be nga ke e nlam ôfe.

Aya e nye bôt ba yiane tôñe Yésus'

(Mt 8:19-22)

57Be ngenane *zen, e nde môt éziñ a jô nye na: ma ye tôñe wo e vôm ase wo ye ke. 58Yésus a nga yalane nye na: bemvak be bili mefumba a anone ya yôp e bili mumba'a; ve Mona môt a nji bi vôme ya bôôé e nlô wé. 59A nga jô e mfe na: tôñe ma. A nga yalane na: kañese'e me na me taté ke jame ésaa wom. 60Ve Yésus a nga jô nye na: li'ik mimbim mi jame mimbime miap; a wo, kele kate foé éjôé Zambe. 61E mfe a nga jô na: ma ye tôñe wo a Nti, ve taté'é ve ma nkañesane ya ke ya'ane bôte ya *nda jam. 62Yésus a nga yalane nye na: E môt ase a beté wo ékalik a a fombô e mvus, a nji yian éjôé Zambe.

Currently Selected:

Lk 9: BDCB

Highlight

Copy