យ៉ូហាន 11

ចួសឡាសារក្ចែត

1កើតកន្ទ្រូសមូយណាក់ ជ្រមោះឡាសារ ណាវអ៊ី កឹណាវកួតេកបេថានី ស្រុកអិងស្រុកម៉ារា រ៉ើម៉ាថាកួ កឹម៉ាថាណាវយ៉ាយម៉ារា 2ម៉ារាណិងហឹយ អាលឹមអែលប៉្រេងផូមចូវតោះដាក់អ្ចឺងព្រះយេស៊ូវ រ៉ើអែលសក់ណាវចូវជូត កឹឡាសារអិង ណាវសែមម៉ារា 3កឹម៉ាថារ៉ើម៉ារាណាវប៉្រើកួយអនចៀសួរព្រះយេស៊ូវប៉ាយ៖ «ព្រះអឺយ កួយម៉ៃស្រឡាញ់ ណាវកម្ពុងកឹអ៊ី» 4ពេលព្រះយេស៊ូវសង់យ៉ាំងអិង ណាវសួរប៉ាយ៖ «ណាវអ៊ីមេន ម៉ងម៉ឹក្ចែតអឺ ណាវអ៊ីអនព្រះពឺតបឺនល្បី រ៉ើអនកួយសសើរកនព្រះពឺតអឺ» 5ព្រះយេស៊ូវស្រឡាញ់ម៉ាថា ម៉ារា រ៉ើឡាសារច្នាប់មេនទេន 6ពេលព្រះយេស៊ូវសង់ប៉ាយ ឡាសារអ៊ី ណាវណង់កួខាងទឹសទន្លេយ័រដាន់បារត្ងៃទ័ន 7លោះរ៉ើអិង ព្រះយេស៊ូវសួរសិស្សណាវប៉ាយ៖ «ជេះ ហៃចៀខែតយូដាចៀក្រោយ» 8កឹសិស្សណាវសួរព្រះយេស៊ូវប៉ាយ៖ «លោកគ្រូ បេកដឹកនាំន្ទើបកឹតឹងលាសកម្ចែតម៉ៃរ៉ើត្មាវដុល ណា ម៉ៃស្អៀចៀអិងទ័នវ៉ាក?» 9ព្រះយេស៊ូវឆ្លើយប៉ាយ៖ «មូយត្ងៃកើតពីតន្ដប់ម៉ោង បើកួយនាប៉កពេលត្ងៃ កួយអិងម៉ឹក្ទូសអឺ ចូវរ៉ើកើតម៉្រាងជោយអនប្រាងឡឹងក្ដែកណិង 10ម៉ងបើកួយនាប៉កពេលស្តាវ កួយអិងច្បាស់កឹក្ទូស ចូវរ៉ើម៉ឹកើតប្រាងកួឡឹងកួយអិង» 11ពេលព្រះយេស៊ូវសួររើងអិងរោច ណាវសួរបេកអិងទ័នប៉ាយ៖ «ឡាសារផូកម៉ាកហៃ ណាវបិចល្ងេតហឺយ កឺក្រៃកឹចៀប៉កមះណាវ» 12កឹសិស្សណាវសួរប៉ាយ៖ «ព្រះអឺយ បើណាវបិចល្ងេត ច្បាស់កឹណាវបឺនអដែលអឺ» 13មេនទេនអៃ ព្រះយេស៊ូវណាវប៉ាយ ឡាសារក្ចែតប៉ឹតហឺយ ម៉ងសិស្សណាវគឹតប៉ាយ ព្រះយេស៊ូវជ្មុងរ៉ើរើងបិចល្ងេតថាំម្ដា 14កឹព្រះយេស៊ូវសួរសិស្សណាវអនដិងច្បាស់ប៉ាយ៖ «ឡាសារក្ចែតប៉ឹតហឺយ 15កឺអើកច្នាប់មេនទេនម៉ឹបឺនជោយឡាសារអនអ បើកឺជោយឡាសារអនអ ម័ងជើកឺម៉ឹច្នាប់អឺ ម៉ងរ៉ើណិង ជេះ ហៃនាំឃ្នាចៀអិង អនម័ងជើច្នាប់ចៀច្នាប់» 16កឹថូម៉ាស កួយក្យាប៉ាយ ឌីឌីម ណាវសួរសិស្សឃ្នាណាវប៉ាយ៖ «ជេះ ហៃនាំឃ្នាចៀ ហៃសុខចិត្តក្ចែតរ៉ើព្រះយេស៊ូវ»។

ព្រះយេស៊ូវសួររ៉ើរើងណាវជាងជោយកួយអនត្មង់ចៀក្រោយ

17ពេលព្រះយេស៊ូវបៀតតឹងតក់បេថានី ណាវបឺនដិងប៉ាយ កួយអែលក្មូចឡាសារចៀប៉កដកឡឹងថ្នូរប៉នត្ងៃហឺយ 18បេថានីឆ្ងាយរ៉ើទីក្រុងយេរូសាឡឹមទ្រង់ប៉ាយប៉ៃគីឡូ 19កឹកើតបេកយូដាក្លឹងចូវជោយម៉ាថារ៉ើម៉ារារ៉ើរើងសែមណាវក្ចែត 20ពេលម៉ាថាណាវសង់ប៉ាយ ព្រះយេស៊ូវចូវតក់ កឹណាវចៀប៉កទទោល ម៉ងម៉ារាត្កូវកួឡឹងដុង 21កឹម៉ាថាសួរព្រះយេស៊ូវប៉ាយ៖ «ព្រះអឺយ បើម៉ៃកួតេកណែ សែមកឺម៉ឹក្ចែតអឺ 22ម៉ងកឺដិងប៉ាយ បើម៉ៃទារព្រះពឺត ច្បាស់កឹព្រះពឺតណាវអនម៉ៃ ម៉ឹប៉ាយ ម៉ៃទារចន្ទ័អឺ» 23ព្រះយេស៊ូវសួរម៉ាថាប៉ាយ៖ «សែមម៉ៃណង់កឹត្មង់ចៀក្រោយដែលអឺ» 24កឹម៉ាថាឆ្លើយប៉ាយ៖ «កឺដិងប៉ាយ ពោះត្ងៃប៉ញ្ចប់ក្តែកណិង កួយក្ចែតត្មង់ចៀក្រោយ កឹសែមកឺណាវត្មង់ចៀក្រោយដែល» 25ព្រះយេស៊ូវណាវសួរប៉ាយ៖ «កឺណិងហឹយ នាក់ប៉្រោះកួយអនត្មង់ចៀក្រោយ រ៉ើជោយកួយអនបឺនជីវិតត្មង់មាត បើកួយនាជើកឺ កួយអិងត្មង់រហូតមាត ម៉ឹប៉ាយចាក់ណាវក្ចែត កឹណាវណង់កឹត្មង់ 26កឹបើកួយនាណង់ត្មង់ កឹជើកឺ កួយអិងម៉ឹក្ចែតអឺ ណា ម៉ៃជើរើងណិងដែលវ៉ាក?» 27កឹម៉ាថាសួរប៉ាយ៖ «អៃមេនព្រះ កឺជើប៉ាយ ម៉ៃព្រះគ្រីស្ទ កនព្រះពឺត ក្រៃចូវឡឹងក្តែកណិង»។

ព្រះយេស៊ូវញាម

28ពេលម៉ាថាប៉ាយយ៉ាំងអិងរោច ណាវចៀសួរម៉ារាសែមណាវ កឹណាវក្សឹបសួរប៉ាយ៖ «លោកគ្រូចូវតក់ហឺយ ណាវមោះប៉ឺរម៉ៃ» 29ពេលម៉ារាសង់យ៉ាំងអិង ណាវយូរគ្រូក ចៀជួបព្រះយេស៊ូវម្ពែច់ 30ព្រះយេស៊ូវន្ទាន់មូតចៀឡឹងស្រុកអិងអឺ ណាវណង់កួតេកបនលឹមម៉ាថាចៀជួបណាវ 31បេកយូដាលឹមចូវជោយ ណាវកួឡឹងដុងរ៉ើម៉ារា ពេលណាវពើកម៉ារាយូរគ្រូកចៀម្ពែច់យ៉ាំងអិង ណាវនាំឃ្នាចៀតូន ចូវរ៉ើណាវគឹតប៉ាយ ម៉ារាចៀញាមតេកថ្នូរ 32ពេលម៉ារាចៀតក់បនព្រះយេស៊ូវកួ ណាវពើកព្រះយេស៊ូវ កឹណាវអោនតេកអ្ចឺងព្រះយេស៊ូវ កឹណាវសួរប៉ាយ៖ «ព្រះអឺយ បើម៉ៃកួតេកណែ សែមកឺម៉ឹក្ចែតអឺ» 33ពេលព្រះយេស៊ូវណាវពើកម៉ារាញាម រ៉ើពើកបេកយូដាចូវតូនម៉ារាញាម កឹណាវរន្ថាក់រន្ធឺប រ៉ើប៉បាកចិត្តឡង់ 34កឹណាវមោះប៉ាយ៖ «ណា ម័ងអែលក្មូចឡាសារចៀដកអាណា?» បេកអិងដឺងព្រះយេស៊ូវប៉ាយ៖ «ជេះចៀមីលោកគ្រូ» 35កឹព្រះយេស៊ូវណាវញាម 36បេកយូដាណាវជ្មុងប៉ាយ៖ «មីចៀ ណាវស្រឡាញ់ឡាសារច្នាប់ណោ» 37ម៉ងកើតបេកនឺចជ្មុងប៉ាយ៖ «រ៉ើញោងណាវជោយកួយឡែតមូយណាក់អនប្រាងចៀក្រោយ កើតន្ទ័បឺនណាវម៉ឹជោយឡាសារញ្ជ័ក់អនក្ចែតឡង់?»

ព្រះយេស៊ូវប៉្រោះចួសឡាសារអនត្មង់ចៀក្រោយ

38ពេលព្រះយេស៊ូវណាវចៀតក់ថ្នូរ កឹណាវរន្ថាក់រន្ធឺបម៉្រងទ័ន ថ្នូរអិងកួយវ័ឡឹងពើងប្រូវ កើតត្មាវមូយប៉ែតជិតព្រ័ង់ពើងអិង 39កឹព្រះយេស៊ូវសួរប៉ាយ៖ «អែលត្មាវនីលោះចៀ» ម៉ងម៉ាថា សាយក្មូចអិងសួរប៉ាយ៖ «ព្រះអឺយ ក្មូចណិងញ្ឆក់ហឺយ ច្បោះណាវក្ចែតបឺនប៉នត្ងៃណិងហឺយ» 40ព្រះយេស៊ូវសួរម៉ាថាប៉ាយ៖ «កឺសួរម៉ៃហឺយប៉ាយ បើម៉ៃជើកឺ ម៉ៃបឺនពើកព្រះពឺតវ័រើងចម្លែកដែលអឺ» 41កឹកួយណាវអែលត្មាវអិងលោះរ៉ើព្រ័ង់ថ្នូរ បឺនកឹព្រះយេស៊ូវងើយសោះទី កឹជ្មុងប៉ាយ៖ «អូវកឺអឺយ កឺអើកមេនទេន ម៉ៃច្ងាត់កឺ 42កឹកឺដិងប៉ាយ ម៉ៃច្ងាត់កឺរហូត ម៉ងកឺទារម៉ៃយ៉ាំងណិង អនកួយកួតេកណិងជើប៉ាយ ម៉ៃប៉្រើកឺអនចូវមេន» 43ពេលណាវប៉ាយយ៉ាំងអិងរោច កឹណាវជ្មុងសង់ៗប៉ាយ៖ «ឡាសារវ៉ឺយ លោះចូវ» 44កឹឡាសារលឹមក្ចែតអិងណាវលោះចូវតឹងក្រណាត់តូមតីតូមអ្ចឺង រ៉ើកម្សែងតូមមុះមាត់ឡង់ កឹព្រះយេស៊ូវសួរបេកកួតូនអិងប៉ាយ៖ «រេលក្រណាត់លោះរ៉ើណាវចៀ កឹអនណាវចៀៗ»។

កួយជំនុំឃ្នាកបព្រះយេស៊ូវ

45ពេលបេកយូដាលឹមចូវតូនម៉ារាណាវពើកព្រះយេស៊ូវវ័យ៉ាំងអិង កើតកួយក្លឹងដែលអឺជើព្រះយេស៊ូវ 46ម៉ងកើតកួយនឺចណាវចៀសួរបេកផារិស៊ីរ៉ើរើងលឹមព្រះយេស៊ូវវ័ 47កឹមេៗចួសចារ្យរ៉ើបេកផារិស៊ីណាវក្យាបេកពឺតចូវជំនុំឃ្នា កឹណាវជ្មុងប៉ាយ៖ «ហៃក្រៃវ័យ៉ាំងនា? កួយអិងណាវវ័រើងចម្លែកៗអនកួយពើកក្លឹងមេនទេន 48បើហៃប៉ណ្ដោយដកអនណាវវ័យ៉ាំងអិង ច្បាស់កឹកួយតឹងម៉ាត់ជើណាវ កឹបេករ៉ូម៉ាំងណាវបំផ្លាញប៉ហៀរហៃ រ៉ើកបអែលសាសន៍ហៃឡង់» 49កឹតេកអិង កើតកួយមូយណាក់ ជ្រមោះកៃផា ក្មអិងណាវវ័ចួសចារ្យពឺត កឹណាវជ្មុងប៉ាយ៖ «ម័ងម៉ឹដិងន្ទ័មេន 50ណា ម័ងម៉ឹគឹតពើកវ៉ាកប៉ាយ បើកើតកួយមូយណាក់ក្ចែតជំលោសកួយហៃតឹងម៉ាត់ រ័កលើសដកអនកួយបំផ្លាញសាសន៍ហៃ» 51ណាវជ្មុងយ៉ាំងអិង ម៉ឹមេនលោះរ៉ើចិត្តណាវអឺ ចូវរ៉ើក្មអិងណាវវ័ចួសចារ្យពឺត យ៉ាំងអិងហឹយ បឺនណាវទេយប៉ាយ ព្រះយេស៊ូវក្រៃក្ចែតជំលោសសាសន៍យូដា 52ម៉ងព្រះយេស៊ូវណាវម៉ឹមេនគ្រាន់កឹក្ចែតជំលោសសាសន៍យូដាម្អិងអឺ ណាវក្ចែតជំលោសកួយកួឡឹងក្ដែកណិងតឹងម៉ាត់ឡង់ កឹណាវវ័យ៉ាំងអិង ចូវរ៉ើណាវស្អៀអនកួយនាជើណាវកើតចៀកនព្រះពឺត រ៉ើស្អៀអនកនអិងផងកើតចៀរាស្ត្រកឹមូយ 53កឹតាំងរ៉ើត្ងៃអិង មេៗចួសចារ្យ រ៉ើបេកផារិស៊ី ណាវគឹតឃ្នាប៉ាយ វ័យ៉ាំងនាកម្ចែតព្រះយេស៊ូវបឺន 54យ៉ាំងអិងហឹយ បឺនព្រះយេស៊ូវណាវម៉ឹប៉កចៀចូវអនបេកយូដាពើកទ័ន ណាវប៉កលោះរ៉ើអិង ចៀស្រុកមូយបៀតវាលពឺតក្ដាវរហាក់រហិញ ស្រុកអិង ជ្រមោះអេប្រាអិម កឹណាវកួរ៉ើសិស្សណាវតេកអិង។

55ម្សាអិងបៀតតឹងតក់ត្ងៃបេកយូដារំលឹករ៉ើរើងលឹមព្រះពឺតរំល័ងដុងនាលាបហាមកនចៀមហឺយ កឹកើតកួយក្លឹងចូវរ៉ើស្រុកនីចូវរ៉ើស្រុកទោក់ ណាវនាំឃ្នាសោះចៀទីក្រុងយេរូសាឡឹម ចៀរាវចាក់អនបឺនរ័កញោងត្ងៃរំលឹកអិង 56កឹបេកអិងផងណាវប៉ឺរព្រះយេស៊ូវ កឹណាវជ្មុងឃ្នាឡឹងឡូប៉ហៀរប៉ាយ៖ «ណា ម៉ៃគឹតយ៉ាំងនា? ទ្រង់ប៉ាយកួយអិងណាវម៉ឹហានចូវមូតរោមបើ?» 57ម្សាអិង មេៗចួសចារ្យ រ៉ើបេកផារិស៊ី ណាវសួរកួយប៉ាយ បើកួយនាដិងប៉ាយ ព្រះយេស៊ូវកួតេកណា ក្រៃសួរណាវអនដិង ដកណាវចៀកបព្រះយេស៊ូវ។

Currently Selected:

យ៉ូហាន 11: KNT

Highlight

Copy