Yowano 13

Yeshu ukuyowesha bandongesha bendi ku mawulu

1Oho Shimbo sha Kupitilila shilolo shikume, Yeshu walimukile ngayi shikati shendi shinakumu sha kushiya kano kaye na kuya kuli Tatiyendi. Niye wahakile bendi baya bekalile mu kaye, kami wabahakile kutwala na ku mamaninino.

2Yeshu na bandongesha bendi bekalile ku mulalilo. Oho Shatana wengizakale mu mutima wa Yundashi, mwana Shimoni Ishikalyote, bihanganiko bya kubeba Yeshu. 3Yeshu hakulimuka ngayi Tatiyendi wapanine byuma nimwabyo mu maboko wendi, walimukile ngayi wafumine kuli Nyambi, kami ukuboka kuli Nyambi. 4Niho Yeshu wakatukile ku tebulu, wavulile shivwalo shendi sha hayilu, watolele tawulo, pe walimangileyo mu lukanda. 5Wetilile mema ha lulonga, pe watatikile kuyowesha mawulu a bandongesha bendi na kuwakunkumuna na tawulo yiya alimangile. 6Yeshu wakumine kuli Shimoni Pita, niho Pita ambile ngayi, “Mwene, kati ukuyowesha mawulu wami ndi?”

7Yeshu wamukumbwile ngayi, “Wuluno kulimuka ebye nikutenda wufwako, ngoboni kumbili ukalimuka.”

8Pita wambile ngayi, “Byo, nisho eze ukatange kuyowesha mawulu wami.”

Yeshu wamukumbwile ngayi, “Ndi kukuyowesha nifwako, pe kaliha uli ndongesha wami.”

9Shimoni Pita wambile kuli Yeshu ngayi, “Mwene, hinga uyowesha mawulu wami tuhu, ngoboni yowesha maboko wami na ku mutwe!”

10Yeshu wambile ngayi, “Muntu nayowele, kaliha wafwanina kuyowele kami, ndele ku mawulu wendi tuhu. Enu nimwenu munayele, ndele umo.” 11(Yeshu walimukile ou ukamubeba. Niho ambile ngayi, “Enu nimwenu munayele, ndele umo.”)

12 # Luk 22:27. Oho amanishile kuyowesha mawulu a bandongesha bendi na kuvwala shivwalo sha hayilu, wabokele na kwikala ku tebulu. Pe wabepwile ngayi, “Kati mukuyuvwishisha ebye natende kukwenu ndi? 13Mukuntoya ngayi Mulongeshi na Mwene, mukwamba shiwahe ndaba nisho nili. 14Ndi ami Mwene na Mulongeshi wenu, nayoweshe mawulu wenu, nanenu kami yoweshenu mawulu a umo na wamina. 15Namimoneshe ebye munafwanini kutenda, ngayi mukatendenga ngonehe ninatende kukwenu. 16#Mat 10:24; Luk 6:40; Yowa 15:20. Mwashikuma nikwamba kukwenu ngayi, mukamulimo kupitakana hekulyendi wufwako, hinge kupitakana uya unamutumu wufwako. 17Wuluno mwalimukakale byuma ebye, muli na mfuywezi ndi mukubitenda!

18 # Nyi 41:9. “Kutoya nimwenu nifwako, nikulimuka aba nahata. Ngoboni binafwanini kutendiwa biya byatikitiwile ngayi, ‘Ou nalyanga nendi byakulya byami, unamfutukili.’ 19Nikumitongweza ebye wuluno, oho shilolo bitendiwe, ngayi byakatendiwa mukakulupila ngayi, ‘Ami niye Ami.’ 20#Mat 10:40; Mak 9:37; Luk 9:48, 10:16. Mwashikuma nikwamba kukwenu ngayi, ou ukutambula uya nikutuma unantambulu, kami ou ukuntambula unatambulu uya wantumine.”

Yeshu ukulubulula kubebiwa kwendi

(Mateo 26:20-25; Mako 14:17-21; Luka 22:21-23)

21Oho Yeshu amanishile kwamba ebye, wakalikizile mu mutima wendi, pe wambile ngayi, “Mwashikuma nikwamba kukwenu ngayi, umo hakati kenu ukambeba.”

22Bandongesha balitilaminine umo na wamina, hinga babula kulimuka ngayi ukutoya yani. 23Umo wa bandongesha, ou Yeshu ahakile shikuma, wekalile kunkumo na Yeshu. 24Niho Shimoni Pita amulabizile ngayi, “Mwipule ukutoya yani.”

25Niho uya ndongesha wayendaminine ha kapumpo ka Yeshu, wamwipwile ngayi, “Mwene, kati ukutoya yani?”

26Yeshu wakumbwile ngayi, “Ou nikatantila linkende na kumupana.” Niho atantile linkende wapanine kuli Yundashi Ishikalyote mwana Shimoni. 27Oho Yundashi atambwile liya linkende, Shatana wenginine mumwendi. Yeshu wamutongwezele ngayi, “Ebye ukushinga kutenda, tenda wanguwangu.” 28Ngoboni baya bekalile ku tebulu kowa wayuvwishishile ngayi shumangani anamba kukwendi. 29Ndaba Yundashi walaminenga shipawupawu sha mali, pe bamo ku bandongesha bahanganikile ngayi unamutongweze kuya na kulanda byuma ebye bashingilenga ku shimbo, hinge ngayi apane shuma ku bakakushepwa.

30Yundashi watambwile liya linkende, pe hohobene watutikile. Shengile shikati shawushiku.

Ndayano zazipya

31Oho Yundashi atutikile, Yeshu wambile ngayi, “Wuluno wuwahe wa Mwana Muntu unaholoko, kami mumwendi wuwahe wa Nyambi unaholoko. 32Ndi wuwahe wa Nyambi unaholoko mumwendi na Nyambi ukaholola wuwahe wa Mwana Muntu mumwendi, kami ukatenda ebye hohobene. 33Banabami, nishili nenu kashikati kakashe. Mukancingancinga, ngoboni nikwamba kukwenu nehe nambile ku bakulwane ba Bayunda ngayi, ‘Oku nikuya, enu kutwesha kuyako mufwako.’

34 # Yowa 15:12, 17; 1 Yowa 3:23; 2 Yowa 5. “Nikupana kukwenu ndayano zazipya ngayi, lihakenu umo na wamina. Ngonehe namihaka, ngayi nenu kami mulihake umo na wamina. 35Ndi mukalihaka umo na wamina, bantu nimwabo bakalimuka ngayi muli bandongesha bami.”

Yeshu ukulubulula ngayi Pita ukamukana

(Mateo 26:31-35; Mako 14:27-31; Luka 22:31-34)

36Shimoni Pita wepwile Yeshu ngayi, “Mwene, ulinakuya kuti?”

Yeshu wakumbwile ngayi, “Oku nikuya, kutwesha kunkonka wuluno mufwako, ngoboni kumbili mukankonka.”

37Pita wepwile Yeshu ngayi, “Mwene, shumangani nikubula kutwesha kukukonka wuluno? Naliwahishili kufwa ndaba yobe.”

38Yeshu wamukumbwile ngayi, “Kati unaliwahishili kufwa ndaba yami ndi? Mwashikuma nikwamba kukwobe ngayi, oho likombwe shilolo likuwe ukankana kahatu.”

Currently Selected:

Yowano 13: KK2008

Highlight

Copy