Yowano 6

Yeshu ukulisha makulukazi mutanu a bantu

(Mateo 14:13-21; Mako 6:30-44; Luka 9:10-17)

1Munyima yanebye Yeshu wombokele Liziba lya Ngalileya (hinge ngayi, Liziba lya Timbeliyashi). 2Likunge lyalinene lya bantu lyamukonkele, ndaba bamonene bilimukisho byendi bya kunyongomanisha bakakukola. 3Yeshu wakandamine ha lipili, pe wekalile hanci na bandongesha bendi. 4Shimbo sha Kupitilila sha Bayunda shekalile hahepi. 5Oho Yeshu ayimbwile meho wendi, wamonene likunge lyalinene lya bantu baya bezilenga kukwendi, wambile kuli Fwilipu ngayi, “Tukalanda kuti mankende ngayi aba bantu mwanga balye?” 6(Wambile nahiyo kwezeka Fwilipu, ngoboni niye walimukile shakufwanina kutenda.)

7Fwilipu wakumbwile ngayi, “Mankende a ndando ya muwayawaya wa myanda yibili wa shiliba, kutwesha kukonkana aba bantu ngayi umo na umo atambule hinge kakashe afwako.”

8Anduleu umo wa bandongesha, mukonzo wa Shimoni Pita, wambile kuli Yeshu ngayi, 9“Kuli ndumbana kuno, uli na mankende mutanu na zinci zibili. Ngoboni ebye bikayavwa bishini ku bantu babengi nehe?”

10Yeshu wambile ngayi, “Tongwezenu bantu bekale hanci.” (Bantu bekalile ha mwila wawingi wekalile kuyo.) Bantu bashingile kwinga makulukazi mutanu. 11Niho Yeshu atambwile mankende, wakambililile kuli Nyambi, watapishilile ku bantu bekalile hanci. Watendele shuma shimo kami ku zinci, pe bantu balile ngonehe bashingile. 12Bantu nimwabo oho bekutile, Yeshu watongwezele bandongesha bendi ngayi, “Tolenu ncankuncanku zinashalako ngayi kubule shakuyongala.” 13Bandongesha bakungwilile ncankuncanku za mankende nimwazo, pe benzalishile zintumba likumi na zibili.

14Oho bantu bamonene eshe shimonekesho atendele Yeshu, bambile ngayi, “Mwashikuma ou niye Muluwe bambile ngayi wafwanina kwiza mukaye!” 15Oho Yeshu alimukile ngayi bakushinga kumukwata ngayi ba mwinge mwene, wafumineko, pe wayile ku lipili kwa ninkayendi.

Yeshu ukwenda ha mema

(Mateo 14:22-33; Mako 6:45-52)

16Oho kwengile mazolo, bandongesha ba Yeshu bayile ku liziba, 17benginine mu wato, pe batatikile kuvuwa ngayi bomboke liziba baye munciza ku Kapenauma. Oho kwengile wushiku, Yeshu kaliha wakumine kukwabo. 18Kwezile nkuli yayinene, pe mema atatikile kunkwancana. 19Oho bavuwile makilomita akukuma ku mutanu hinge ku mutanu na imo, oho bamonene Yeshu henda ha mema, heza kwakwipi na wato, batinine, 20ngoboni Yeshu wambile kukwabo ngayi, “Ami! Hinga mutina.” 21Bawahililile hakuyaka Yeshu mu wato, pe hohobene wato wakumine ku shibumbo sha kuyo bayilenga.

Bantu bakushinga Yeshu

22Oho kwashile, likunge lya bantu baya bashalile munciza ya liziba, balimukile ngayi hekalile wato umo tuhu. Kami bantu balimukile ngayi Yeshu kaliha wenginine mu wato hamo na bandongesha bendi, ngoboni bandongesha bendi bayile ninkayabo. 23Mato amina afumine ku Timbeliyashi ezile na kufuwika ku shibumbo hahepi na mbalila ya haya likunge lya bantu balile mankende oho Mwene amanishile kukambilila. 24Oho likunge lya bantu bamonene ngayi Yeshu na bandongesha bendi kowa, benginine mu aya mato, pe bayile ku Kapenauma na kushinga Yeshu.

Yeshu niye Linkende lya Wumi

25Oho bamuwanine munciza ya liziba, bepwile Yeshu ngayi, “Mulongeshi, wakuma mwakangani kuno?”

26Yeshu wabakumbwile ngayi, “Mwashikuma nikwamba kukwenu ngayi, mulinakuncinga, kaliha ngayi ndaba mwayuvwishishanga bilimukisho, ngoboni ndaba mwalya mankende, pe mwekuta. 27Hinga mutenda milimo ya byakulya biya bikabola, ngoboni tendenu milimo ya byakulya biya bikakuma ku wumi wa mwayile myaka. Ebye nibyo byakulya biya Mwana Muntu akamipana, ndaba Nyambi Tate unamuyaka limango lya kumwitabilisha.”

28Niho bamwipwile ngayi, “Tukwinga nahiti ngayi tutende ebye Nyambi akushinga?”

29Yeshu wabakumbwile ngayi, “Ebye Nyambi akushinga ngayi mutende, binengi kukulupila muli ou anatumu.”

30Bambile kuli Yeshu ngayi, “Ukutenda shikomokesho ngani ngayi tumone, pe tukukulupile? Ukutenda bishini? 31#Kut 16:4, 15; Nyi 78:24. Batatizetu balile maana mu libelelengwa, ngonehe kwatikitiwile ngayi, ‘Wabapanikile mankende afumine kuyilu ngayi balye.’ ”

32Niho Yeshu ambile kukwabo ngayi, “Mwashikuma nikwamba kukwenu ngayi, Moshesha kaliha wamipanine mankende afumine kuyilu, ngoboni Tate ukumipana mankende akupwisha akufuma kuyilu. 33Ndaba mankende Nyambi apanikanga, enga niye ou nahuluku kufuma kuyilu, kami ukupana wumi ku kaye.”

34Bambile kuli Yeshu ngayi, “Mwene, tupane awa mankende matena nimwawo.”

35Yeshu wambile kukwabo ngayi, “Ami linkende lya wumi, nimwendi ukwiza kukwami kukekala na nzala wufwako, kami ou ukukulupila mumwami kukekala na linyontwa wufwako. 36Ngoboni nambile kukwenu ngayi munamono, ngoboni kukulupila mufwako.

37“Nimwabo aba Tate akumpana, bakeza kukwami. Kami muntu nimwendi ukwiza kukwami, kukamutanda nifwako, 38ndaba nahuluku kufuma kuyilu nikutenda shamutima wendi ou wantumine, kaliha ngayi nitende shamutima wami. 39Pe shamutima wendi ou wantumine ngayi hinga kukayongala hinge umo kunaba ampanine, ngoboni ngayi nikabashangule ku bafu ha mutena wakukotoka. 40Ndaba eshe nisho shamutima wa Tate ngayi muntu nimwendi ukumona Mwana na kumukulupila, ekale na wumi wa mwayile myaka, kami nikamushangula ku bafu ha mutena wakukotoka.”

41Bayunda bangungutile kukwendi, ndaba wambile ngayi, “Ami linkende linafumu kuyilu.” 42Bambile ngayi, “Kati ou kaliha niye Yeshu, mwana Yoshefwa ndi? Tukulimuka tatiyendi na mandiyendi. Haya ukwamba nahiti ngayi, ‘Nahuluku kufuma kuyilu?’”

43Yeshu wabakumbwile ngayi, “Hinga mungunguta mukatikenu. 44Kowa muntu ukwiza kukwami ndele Tate ou wantumine amukoke. Kami nikamushangula ha mutena wakukotoka. 45#Isha 54:13. Bamiluwe batikitile ngayi, ‘Bantu nimwabo bakalongeshiwa kuli Nyambi.’ Muntu nimwendi ukayuvwilila kuli Tate na kulilongesha kukwendi ukwiza kukwami. 46Kaliha ngayi muntu nimwendi wamona Tate, ndele tuhu ou unafumu kuli Nyambi niye wamona Tate. 47Mwashikuma nikwamba kukwenu ngayi, “Niye ukukulupila, uli na wumi wa mwayile myaka. 48Ami linkende lya wumi. 49Batatizenu balile maana mu libelelengwa, ngoboni bafwile. 50Ngoboni linkende linafumu kuyilu linezi ngayi muntu nimwendi ukalyako akabule kufwa. 51Ami linkende lya wumi liyo lyafumine kuyilu. Ndi muntu ukulya kunelye linkende ukayoya mwayile myaka. Linkende nikapana nilwo lutu lwami, luyo nikapana ku bakakaye ngayi bakekale na wumi.”

52Niho Bayunda balikananganishile mukati kabo ngayi, “Ou muntu ukutwesha nahiti kutupanika lutu lwendi ngayi tulye?”

53Yeshu wambile kukwabo ngayi, “Mwashikuma nikwamba kukwenu ngayi, ndele mulye lutu lwa Mwana Muntu na kunwa mukeza wendi, ndelewa kukekala na wumi mufwako. 54Nimwendi ukulya lutu lwami na kunwa mukeza wami uli na wumi wa mwayile myaka, kami nikamushangula ha mutena wakukotoka. 55Ndaba lutu lwami lwenga byakulya byakupwisha, kami mukeza wami wenga byakunwa byankama. 56Nimwendi ukulya lutu lwami na kunwa mukeza wami ukwikala mumwami, kami ami nikwikala mumwendi. 57Ngonehe Tate wakuyoya antumine, nami kami nikuyoya ndaba ya Tate. Nohobene, uya ukalya ami, ukekala na wumi mumwami. 58Elye nilyo linkende lyafumine kuyilu, bankaka zenu balile maana kami bafwile, ngoboni uya ukalya elye linkende, ukayoya mwayile myaka.”

59Yeshu wambile ebye oho alongeshelenga mu shinangonge ku Kapenauma.

Mazu a wumi wa mwayile myaka

60Bandongesha ba Yeshu babengi oho bayuvwile ebye bambile ngayi, “Kulongesha oku kwakukalu shikuma. Yani ukutwesha kubitambula?”

61Yeshu walimukile ngayi bandongesha bendi bangungutile ndaba yanebye. Pe wabepwile ngayi, “Kati ebye binakushinga kumikwangisha ndi? 62Mukenga nahiti ndi mukamona Mwana Muntu hakandama kuboka oku ekalile mwaka? 63Moyo wa Nyambi ukupanika wumi, ngovu za muntu kowa ebye zikutenda. Mazu ninamba kukwenu niwo Moyo, kami niwo wumi. 64Ngoboni kuli bamina kukwenu bakubula kukulupila.” (Ndaba Yeshu walimukile kufuma ku kutatika baya bakabula kumukulupila, kami wamulimukile uya ukamubeba.) 65Pe wambile ngayi, “Ebye nibyo namitongwezele ngayi, kowa muntu wakutwesha kwiza kukwami, ndele Tate amwitabilishe.”

66Kufuma ku shikati shiyo, bandongesha bendi babengi babokele, kami bashiyile kumukonka. 67Yeshu wepwile balikumi na babili ngayi, “Kati nenu kami mukushinga kuboka ndi?”

68 # Mat 16:16; Mak 8:29; Luk 9:20. Shimoni Pita wakumbwile ngayi, “Mwene, tukaya kuli yani? Obe uli na mazu a wumi wa mwayile myaka. 69Kami tunakulupili na kulimuka ngayi obe uli Wakuyela umo wuya unafumu kuli Nyambi.”

70Niho Yeshu akumbwile ngayi, “Kati kaliha namihatile ba likumi na babili ndi? Ngoboni wamina kukwenu nengi Shatana!” 71Watoyele Yundashi mwana Shimoni Ishikalyote. Ndaba Yundashi, hinge wengile umo wa bandongesha likumi na babili, niye ukamubeba.

Currently Selected:

Yowano 6: KK2008

Highlight

Copy