Luka 14
14
Yeshu ukunyongomanisha mulume mukakukola
1Mutena umo Wakukatala Yeshu wenginine mu litala lya Kafwalishi wa mukulwane na kulya ncima, pe bantu bamuconcomekele. 2Kwezile mulume umo kuli Yeshu wekalile na wulweli wa kuzimbazimba. 3Yeshu wambile ku bakakulongesha ndayano na Bafwalishi ngayi, “Kati ndayano zikwitabilisha kunyongomanisha muntu ha Mutena Wakukatala ndi?”
4Ngoboni bamwenene. Yeshu washimbile uya mulume, wamunyongomanishile, niho amutongwezele ngayi aye. 5#Mat 12:11. Kami wabepwile ngayi, “Kati yani kukwenu, ndi mwanendi wa mulume hinge pulu yendi binawili mu liteke, ukubula kunyankupa kumufumishamo ndaba ngayi ha Mutena Wakukatala?”
6Ba kwangile kumukumbula hanebye.
Kulilimbwilisha na kuyumbula bayeni
7Oho Yeshu atoshele ngayi baya behaniwile bahatile bipona bya kumbili, wambile nguli kukwabo ngayi, 8#Zing 25:6, 7. “Oho unehaniwi ku shimbo sha shinawenga, hinga wikala ku mwanya wa kumbili, kutina kampe ku naba banehaniwi kukwiza wa mulemu kupitakana obe. 9Ou unamihana ubili wenu, ukamba kukwobe ngayi, ‘Pana ou muntu shipona.’ Niho ukayuvwa lisheni na kwikala ha shipona sha makuminino. 10Ngoboni oho unehaniwi, yanga ukekale ha shipona shakunyima, ngayi oho uya unakwihana eza, ukamba kukwobe ngayi, ‘Muhoni, yanga ukekale kumbili.’ Eshe shikakuletela maleema ha meho abaminobe banehaniwi nimwabo. 11#Mat 23:12; Luk 18:14. Ndaba ou nimwendi wakulinenehesha ukashepeshiwa, kami ou ukulishepesha ukaneneheshiwa.”
12Niho Yeshu ambile kuli uya wamwihanine ngayi, “Oho ukutenda byakulya bya mwaana hinge bya mulalilo, hinga wihana bahoni bobe hinge bawushinda wobe hinge lupashi lwobe hinge bandambo bobe bakuheta. Kutina nibo kami bakakwihana, bakubweshele ebye wabapanine. 13Ngoboni ndi unapingi shimbo yihana bakushepwa, bihole, bakupenga mawulu na tushishitwa, 14pe ukatambula mfuywezi ndaba bakabula byakukubweshela. Nyambi ukakubweshela ha mutena wa kushanguka kwa bakakwoloka.”
Nguli ya shimbo shashinene
(Mateo 22:1-10)
15Umo ha nobo bekalile nendi ku tebulu oho ayuvwile eshe ambile kuli Yeshu ngayi, “Uli na mfuywezi ou ukekala ku shimbo mu Wene wa Nyambi!”
16Yeshu wambile kukwendi ngayi, “Shikati shimo muntu umo watendele shimbo shashinene, kami wehanine bantu babengi. 17Watumine mukamulimo wendi ha shikati sha kulya na kushimikila baya behaniwile ngayi, ‘Yekenu, ndaba nimwabyo byawahakale!’ 18Ngoboni nimwabo batatikile kukweshoka. Wa kutatika wambile kukwendi ngayi, ‘Nalanda mfuba, kami nafwanini kuya na kuyimona, nikulomba ngayi munyatileko.’ 19Wamina wambile ngayi, ‘Nalanda mapulu likumi, kami nilinakuwaezeka, nikulomba ngayi munyatileko.’ 20Wamina kami wambile ngayi, ‘Nayeke wuluno, nohobene kutwesha kwiza nifwako.’
21Mukamulimo uyo wabokele, watongwezele hekulyendi byuma ebye. Niho mwine litala apilamine shikuma, wambile ku mukamulimo uyo ngayi, ‘Yanga wanguwangu mu zinzila na ku zimbanza za mu munzi, ulete kuno bakushepwa, bihole, tushishitwa na bakupenga mawulu.’ 22Mukamulimo uyo wambile ngayi, ‘Hekulu, eshe unalaya shinatendiwi, ngoboni mwanya nikowushili.’ 23Niho hekulyendi ambile kukwendi ngayi, ‘Yanga ku mikwakwa na mu litunga, ukakandikize bantu beze bengine ngayi litala lyami liyinzale. 24Nikumitongweza ngayi, kowa umo ku baya balume nehanine ukayela ku mayambwayambwa wami!’ ”
Ndando ya kwinga ndongesha
(Mateo 10:37-38)
25Likunge lya bantu babengi bayilenga hamo na Yeshu, pe wafutukile nakwamba kukwabo ngayi, 26#Mat 10:37. “Muntu ndi ukwiza kukwami kwakubula kuzimba tatiyendi na mandiyendi, mukazendi na banabendi, bawushinda wendi na bampanzendi, hinge wumi wendi, kutwesha kwinga ndongesha wami wufwako. 27#Mat 10:38, 16:24; Mak 8:34; Luk 9:23. Kami nimwendi ukubula kushimba shishempakano shendi na kunkonka, kutwesha kwinga ndongesha wami wufwako. 28Yani hakati kenu ndi ukushinga kutenda litala, hakubula kwikala taha hanci na kufwanikiza ndando yalyo amone ndi uli na mali akutwesha kumanisha nawo? 29Ndaba ndi ukuzika mwimbi na kukwanga kumanisha mulimo, bantu bakamonako nimwabo bakatatika kumukumangiza, 30nakwamba ngayi, ‘Ou muntu watatikile kutenda, ngoboni wakwanga kumanisha!’
31“Hinge mwene ngani ukushinga kulwisha mwene wamina, hakubula kwikala taha hanci na kuhanganika ngayi kati ukutwesha kuliyavwisha na nzita ya bantu ba makulukazi likumi kulihangana na uyo ukwiza na nzita ya bantu ba makulukazi makumi abili? 32Ndi kutwesha wufwako noho, wamina oho ushili kwakutali, niye ukatuma bantumwana mu kunyepa kumwena. 33Nahiyo kami nimwendi hakati kenu wakubula kulihupwiza ku nimwabyo alinabyo, kutwesha kwinga ndongesha wami wufwako.
Mushele wawuhamu
(Mateo 5:13; Mako 9:50)
34“Mushele wenga shuma shashitobe, ngoboni ndi mushele unahamuku ukatobalishiwa nahiti? 35Kuwahisha limvu hinge kuwinga wilo kutwesheka wufwako ngoboni bantu bakuwuyumbila hamunkanda. Ou uli na matu akuyuvwa, ayuvwe!”
Currently Selected:
Luka 14: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.
