Luka 22
22
Bihanganiko bya kubeba Yeshu
(Mateo 26:1-5; Mako 14:1-2; Yowano 11:45-53)
1 # Kut 12:1-27. Shimbo sha Mankende Akubula Mumena, shikutumbiwa ngayi Shimbo sha Kupitilila shakumine hahepi. 2Bakankombela ba bakulwane na bakakulongesha ndayano batinine bantu, pe bashingile nzila ya kuziha Yeshu kuwi.
Yundashi ukwitabila kubeba Yeshu
(Mateo 26:14-16; Mako 14:10-11)
3Niho Shatana enginine muli Yundashi watumbiwile Ishikalyote, ou wengile umo wa bandongesha likumi na babili. 4Pe Yundashi wayile mukulyambashana na bakankombela ba bakulwane na babilolo eshe afwanina kubeba Yeshu kukwabo. 5Bawahililile, pe baliyuvwashanine kumupanika mali. 6Yundashi wetabilile, pe washingilenga shikati shakufwanina kupana Yeshu kukwabo kwakubula kulimuka bantu.
Yeshu ukuwahisha kulya mulalilo wa Shimbo sha Kupitilila
(Mateo 26:17-25; Mako 14:12-21; Yowano 13:21-30)
7Mutena wa Mankende Akubula Mumena wakumine uyo bafwaninine kuziha mwana mbelele. 8Yeshu watumine Pita na Yowano wambile kukwabo ngayi, “Yenunga mukatuwahishile mulalilo wa Shimbo sha Kupitilila ngayi mwanga tukalye.”
9Bandongesaha bepwile ngayi, “Kuti oku ukushinga ngayi tukawahishe?”
10Yeshu wakumbwile ngayi, “Oho mukengina mu munzi wawunene, mukalihangana na mulume hinga ashimba shitubo sha mema. Mukonkenu kukuma na ku litala muya akengina. 11Mukatongweze mwine litala ngayi, ‘Mulongeshi unamba ngayi, kati litala lya bayeni oku nikalila mulalilo wa Shimbo sha Kupitilila na bandongesha bami lilikuti?’ 12Niye ukamimonesha litala lyalinene lya kuyilu, linawahishiwi mwaka, muyo nimo mukatuwahishila.”
13Bandongesha bayile, bawanine ngonehe abatongwezele Yeshu. Niho bawahishile byakulya bya Shimbo sha Kupitilila.
Mulalilo wa Mwene
(Mateo 26:26-30; Mako 14:22-26; 1 Kolinte 11:23-25)
14Oho shikati shakumine, Yeshu wekalile ku tebulu hamo na bandongesha. 15Wambile kukwabo ngayi, “Nashingi shikuma kulya nenu bya Shimbo sha Kupitilila oho shilolo niyande! 16Nikumitongweza ngayi, kukalya kami bya Shimbo sha Kupitilila nifwako, hantu shinalubuluku shiwahe mu Wene wa Nyambi.”
17Yeshu watolele nkomoki, wakambililile, pe wambile ngayi, “Tambulenu, nwenumo nimwenu. 18Nikumitongweza ngayi, kukanwa kami bya mikabo ya shinyanca nifwako, hantu Wene wa Nyambi unezi.”
19Yeshu watolele linkende, wakambililile kuli Nyambi, walipabwile, pe wapanikile bandongesha bendi wambile ngayi, “Olu nilwo lutu lwami, lunapanikiwi ndaba yenu. Tendenu eshe ngayi munyanukilengaho.” 20#Yel 31:31-34. Munyima ya mulalilo watolele nkomoki wakambililile kuli Nyambi, wapanikile bandongesha bendi wambile ngayi, “Eye niyo nkomoki ya kulimama kwakupya na mukeza wami ou wunamiyitikili.
21 # Nyi 41:9. “Ngoboni, monenu! Liboko lya nou ukambeba lili nanami hano ha tebulu. 22Mwana Muntu ukafwa ngonehe Nyambi afungile, ngoboni makando wendi muntu uyo ukamubeba!”
23Pe batatikile kulipula umo na wamina ngayi, “Kati yani kukwetu ukatenda ebye?”
Nkani ha wamunene shikuma
24 #
Mat 18:1; Mak 9:34; Luk 9:46. Bandongesha balikananganishilenga mukati kabo ngayi yani ukenga wamunene shikuma. 25#Mat 20:25-27; Mak 10:42-44. Yeshu wambile kukwabo ngayi, “Bamyene ba bakamatunga bali na ngovu ha bantu, kami batulela bakuhaka kutumbiwa ngayi, ‘Bahoni ba bantu.’ 26#Mat 23:11; Mak 9:35. Ngoboni hinga kwinga noho kukwenu. Haya nimwendi ukushinga kwinga wamunene kukwenu, enge ngo wamushe, kami mukakutwaminina enge ngo mukamulimo. 27#Yowa 13:13-15. Kati wamunene yani? Ou ukwikala ku tebulu na kulya ndi ou ukumutendela mulimo? Kati kaliha ou ukwikala ku tebulu na kulya ndi? Ngoboni ami nili hakati kenu, ngonehe ou ukutenda mulimo.
28“Enu munekala nami mu byezeko nimwabyo. 29Nikamipana wene ngonehi Tate ampanine wene. 30#Mat 19:28. Mukalya na kunwa ku tebulu yami mu Wene wami, kami mukekala ha matanda na kuyata mishobo ya likumi na yibili ya Ishalela.
Yeshu ukulubulula ngayi Pita ukamukana
(Mateo 26:31-35; Mako 14:27-31; Yowano 13:36-38)
31Yeshu wambile ngayi, “Shimoni, Shimoni, yuvwilila! Shatana unalombo ngayi amipepe nimwenu ngonehe ndimi apepanga loto. 32Ngoboni nakulombelele obe Shimoni ngayi kukulupila kwobe hinga kupopa. Pe wakatenguluka, ukashumishe bawushinda wobe.”
33Pita wambile ngayi, “Mwene, naliwahishili kuya mukwingina nobe mu tolongo hinge kufwa tukafwa hamo!”
34Yeshu wambile ngayi, “Pita nikukutongweza ngayi, wushiku unobene, oho likombwe shilolo likuwe, ukankana kahatu ngayi kundimuka wufwako.”
Shikwama na shipawupawu na mukwale
35 #
Mat 10:9, 10; Mak 6:8, 9; Luk 9:3, 10:4. Yeshu wabepwile ngayi, “Oho namitumine kwakubula shikwama, hinge shipawupawu, hinge ncangwa, mwabulile shamina ndi?”
Bakumbwile ngayi, “Kaliha twabulile shamina.”
36Yeshu wambile ngayi, “Ngoboni wuluno, ou uli na shikwama hinge shipawupawu ashishimbe, na nou wakubula mukwale alandishe shivwalo shendi mwanga alande mukwale. 37#Isha 53:12. Ndaba nikumitongweza ngayi, ebye byatikitiwile binafwanini kutendiwa hahami ngayi, ‘Walabiwilile kumo na bababi,’ ndaba ebye byatikitiwile byami byafwanini kutendiwa.”
38Bandongesha bambile ngayi, “Mwene, mona! Mikwale yibili yino!”
Yeshu wakumbwile ngayi, “Kunalingana!”
Yeshu ukulombela ha Lipili lya Oliveta
(Mateo 26:36-46; Mako 14:32-42)
39Yeshu watutikile, wayile ku Lipili lya Oliveta ngonehe shiheka shendi, na bandongesha bendi bamukonkele. 40Oho akumine ku mwanya uyo, wambile kukwabo ngayi, “Lombelenu kutina mwingina mu byezeko.”
41Yeshu wafumine kukwabo shashishe, mukala wakufwanikiza kupuha limanya, washinkamine, pe walombelele ngayi, 42“Tate, ndi shikutwesheka, fumisha eye nkomoki ya makando kukwami, ngoboni hinga kutendiwa ebye nikushinga, kutendiwe shamutima wobe.” 43Lingeloyi lyafumine muyilu, lyaholokele kuli Yeshu na kumushumisha. 44Hinga akalikiza, walombelele shikuma, litengela lyendi lyengile ngo mukeza ukuvwila hanci.
45Yeshu oho amanishile kulombela, wakatukile wabokele ku bandongesha bendi, wabawanine bali mu tulo ndaba ya kuyena. 46Wambile kukwabo ngayi, “Shumangani munalanganini? Pindukenu mulombele, kutina mwingina mu byezeko.”
Kukwatiwa kwa Yeshu
(Mateo 26:47-56; Mako 14:43-50; Yowano 18:3-11)
47Oho Yeshu ushili kwamba, kwezile likunge lya bantu na Yundashi, umo wa bandongesha likumi na babili, uya wabatwaminine. Wayile kuli Yeshu na kumuzupeza. 48Ngoboni Yeshu wambile kukwendi ngayi, “Yundashi, kati ukubeba Mwana Muntu na kumuzupeza ndi?”
49Bandongesha bekalile hahepi na Yeshu oho bamonene ebye byatendiwilenga, bepwile Yeshu ngayi, “Mwene, tulwe na mikwale ndi?” 50Umo wabo waketwile litu lya shilyo lya ndungo wa Mukulwane wa Bakankombela Nimwabo.
51Ngoboni Yeshu wambile ngayi, “Lehenusho!” Wakwatile litu lya uya ndungo, pe wamunyongomanishile.
52Niho Yeshu ambile ku bakankombela ba bakulwane na babilolo ba mu Litala lya Nyambi na bakulwane ba Bayunda bezile kukwendi mukulwisha ngayi, “Munezi na mikwale na mishako mukunkwata ngo nili mwizi ndi? 53#Luk 19:47, 21:37. Nekalile nenu matena nimwawo mu Litala lya Nyambi, ngoboni kaliha mwankwatile. Ngoboni shino shinengi shikati shenu, na sha ngovu za mincimpwe.”
Pita ukukana Yeshu
(Mateo 26:57-58, 69-75; Mako 14:53-54, 66-72; Yowano 18:12-18, 25-27)
54Niho bakwatile Yeshu, bamutwalile ku litala lya Mukulwane wa Bakankombela Nimwabo. Pita wakonkelenga hahatali. 55Bayibikile mundilo mu shipango, pe Pita wekalile hamo na baya bekalileko. 56Niho mbuyama umo mukamilimo amumonene hayota mundilo, wamuconcomekele, pe wambile ngayi, “Ou muntu naniye kami wekalilenga na Yeshu!”
57Ngoboni Pita wakanine ngayi, “Mbuyama, kumulimuka nifwako!”
58Oho kwapitile kashikati kakashe, muntu umo wamonene Pita, pe wambile ngayi, “Nobe kami uli umo wabo!”
Ngoboni Pita wambile ngayi, “Obe mulume kaliha ami!”
59Kunyima ya shikati shimo, niho kwezile wamina kami, wazaminine ngayi, “Mwashikuma ou muntu naniye kami wekalilenga nendi, ndaba wa Kungalileya!”
60Ngoboni Pita wambile ngayi, “Obe mulume, kulimuka ebye ukwamba nifwako!”
Oho ushili kwamba, likombwe lyakuwile. 61Mwene wafutukile watilaminine Pita. Niho Pita anukile lizu liya ambile Yeshu kukwendi ngayi, “Oho likombwe shilolo likuwe lelo, obe ukankana kahatu.” 62Pita watutikile hamunkanda, pe walilile shikuma.
Yeshu ukukumangiziwa na kukamiwa
(Mateo 26:67-68; Mako 14:65)
63Balume aba balaminenga Yeshu, bamukumangizile kami bamukamine, 64bamufwikile ku meho, pe bambile ngayi, “Toya, ou unakukama yani?” 65Bambile mazu amengi akumuhandula.
Yeshu ukuyatishiwa
(Mateo 26:59-66; Mako 14:55-64; Yowano 18:19-24)
66Oho kwashile, bakulwane ba Bayunda na bakankombela ba bakulwane na bakakulongesha ndayano bakungulukile, pe bamutwalile ku nkuta yabo. 67Bambile ngayi “Tutongweze ndi obe Kilishitu.”
Yeshu wakumbwile ngayi, “Ndi nikamitongweza, kukankulupila mufwako, 68hinge ndi nikamipula, kukankumbula mufwako. 69Ngoboni wuluno Mwana Muntu ukekala ku liboko lya shilyo lya Nyambi Mpandashilanga.”
70Nimwabo bepwile ngayi, “Kati obe Mwana Nyambi ndi?”
Yeshu wakumbwile ngayi, “Munamba shiwahe ngayi ami.”
71Niho bambile ngayi, “Bihi tushili kushinga wupaki wamina kami? Tunaliyuvwili ebye anamba.”
Currently Selected:
Luka 22: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.
