Mateo 19
19
Yeshu ukulongesha ha bya kuziha maluwo
(Mako 10:1-12)
1Oho Yeshu amanishile kwamba byuma ebye, wafumine ku Ngalileya, pe wezile mu litunga lya Yundeya munciza ya Yondana. 2Makunge amanene a bantu bamukonkele, pe wabanyongomanishile.
3Bafwalishi bamo bezile kukwendi mukumwezeka, pe bamwipwile ngayi, “Kati ndayano zikuyitabilisha ngayi muntu azihe maluwo ha shambo nimwasho ndi?”
4 # Shit 1:27, 5:2. Yeshu wakumbwile ngayi, “Kati shilolo mulabe ngayi kufuma ku kutatika Shakalenga wabalengele mulume na mukazi ndi? 5#Shit 2:24. Pe Nyambi wambile ngayi, ‘Ndaba yaneshe mulume ukashiya tatiyendi na mandiyendi na kuliwana na mukazendi, babili bakenga lutu lumo.’ 6Nohobene hibafwako kukenga babili, ngoboni bakenga lutu lumo. Nohobene eshe Nyambi anawaniki hamo muntu hinga ashitapulula.”
7 # Nday 24:1-4; Mat 5:31. Bambile kukwendi ngayi, “Shumangani boni Moshesha wetabilile mulume kupanika mukazi lin̄wati lya maluwo akumulubula?”
8Yeshu wabatongwezele ngayi, “Moshesha wetabilile kuziha maluwo ndaba ya wukalu wa mitima yenu, ngoboni kufuma ku kutatika kaliha kwekalile noho. 9#Mat 5:32; 1 Koli 7:10-11. Nami nikwamba kukwenu ngayi, muntu nimwendi ukaziha maluwo ukutanda mukazendi ndaba ya mulandu wamina, kwakubula wa wunjenge, ndi ukuyeka wamina, pe ukutenda wunjenge.”
10Bandongesha bambile kukwendi ngayi, “Ndi shilinoho ku mulume na mukazendi, pe kaliha shashiwahe kuyeka.”
11Yeshu wakumbwile ngayi, “Kaliha ngayi bantu nimwabo bakutwesha kutenda noho, ndele baya bekala na shitapilo shanahiyo. 12Ndaba bakakubula kuyeka bamo, bahemuwile nahiyo mu mavumo a bamandizabo, kami bakakubula kuyeka bamina batendiwa nahiyo ku bantu, kami bakakubula kuyeka bamina banalitende nahiyo nibo bamwine ndaba ya Wene wa muyilu. Wakutwesha kutambula eshe, ashitambule.
Yeshu ukutandalisha batwanuke babashe
(Mako 10:13-16; Luka 18:15-17)
13Niho baletele kukwendi batwanuke ngayi akambike maboko wendi hahabo na kubalombelela, ngoboni bandongesha bakalihilile baya babaletelele bantu. 14Ngoboni Yeshu wambile ngayi, “Lehenu batwanuke babashe beze kukwami hinga mubakanisha, ndaba Wene wa muyilu wa baya bakufweka ngo aba.” 15Wakambikile maboko wendi hahabo, pe niho ayile.
Ndumbana wakuheta
(Mako 10:17-31; Luka 18:18-30)
16Niho kwezile mulume kukwendi, pe wamwipwile ngayi, “Mulongeshi, shuma shiti shashiwahe nikufwanina kutenda ngayi niwane wumi wa mwayile myaka?”
17Yeshu wakumbwile ngayi, “Kati bihi ukunyipwila ngayi shashiwahe shiti? Kwekala tuhu wamuwahe umo. Ngoboni ndi ukushinga kwingina mu wumi, ombatala ndayano.”
18 # Kut 20:13-16; Nday 5:17-20. Uya mulume wepwile ngayi, “Ndayano ngani?”
Yeshu wakumbwile ngayi, “Hinga wuziha, hinga wutenda wunjenge, hinga wuyiba, hinga wupaka mahalo, 19#Kut 20:12; Nday 5:16; Bal 19:18. lemeka tatiyobe na mandiyobe, kami haka ndambo yobe nehi walihaka obe mwine.”
20Uya ndumbana wakumbwile ngayi, “Ebye nimwabyo nabilama. Haya nafwanini kutenda bihi kami?”
21Yeshu wambile kukwendi ngayi, “Ndi ukushinga kulembuka, yanga ukalandishe wuheti wobe mwanga upanike mali ku bakushepwa, pe ukekala na wuheti muyilu. Niho wize unkonke.”
22Uya ndumbana oho ayuvwile lizu elye, wayile hinga ayena, ndaba wekalile na wuheti wawingi shikuma.
23Niho Yeshu atongwezele bandongesha bendi ngayi, “Mwashikuma nikwamba kukwenu ngayi, shikenga shashikalu ku mukakuheta kwingina mu Wene wa muyilu. 24Kami nikumitongweza ngayi, shinengi shawangu kamela kwingina mu liho lya nconga, kupitakana muntu wakuheta kwingina mu Wene wa Nyambi.”
25Oho bandongesha bayuvwile noho, bakomokele shikuma, niho bepwile ngayi, “Pe boni yani ukatwesha kupuluka?”
26Ngoboni Yeshu wabatilaminine, pe wambile kukwabo ngayi, “Ku bantu kutwesheka shifwako, ngoboni kuli Nyambi byuma nimwabyo bikutwesheka.”
27Nohobene Pita wakumbwile ngayi, “Mona, etu tunashiyi byuma nimwabyo tunakukonko. Haya tukawana bihi?”
28 #
Mat 25:31; Luk 22:30. Yeshu wambile kukwabo ngayi, “Mwashikuma nikwamba kukwenu ngayi, Mwana Muntu ukekala ha litanda lya wuwahe wendi mu kaye kakapya, enu mukunkonka, mukekala ha matanda likumi na abili, mu kuyata mishobo likumi na yibili ya Ishalela. 29Kami muntu nimwendi unashiyi matala, hinge bawushinda wendi, hinge bampanzendi, hinge tatiyendi, hinge mandiyendi, hinge bana bendi, hinge mafuba wendi ndaba ya lizina lyami, ukatambula byakupitakana wingi wa myanda, kami ukakona wumi wa mwayile myaka. 30#Mat 20:16; Luk 13:30. Ngoboni babengi aba banalimeneke, bakenga ba mamaninino, na ba mamaninino, bakenga bakakulimeneka.
Currently Selected:
Mateo 19: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.
