Mateo 22
22
Nguli ya shimbo sha shinawenga
(Luka 14:15-24)
1Yeshu kami wambile kukwabo mu zinguli ngayi, 2“Wene wa muyilu wenga ngo mwene wamina wapingile shimbo sha shinawenga sha mwanendi wa mulume. 3Watumine bakamilimo bendi kuya na kutongweza baya behaniwile ku shinawenga ngayi beze, ngoboni nibo bakanine kwiza. 4Niho kami atumine bakamilimo bamina kuya mukutongweza obo behaniwile ngayi, ‘Nawahisha kale byakulya, nazihi mapulu na bana ba bangombe ba kushuwa, pe byuma nimwabyo byawahakale. Yekenu kushimbo sha shinawenga!’ 5Ngoboni nibo balimbwilile, umo wabo wayile ku mfuba yendi, wamina wayile ku mikwebo yendi, 6bamina bakwatile bakamilimo bendi, babatendele shibi na kubaziha. 7Mwene wapilamine shikuma, watumine bakanzita bendi kuya mukuziha aba bakakupununa na kuhokesha munzi wabo. 8Niho ambile ku bakamilimo bendi ngayi, ‘Shinawenga shawaha kale, ngoboni aba banehaniwi kufwanina bafwako. 9Haya, yenunga mu zinzila nimwazo, nimwabo mukawana mukabehane ngayi beze ku shinawenga.’ 10Nohobene bakamilimo bendi bayile mu zinzila, niho bakungwile bantu nimwabo bawanine, bababi na babawahe. Pe litala lya shinawenga lyenzalile na bantu.
11“Ngoboni oho mwene enginine mukumona obo bekalile ku kulya, wamonene muntu wabulile kuvwala shivwalo sha shinawenga. 12Wambile kukwendi ngayi, ‘Muhoni, unezi nahiti muno kwakubula shivwalo sha shinawenga?’ Uyo muntu wabulile byakwamba. 13#Mat 8:12, 25:30; Luk 13:28. Niho Mwene ambile ku bakamilimo bendi ngayi, ‘Mumangenu ku maboko na ku mawulu, muyumbilenu hamunkanda mu mincimpwe, kuyo kukekala kulila na kulikekenya ku mayewe.’
14“Ndaba babengi banehaniwi, ngoboni babashe banahatiwi.”
Liyipu lya ha kutela mutelo
(Mako 12:13-17; Luka 20:20-26)
15Niho Bafwalishi bayile na kulyambashana hamo ngayi bamukwate na mazu wendi. 16Batumine bandongesha babo na bantu ba Helonda obo bambile kukwendi ngayi, “Mulongeshi, tukulimuka ngayi wenga wakupwisha, kami walongeshanga nzila ya Nyambi mukupwisha. Kami kulikekula ebye bakuhanganika bantu wufwako. Ndaba ukubula kuhota muntu. 17Nohobene tutongwezeko eshe ukuhanganika! Kati shinafwanini kutela mutelo kuli Nkeshali ndi byo?”
18Ngoboni Yeshu walimukile bihanganiko byabo byabibi, wambile ngayi, “Enu bakashishweka ndabangani muli na kunyezeka? 19Moneshenu mali a mutelo!” Pe bamuletelele aya mali. 20Niho Yeshu abepwile ngayi, “Shifwekesha shayani eshe shili ha mali? Kati lizina linatikitiwi lya yani?”
21Bamukumbwile ngayi “Bya Nkeshali.”
Niho Yeshu abatongwezele ngayi, “Panikenu Nkeshali byuma bya Nkeshali, kami panikenu Nyambi byuma bya Nyambi.”
22Oho bayuvwile awa mazu, bakomokele. Pe ba mushiyile.
Liyipu lya ha kushanguka ku bafu
(Mako 12:18-27; Luka 20:27-40)
23 #
Mil 23:8. Ha mutena bene uyo, kwezile Bashanduki kukwendi, baya bambanga ngayi kowa kushanguka ku bafu. 24#Nday 25:5. Bepwile Yeshu ngayi, “Mulongeshi, Moshesha wambile ngayi, ndi mulume unafu kwakubula kushiya bana, pe mukonzowendi nafwanini kuyeka uya mfwile, mwanga abelekeleko yayiyendi bana. 25Haya kukwetu kwekalile balume mutanu na babili bana ba muntu umo, wa kutatika wamuyekele, pe wafwile nakubula kubeleka nendi bana, pe washiyile mukazendi kuli mukonzowendi. 26Niho kami mukonzowendi wa wubili wafwile, nawa wuhatu kukuma kuwa mutanu na babili. 27Ku mamaninino na uya mukazi kami wafwile. 28Nohobene, oho ha kushanguka ku bafu, uya mukazi ukenga wayani ku baya balume mutanu na babili ndaba nimwabo bamuyekele?”
29Yeshu wakumbwile ngayi, “Munayongo! Ndaba kulimuka byatikitiwile mufwako hinge kulimuka ngovu za Nyambi mufwako. 30Ndaba ku kushanguka kwa bafu, bantu kukayeka bafwako, ngoboni bakenga nehe mangeloyi a muyilu. 31Ngoboni bya kushanguka kwa bafu, kati shilolo mulabe eshe Nyambi ambile kukwenu ngayi, 32#Shi 3:6. ‘Ami Nyambi wa Abulahama na Nyambi wa Ishake na Nyambi wa Yakobo, kaliha niye Nyambi wa bafu, ngoboni wa babomi.”
33Oho makunge a bantu bayuvwile eshe, bakomokele kulongesha kwendi.
Ndayano zazinene
(Mako 12:28-34; Luka 10:25-28)
34Oho Bafwalishi bayuvwile ngayi unamweneshe Bashanduki, bakungulukile hamo, 35#Luk 10:25-28. niho umo wa bakakulongesha ndayano wamwezekele na liyipu, 36wamwipwile ngayi, “Mulongeshi, kati ndayano zazinene ku nimwazo ziti?”
37 # Nday 6:5. Yeshu wakumbwile ngayi, “Haka Mwene Nyambi yobe na mutima wobe nimwawo na moyo wobe nimwawo na ngana zobe nimwazo. 38Nizo ndayano zazinene na za muntazi. 39#Bal 19:18. Za wubili zakufweka ngo eze, ‘Haka ndambo yobe ngonehe walihaka obe mwine.’ 40Ndayano za Moshesha nimwazo na kulongesha kwa bamiluwe, kunemana ha ndayano eze zibili.”
Kilishitu wenga Mwana yani
(Mako 12:35-37; Luka 20:41-44)
41Oho Bafwalishi bakungulukile hamo, pe Yeshu wabepwile ngayi, 42“Enu mukuhanganika nahiti bya Kilishitu? Kati wenga Mwana yani?”
Bamukumbwile ngayi, “Wenga mwana Ndavita.”
43Yeshu wambile kukwabo ngayi, “Nahiti Ndavita niye mwine oho wamutwaminine Moyo Wakuyela wamutoyele ngayi, ‘Mwene?’ Ndaba Ndavita wambile ngayi,
44 # Nyi 110:1. ‘Mwene wambile kuli Mwene yami ngayi,
Yikala ku liboko lyami lya shilyo,
hantu nayaka bakankole bobe ku malyatilo a mawulu wobe.’
45“Nohobene Ndavita ndi ukumutoya ngayi, ‘Mwene,’ pe ukwinga mwanendi nahiti?”
46Kowa muntu watweshele kumukumbula hinge lizu limo, kufuma ku mutena uyo kowa muntu wakancile kumwipula mayipu amina.
Currently Selected:
Mateo 22: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.
