Mateo 26

Bihanganiko bya kubebiwa kwa Yeshu

(Mako 14:1-2; Luka 22:1-2; Yowano 11:45-53)

1Oho Yeshu amanishile kubalongesha ebye nimwabyo, wambile ku bandongesha bendi ngayi, 2#Kut 12:1-27. “Nka himulimuka ngayi munyima ya matena abili kukekala Shimbo sha Kupitilila, kami Mwana Muntu ukapanikiwa ngayi akolekiwe.”

3Niho bakankombela ba bakulwane na bakulwane ba Bayunda bakungulukile hamo ku musheke wa Kayafwashi Mukulwane wa Bakankombela Nimwabo, 4pe balyambashanine hamo ngayi bakwate Yeshu na kushoshoka mwanga bamuzihe. 5Ngoboni bambile ngayi, “Kaliha ha mutena wa shimbo, kutinisha mushunga mukati ka bantu.”

Yeshu ukuwabishiwa ku Mbetani

(Mako 14:3-9; Yowano 12:1-8)

6Yeshu wekalile ku Mbetani mu litala lya Shimoni ou wekalile na bimakwa. 7#Luk 7:37-38. Oho ekalile na kulya, mbuyama wezile na mushashi wenzalile na mazi akunuka shiwahe a ndando yayinene, pe wawayitilile ha mutwe wa Yeshu.

8Oho bandongesha bendi bamonene noho, bapilamine, pe bepwile ngayi, “Ndaba ngani ukuyandisha awa mazi? 9Awa mazi akutwesha kulandishiwa na ndando yayinene, ngayi mali apanikiwe ku bakakushepwa.”

10Oho Yeshu alimukile ebye bambilenga. Pe wambile kukwabo ngayi, “Shumangani mukuyandishila ou mbuyama? Ndaba unatende shuma shashiwahe kukwami. 11#Nday 15:11. Bakakushepwa mwekala nabo shikati nimwasho, ngoboni ami kwikala nenu shikati nimwasho nifwako. 12Ou mbuyama nawabishi awa mazi ha lutu lwami, kuluwahishila kufundiwa. 13Mwashikuma nikwamba kukwenu ngayi, oku zikashimikiwa eze ncango zaziwahe muno mu kaye nimwako, eshe anatende ou shikashimikiwa, pe shikenga shakumwanukila.”

Yundashi ukwitabila kubeba Yeshu

(Mako 14:10-11; Luka 22:3-6)

14Niho umo ku balikumi na babili, ou watumbiwile Yundashi Ishikalyote, wayile ku bakankombela ba bakulwane, 15#Zeka 11:12. pe wabepwile ngayi, “Mukampana bishini ndi nikupana Yeshu kukwenu?” Niho bamupanine makumi ahatu a mali a muwayawaya wa shiliva. 16Kufuma hayo Yundashi washingilenga shikati shakufwanina kupana Yeshu kukwabo.

Yeshu ukulya mulalilo wa Shimbo sha Kupitilila na bandongesha bendi

(Mako 14:12-21; Luka 22:7-13, 21-23; Yowano 13:21-30)

17Ha mutena wa kutatika wa Shimbo sha Mankende Akubula Mumena, bandongesha bezile kuli Yeshu, pe bambile kukwendi ngayi, “Kati oku ukushinga ngayi tukawahishe mwanga ukalileko bya Shimbo sha Kupitilila kuti?”

18Wambile kukwabo ngayi, “Yenunga mu munzi, pe mukawana muntu umo, pe mukambe kukwendi ngayi, ‘Mulongeshi unamba ngayi shikati shami shili hahepi, nikatendela Shimbo sha Kupitilila ku litala lyobe hamo na bandongesha bami.’ ”

19Bandongesha batendele ngonehe abatongwezele Yeshu, pe bawahishile bya Shimbo sha Kupitilila.

20Oho kwengile mazolo, Yeshu wekalile ku tebulu na bandongesha bendi likumi na babili. 21Oho balilenga Yeshu wambile kukwabo ngayi, “Mwashikuma nikumitongweza ngayi, umo kukwenu ukambeba.”

22Bandongesha bayenene shikuma, pe umo na umo wamwipwile ngayi, “Mwene, kampe ami ndi?”

23 # Nyi 41:9. Yeshu wakumbwile ngayi, “Ou unatanta mu lulonga hamo nanami ukambeba. 24Mwana Muntu ukafwa ngonehe kwatikitiwile byendi, ngoboni makando wendi uya muntu ukabeba Mwana Muntu! Shashiwahe shinga ngayi uya muntu kaliha wahemuwile!”

25Niho Yundashi, ou wamubebele ambile ngayi, “Mulongeshi, kati ami ndi?” Yeshu wakumbwile ngayi, ‘Unamba.’ ”

Mulalilo wa Mwene

(Mako 14:22-26; Luka 22:14-20; 1 Kolinte 11:23-25)

26Oho balilenga, Yeshu watolele linkende, wakambililile kuli Nyambi, walipabwile, pe wapanikile bandongesha bendi wambile ngayi, “Tambulenu mulye, olu nilo lutu lwami.”

27Niho kami atolele shinwino, oho akambililile kuli Nyambi, wabapanikilesho, pe wambile ngayi, “Nwenumo nimwenu, 28#Kut 24:8; Yel 31:31-34. owe niwo mukeza wami wa kulimama kwakupya* ou unetikili bantu babengi ndaba yakuyatila kwa wubi. 29Nikumitongweza ngayi, kukanwa kami bya mikabo ya shinyanca nifwako, hantu ha mutena uyo oho nikanwa byabipya hamo nanenu kami mu Wene wa Tate.”

30Oho bembilile lwimbo, pe batutikile bayile ku Lipili lya Oliveta.

Yeshu ukulubulula kukana kwa Pita

(Mako 14:27-31; Luka 22:31-34; Yowano 13:36-38)

31 # Zeka 13:7. Niho Yeshu ambile kukwabo ngayi, “Nimwenu mukatina na kunciya wushiku walelo. Ndaba kwatikitiwa ngayi, ‘Nikakama mulishani, pe bambelele bakapanzana.’ 32#Mat 28:16. Ngoboni oho nakashanguka, nikaya kumbili yenu ku Ngalileya.”

33Pita wakumbwile ngayi, “Hinge ndi nimwabo bakatina na kushiya, ami nifwako!”

34Yeshu wambile kuli Pita ngayi, “Mwashikuma nikwamba kukwobe ngayi, wushiku unobene oho likombwe shilolo likuwe, obe ukankana kahatu.”

35Ngoboni Pita wambile ngayi, “Kukakukana nifwako, hinge kufwa tukafwa hamo.”

Pe bandongesha nimwabo bambile nahiyo.

Yeshu ukulombela mu Ngeteshemani

(Mako 14:32-42; Luka 22:39-46)

36Niho Yeshu ayile na bandongesha bendi ku mbalila yatumbiwile Ngeteshemani, pe wambile kukwabo ngayi, “Ikalenu kuno oho nishili kuya kuyo na kulombela.” 37Washimbile Pita na bana ba Zebende babili wayile nabo. Yeshu watatikile kuyena na kukalikiza. 38Niho ambile kukwabo ngayi, “Moyo wami unayene shikuma kutwala ku kufwa. Ikalenu kuno kami tonenu hamo nanami.”

39Wayile kumbili shashishe, waliwishilile hanci wafulumanine, pe walombelele ngayi, “Obe Tate, ndi shikutwesheka, fumisha eshe shinwino kukwami! Ngoboni hinga kutendiwa ebye nikushinga, kutendiwe shifungo shobe.”

40Niho abokele ku baya bandongesha bahatu wabawanine bali mu tulo, pe wambile kuli Pita ngayi, “Kati enu kutwesha kutona nanami hinge shikati shimo mufwako ndi? 41Tonenu na kulombela ngayi hinga mwingina mu byezeko. Moyo hiwushinga, ngoboni lutu lunapopo.”

42Wayile na kulombela ka wubili ngayi, “Obe Tate, ndi shifwako kutwesheka eshe shinwino kufuma kukwami ndele ngayi ninwe, shifungo shobe shitendiwe.” 43Oho abokele kami, wabawanine bali mu tulo, ndaba meho wabo engile amalemu.

44Wabashiyile, pe wayile kami na kulombela ka wuhatu, wambile mazu amo. 45Niho abokele ku bandongesha bendi, wambile kukwabo ngayi, “Kati nihano mushili mu tulo na kuliyuvwilila ndi? Monenu! Shikati shili hahepi, Mwana Muntu uli na kupanikiwa mu maboko a bakawubi. 46Katukenu, tuyenunga. Monenu, niye ukumbeba uli hahepi!”

Kukwatiwa kwa Yeshu

(Mako 14:43-50; Luka 22:47-53; Yowano 18:3-12)

47Yeshu oho ushili kwamba, Yundashi umo ku balikumi na babili wakumine. Pe wezile na likunge lya bantu babengi bashimbile mikwale na mishako, bafumine ku bakankombela ba bakulwane na bakulwane ba Bayunda. 48Ou wamubebele wabatongwezele shilimukisho ngayi, “Ou nikazupeza niye muntu mukushinga, pe mumukwate.”

49Wanguwangu oho Yundashi akumine, wayile kuli Yeshu, pe wambile ngayi, “Shangwe, Mulongeshi!” Niho amuzupizile.

50Yeshu wambile kukwendi ngayi, “Muhoni, tenda ebi unezili.”

Niho bantu bakwatile Yeshu, pe bamumangile. 51Umo kubaya bekalile na Yeshu wahomwene mukwale wendi, wakumatile ndungo wa Mukulwane wa Bakankombela Nimwabo, pe wamuketwile litu.

52Niho Yeshu ambile kukwendi ngayi, “Bokesha mukwale wobe mu shipushu, ndaba nimwabo bakulwisha na mukwale, bakafwa ku mukwale. 53Enu mukuhanganika ngayi nifwako kutwesha kunyepa kuli Tate, kami niye ukatwesha kuntumina makunge a mangeloyi likumi na abili ndi? 54Ngoboni ndi shikutendiwa noho, haya byatikitiwile bikatendiwa nahiti, ebye binafwanini ngayi bitendiwe?”

55 # Luk 19:47, 21:37. Ha shikati shiyo Yeshu wambile ku makunge a bantu ngayi, “Munezi na mikwale na mishako mukunkwata ngo nili mwizi ndi? Nekalile matena nimwawo na kulongesha mu Litala lya Nyambi, ngoboni kaliha mwankwatile. 56Ngoboni nimwabyo ebye binatendiwi ngayi byatikitiwile ku bamiluwe bitendiwe.”

Niho bandongesha bendi nimwabo bamushiyile, pe batinine.

Yeshu ukuyatiwa

(Mako 14:53-65; Luka 22:54-55, 63-71; Yowano 18:13-14, 19-24)

57Pe baya bakwatile Yeshu bamutwalile kuli Kayafwashi Mukulwane wa Bakankombela Nimwabo, oku bakungulukilile bakakulongesha ndayano na bakulwane ba Bayunda. 58Ngoboni Pita wakonkelenga hahatali kukuma na ku shinzanza sha Mukulwane wa Bakankombela Nimwabo. Niho enginine mu shinzanza, pe wekalile hamo na bakakulama ngayi amone ebye bikutendiwa. 59Bakankombela ba bakulwane na bakankuta nimwabo, bashingilenga wupaki wa mahalo wa kuyata nawo Yeshu ngayi bamuzihe. 60Ngoboni kaliha bawuwanine, hinge ndi kwezile bapaki babengi ba mahalo. Ku mamaninino kwezile bapaki babili, 61#Yowa 2:19. baya bambile ngayi, “Ou muntu wambile ngayi, ‘Nikutwesha kushandula Litala lya Nyambi na kulitenda mu matena ahatu.’ ”

62Mukulwane wa Bakankombela Nimwabo wemanine, pe wambile kuli Yeshu ngayi, “Kati kukumbula kunebye balinakwamba hahobe wufwako ndi?” 63Ngoboni Yeshu wamwenene. Niho kami Mukulwane wa Bakankombela Nimwabo ambile kukwendi ngayi, “Nikubeza mu lizina lya Nyambi wakuyoya ngayi, tutongweze ndi obe Kilishitu Mwana Nyambi.”

64 # Ndan 7:13. Yeshu wamukumbwile ngayi, “Unamba. Ngoboni nikwamba kukwenu nimwenu ngayi kumbili mukamona Mwana Muntu hinga ekala ku liboko lya shilyo lya Mpandashilanga heza ha makumbi a muyilu.”

65 # Bal 24:16. Niho Mukulwane wa Bakankombela Nimwabo atabwile bivwalo byendi, pe wambile ngayi, “Unahandulu Nyambi! Haya bihi kami tukushingila wupaki? Ndaba munayuvwu lihandu lyendi. 66Mukuhanganika nahiti?”

Bakumbwile ngayi, “Unafwanini kufwa.” 67#Isha 50:6. Niho bamufwizilile mate ku lupala lwendi, pe bamukamine. Bamina bamukamine zimbanda. 68Pe bambile ngayi, “Obe Kilishitu, tulubulwile, yani unakukama?”

Pita ukukana Yeshu

(Mako 14:66-72; Luka 22:56-62; Yowano 18:15-18, 25-27)

69Oho Pita ekalile hamunkanda ku shinzanza, mbuyama umo wa bakamilimo ba Mukulwane wa Bakankombela Nimwabo wezile kukwendi, pe wambile ngayi, “Nanobe kami wekalilenga na Yeshu wa ku Ngalileya.”

70Ngoboni Pita wakanine mukati ka bantu nimwabo ngayi, “Kulimuka nifwako ebye ukwamba.” 71Oho Pita ayile mu mazezelo a shinzanza, mbuyama wamina wamumonene, pe wambile na baya bemanine kuyo ngayi, “Ou muntu wekalilenga na Yeshu wa ku Nazaleta.”

72Niho Pita akanine na kubeza ngayi, “Kulimuka ou muntu nifwako.”

73Oho kwapitile ka shikati kakashe, baya bemanine kuyo bezile kuli Pita, bambile ngayi, “Mwashikuma uli umo wabo, ndaba nyambilo yobe yikukutontolola.”

74Niho Pita atatikile kulikuta niye mwine na kubeza ngayi, “Kulimuka ou muntu nifwako.”

Nohobene likombwe lyakuwile, 75niho Pita anukile lizu liya ambile Yeshu ngayi, “Oho likombwe shilolo likuwe, ukankana kahatu.” Niho atutikile hamunkanda, pe walilile shikuma.

Currently Selected:

Mateo 26: KK2008

Highlight

Copy