Mako 11
11
Yeshu ukwingina mu Yelushalema
(Mateo 21:1-11; Luka 19:28-40; Yowano 12:12-19)
1Oho bahenyenene ku Yelushalema, bezile kwakwipi na minzi ya Mbetefwange na Mbetani, ku Lipili lya Oliveta. Yeshu watumine bandongesha bendi babili, 2wambile kukwabo ngayi, “Yenunga ku munzi uli kumbili yenu, oho mukenginamo, mukawana mwana mbongolo namangiwi, uya wabula kuliyavwishiwa ku muntu. Mukamushobole, pe mumulete kuno. 3Ndi muntu ukamipula ngayi ndabangani mukutenda noho, mukambe ngayi Mwene uli na kumushinga, wuluno amubweshe.”
4Pe bayile, bawanine mwana mbongolo namangiwi ku shipana sha litala ku nkumo ya mukwakwa, niho bamushobolwele. 5Bamo baya bemanine kuyo, bambile kukwabo ngayi, “Mukutenda bishini nanowo mbongolo muli na kushobola?”
6Bandongesha bambile kukwabo ngonehe abatongwezele Yeshu. Bayo bantu niho babalehele ngayi baye nendi. 7Baletele mwana mbongolo kuli Yeshu, pe bantu bayalile bivwalo byabo ha mbongolo, niho Yeshu akandamineho. 8Bantu babengi bayalile bivwalo byabo mu nzila, bamina batemene myahi ya mitondo ya mu mafuba bayiyalile mu nzila. 9#Nyi 118:25-26. Bantu bekalile kumbili yendi na baya bezilenga munyima, batatikile kubilikiza ngayi, “Hoshana! Kulemeshiwe niye ukwiza mu lizina lya Mwene! 10Kulemeshiwe kwiza kwa wene wa tatiyetu Ndavita! Hoshana muyilu ya mayilu!”#11:10 Hoshana: Lizu lya Shihebelu likutontolola ngayi, “Lamwina.”
11Yeshu wenginine mu Yelushalema, niho ayile mu Litala lya Nyambi. Watilaminine byuma nimwabyo, ngoboni ndaba ya kumona ngayi mutena walelakale, wafuminemo wayile ku Mbetani hamo na bandongesha likumi na babili.
Yeshu ukukuta mutondo wa mukuyu
(Mateo 21:18-19)
12Oho kwashile, hakufuma ku Mbetani, Yeshu wekalile na nzala. 13Wamonene mutondo wa mukuyu na mabizi awo hahatali. Wayileko mukumona ndi ukuwanako mikabo, ngoboni oho akumineko, kaliha wawanineko mikabo ndele mabizi tuhu. Ndaba shikati shakuhoka kwa nkuyu kaliha shakumine. 14Niho ambile ku mutondo uyo ngayi, “Hinga kukekala muntu wakulyako mikabo yobe kami!”
Bandongesha bendi bayuvwileko.
Yeshu ukutanda bakakulandishila mu Litala lya Nyambi
(Mateo 21:12-17; Luka 19:45-48; Yowano 2:13-22)
15Oho bakumine mu Yelushalema, Yeshu wenginine mu Litala lya Nyambi, pe watatikile kutanda bayo balandishilenga na bayo balandilenga. Wawishilile zitebulu hanci za bakakutambashana mali na bipona bya bayo balandishilenga bankilimba. 16Kaliha wetabilile ngayi muntu apite mu shipango sha Litala lya Nyambi hinga ashimba shamina. 17#Isha 56:7; Yel 7:11. Pe wabalongeshele ngayi, “Kati kaliha kwatikitiwile ngayi, ‘Litala lyami likatumbiwa ngayi litala lya malombelo lya bantu ba matunga nimwawo ndi?’ Ngoboni enu munalifutulu kwinga liteke lya bezi.”
18Bakakulongesha ndayano na bakankombela ba bakulwane oho bayuvwile eshe, bashingile nzila ya kuzihilamo Yeshu. Bamutinine, ndaba likunge lya bantu nimwabo bakomokele kulongesha kwendi.
19Oho kwengile mazolo, Yeshu na bandongesha bendi bafumine mu Yelushalema.
Shilongesha sha ha mutondo wa mukuyu
(Mateo 21:20-22)
20Kwashile lumenemene, oho bapitilenga mu nzila bamonene mutondo wa mukuyu unayumu nimwawo kukuma na ku mipishi yawo. 21Niho Pita anukile, wambile ngayi, “Hekulu, mona mutondo wa mukuyu uya wakuta unayumu!”
22Yeshu wabakumbwile ngayi, “Ikalenu na kukulupila muli Nyambi. 23#Mat 17:20; 1 Koli 13:2. Mwashikuma nikwamba kukwenu ngayi, muntu nimwendi ukamba ku lipili elye ngayi, ‘Katuka uliyumbile mu liwate,’ kami hinga abula nkani mu mutima wendi, ngoboni ukukulupila ngayi eshe anamba shikatendiwa, pe ukapanikiwa noho. 24Nohobene nikwamba kukwenu ngayi, nimwasho mukanyepa mu malombelo, kulupilenu ngayi munashitambulu, kami shikenga shenu. 25#Mat 6:14-15. Kami oho mukwimana na kulombela, ndi muli na shambo na muntu wamina mumuyatile, ngayi mwanga Tatiyenu wa muyilu, amiyatile milandu yenu. 26Ngoboni ndi mukubula kuyatila, kami Tatiyenu wa muyilu ukabula kumiyatila milandu yenu.”
Liyipu lya ha ngovu za Yeshu
(Mateo 21:23-27; Luka 20:1-8)
27Babokele kami mu Yelushalema. Oho Yeshu endelenga mu shipango sha Litala lya Nyambi, bakankombela ba bakulwane na bakakulongesha ndayano na bakulwane ba Bayunda bezile kukwendi, 28pe bamwipwile ngayi, “Kati ukutenda byuma ebye na ngovu ngani? Kami yani wakupanine eze ngovu zakutenda byuma ebye?”
29Yeshu wakumbwile kukwabo ngayi, “Nami nikumipula liyipu limo, ndi mukunkumbula, pe nikamitongweza eze ngovu nikutenda nazo byuma ebye. 30Kati kuzubilisha kwa Yowano, kwafumine muyilu, ndi kwafumine ku bantu? Nkumbulenu.”
31Niho batatikile kulikananganisha mukati kabo ngayi, “Ndi tukwamba ngayi, ‘Kwafumine muyilu,’ pe niye ukatwipula ngayi, ‘Ndaba ngani mwabulile kumukulupila?’ 32Ngoboni ndi tukwamba ngayi, ‘Kwafumine ku bantu’ (Batinine, ndaba bantu nimwabo balimukile ngayi mwashikuma Yowano wengile muluwe.”)
33Bakumbwile Yeshu ngayi, “Kulimuka tufwako.” Yeshu wambile kukwabo ngayi, “Nami kami kumitongweza eze ngovu nikutenda nazo byuma ebye nifwako.”
Currently Selected:
Mako 11: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.
Mako 11
11
Yeshu ukwingina mu Yelushalema
(Mateo 21:1-11; Luka 19:28-40; Yowano 12:12-19)
1Oho bahenyenene ku Yelushalema, bezile kwakwipi na minzi ya Mbetefwange na Mbetani, ku Lipili lya Oliveta. Yeshu watumine bandongesha bendi babili, 2wambile kukwabo ngayi, “Yenunga ku munzi uli kumbili yenu, oho mukenginamo, mukawana mwana mbongolo namangiwi, uya wabula kuliyavwishiwa ku muntu. Mukamushobole, pe mumulete kuno. 3Ndi muntu ukamipula ngayi ndabangani mukutenda noho, mukambe ngayi Mwene uli na kumushinga, wuluno amubweshe.”
4Pe bayile, bawanine mwana mbongolo namangiwi ku shipana sha litala ku nkumo ya mukwakwa, niho bamushobolwele. 5Bamo baya bemanine kuyo, bambile kukwabo ngayi, “Mukutenda bishini nanowo mbongolo muli na kushobola?”
6Bandongesha bambile kukwabo ngonehe abatongwezele Yeshu. Bayo bantu niho babalehele ngayi baye nendi. 7Baletele mwana mbongolo kuli Yeshu, pe bantu bayalile bivwalo byabo ha mbongolo, niho Yeshu akandamineho. 8Bantu babengi bayalile bivwalo byabo mu nzila, bamina batemene myahi ya mitondo ya mu mafuba bayiyalile mu nzila. 9#Nyi 118:25-26. Bantu bekalile kumbili yendi na baya bezilenga munyima, batatikile kubilikiza ngayi, “Hoshana! Kulemeshiwe niye ukwiza mu lizina lya Mwene! 10Kulemeshiwe kwiza kwa wene wa tatiyetu Ndavita! Hoshana muyilu ya mayilu!”#11:10 Hoshana: Lizu lya Shihebelu likutontolola ngayi, “Lamwina.”
11Yeshu wenginine mu Yelushalema, niho ayile mu Litala lya Nyambi. Watilaminine byuma nimwabyo, ngoboni ndaba ya kumona ngayi mutena walelakale, wafuminemo wayile ku Mbetani hamo na bandongesha likumi na babili.
Yeshu ukukuta mutondo wa mukuyu
(Mateo 21:18-19)
12Oho kwashile, hakufuma ku Mbetani, Yeshu wekalile na nzala. 13Wamonene mutondo wa mukuyu na mabizi awo hahatali. Wayileko mukumona ndi ukuwanako mikabo, ngoboni oho akumineko, kaliha wawanineko mikabo ndele mabizi tuhu. Ndaba shikati shakuhoka kwa nkuyu kaliha shakumine. 14Niho ambile ku mutondo uyo ngayi, “Hinga kukekala muntu wakulyako mikabo yobe kami!”
Bandongesha bendi bayuvwileko.
Yeshu ukutanda bakakulandishila mu Litala lya Nyambi
(Mateo 21:12-17; Luka 19:45-48; Yowano 2:13-22)
15Oho bakumine mu Yelushalema, Yeshu wenginine mu Litala lya Nyambi, pe watatikile kutanda bayo balandishilenga na bayo balandilenga. Wawishilile zitebulu hanci za bakakutambashana mali na bipona bya bayo balandishilenga bankilimba. 16Kaliha wetabilile ngayi muntu apite mu shipango sha Litala lya Nyambi hinga ashimba shamina. 17#Isha 56:7; Yel 7:11. Pe wabalongeshele ngayi, “Kati kaliha kwatikitiwile ngayi, ‘Litala lyami likatumbiwa ngayi litala lya malombelo lya bantu ba matunga nimwawo ndi?’ Ngoboni enu munalifutulu kwinga liteke lya bezi.”
18Bakakulongesha ndayano na bakankombela ba bakulwane oho bayuvwile eshe, bashingile nzila ya kuzihilamo Yeshu. Bamutinine, ndaba likunge lya bantu nimwabo bakomokele kulongesha kwendi.
19Oho kwengile mazolo, Yeshu na bandongesha bendi bafumine mu Yelushalema.
Shilongesha sha ha mutondo wa mukuyu
(Mateo 21:20-22)
20Kwashile lumenemene, oho bapitilenga mu nzila bamonene mutondo wa mukuyu unayumu nimwawo kukuma na ku mipishi yawo. 21Niho Pita anukile, wambile ngayi, “Hekulu, mona mutondo wa mukuyu uya wakuta unayumu!”
22Yeshu wabakumbwile ngayi, “Ikalenu na kukulupila muli Nyambi. 23#Mat 17:20; 1 Koli 13:2. Mwashikuma nikwamba kukwenu ngayi, muntu nimwendi ukamba ku lipili elye ngayi, ‘Katuka uliyumbile mu liwate,’ kami hinga abula nkani mu mutima wendi, ngoboni ukukulupila ngayi eshe anamba shikatendiwa, pe ukapanikiwa noho. 24Nohobene nikwamba kukwenu ngayi, nimwasho mukanyepa mu malombelo, kulupilenu ngayi munashitambulu, kami shikenga shenu. 25#Mat 6:14-15. Kami oho mukwimana na kulombela, ndi muli na shambo na muntu wamina mumuyatile, ngayi mwanga Tatiyenu wa muyilu, amiyatile milandu yenu. 26Ngoboni ndi mukubula kuyatila, kami Tatiyenu wa muyilu ukabula kumiyatila milandu yenu.”
Liyipu lya ha ngovu za Yeshu
(Mateo 21:23-27; Luka 20:1-8)
27Babokele kami mu Yelushalema. Oho Yeshu endelenga mu shipango sha Litala lya Nyambi, bakankombela ba bakulwane na bakakulongesha ndayano na bakulwane ba Bayunda bezile kukwendi, 28pe bamwipwile ngayi, “Kati ukutenda byuma ebye na ngovu ngani? Kami yani wakupanine eze ngovu zakutenda byuma ebye?”
29Yeshu wakumbwile kukwabo ngayi, “Nami nikumipula liyipu limo, ndi mukunkumbula, pe nikamitongweza eze ngovu nikutenda nazo byuma ebye. 30Kati kuzubilisha kwa Yowano, kwafumine muyilu, ndi kwafumine ku bantu? Nkumbulenu.”
31Niho batatikile kulikananganisha mukati kabo ngayi, “Ndi tukwamba ngayi, ‘Kwafumine muyilu,’ pe niye ukatwipula ngayi, ‘Ndaba ngani mwabulile kumukulupila?’ 32Ngoboni ndi tukwamba ngayi, ‘Kwafumine ku bantu’ (Batinine, ndaba bantu nimwabo balimukile ngayi mwashikuma Yowano wengile muluwe.”)
33Bakumbwile Yeshu ngayi, “Kulimuka tufwako.” Yeshu wambile kukwabo ngayi, “Nami kami kumitongweza eze ngovu nikutenda nazo byuma ebye nifwako.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.