Mako 16
16
Kushanguka kwa Yeshu
(Mateo 28:1-8; Luka 24:1-12; Yowano 20:1-10)
1Mutena Wakukatala oho wapitile, Maliya wa ku Mangandalena na Shalome na Maliya manda Yakoba balandile mazi akunuka shiwahe ngayi bakawabishe mutuntu wa Yeshu. 2Ha mutena wa kutatika wa Shunda, bayile ku shinzimbi lumenemene hakututika kwa mutena. 3Oho bayilenga bambilenga ngayi, “Kati ou ukatwandumwina liya limanya lili ku shipana sha shinzimbi yani?” (Lyengile limanya lyalinene shikuma.) 4Ngoboni oho batilaminine, bamonene ngayi linandumukuho. 5Oho benginine mu shinzimbi, bamonene ndumbana wavwalile shivwalo shashitali sha kutuba, hinga ekala ku mbalila ya shilyo, pe batinine shikuma.
6Ndumbana wambile kukwabo ngayi, “Hinga mutina, mulinakushinga Yeshu wa ku Nazaleta ou wakolekiwa. Unashanguku, muno mowa! Monenu, omu nimo bamulangikile. 7#Mat 26:32; Mak 14:28. Haya yenunga mukatongweze bandongesha bendi na Pita ngayi, ‘Niye unalimeneke ku Ngalileya, kuyo niko mukamumona, ngonehe amitongwezele.’ ”
8Hohobene bambuyama bafumine mu shinzimbi, betukile ndaba bekalile na bowa, pe bakankile. Nohobene kaliha bambile shamina ku muntu ndaba batinine.
Yeshu ukulimonekesha kuli Maliya wa ku Mangandalena
(Mateo 28:9-10; Yowano 20:11-18)
9Oho Yeshu ashangukile ha mutena wa kutatika wa Shunda, watatikile kulimonekesha kuli Maliya wa ku Mangandalena ou afumishile mayimbwe mutanu na abili. 10Niho ayile na kutongweza aba bekalilenga na Yeshu, baya bayenene kami balililenga. 11Ngoboni nibo, oho bayuvwile ngayi Yeshu wamumi, kami unalimonekeshe kuli Maliya, babulile kumukulupila.
Yeshu ukulimonekesha ku bandongesha babili
(Luka 24:13-35)
12Niho kami Yeshu alimonekeshele na shifwekesha shashenge ku bandongesha bendi babili, oho bendelenga mu nzila na kuya ku tuminzi. 13Baya bandongesha babokele na kutongweza bandongesha bamina, ngoboni nibo kaliha babakulupilile.
Yeshu ukulimonekesha ku balikumi na umo
(Mateo 28:16-20; Luka 24:36-49; Yowano 20:19-23; Milimo 1:6-8)
14Ku mamaninino Yeshu walimonekeshele ku balikumi na umo oho bekalile na kulya. Wabakalihilile ndaba yakubula kukulupila na wukalu wa mitima yabo, ndaba babulile kukulupila aba bamumonene kunyima ya kushanguka kwendi.
15 #
Mil 1:8. Yeshu wambile kukwabo ngayi, “Yenunga mukaye nimwamo mukashimikile ncango zaziwahe ku bantu nimwabo. 16Muntu nimwendi ukakulupila na kuzubilishiwa ukapuluka, ngoboni wakubula kukulupila ukayatiwa. 17Ebye bimonekesho nibyo bikakonka aba bakakulupila, bakafumisha mayimbwe mu lizina lyami, bakamba na zindimi zazipya, 18ndi bakakatula mayoka hinge ndi bakanwa byakufwana kukabaletela wukalu bifwako. Bakakambika maboko abo ha bakakukola, pe bakanyongomana.”
Yeshu ukutwaliwa kuyilu
(Luka 24:50-53; Milimo 1:9-11)
19 #
Mil 1:9-11. Oho Mwene Yeshu amanine kwamba nabo, watwaliwile muyilu, pe wekalile ku liboko lya shilyo lya Nyambi. 20Niho bandongesha bayile na kushimikila byambo ku zimbalila nimwazo, kami Mwene watendele milimo hamo nabo, washumishile lizu na bimonekesho biya byekalileko.
Currently Selected:
Mako 16: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.
