Zaŋ 2

Zezu wə ri tle dər wə so Kana

1Kə bəka hinji' rum, sôwâ wə tle dər wə so Kana nya Galile ɓay ya Zezu kəta' wə hana. 2Sôwâ ɗe Zezu kə sum ta zə rum wə ri tle dər rum ta'a. 3Kəri məni sum «viŋə» ndo' ɓa nday si, ya Zezu la' ne numu: «sum viŋə ndo' ɓa nday si.» 4Ama Zezu ɗam vun sa: «Məjwə, dan mi nə ɓa mba wa dan məni nə su? Ri man cu mbə məto'o.» 5Kəri rum, ya Zezu la' ne kə sum sini: «I gi kwa daŋ' məni mum də in mi ne.»

6Wə ri rum, je' gway' kanki' məni sôwâ her njay wə hana. Sôwâ Zuwif njay nday wə han kədan handay kol tu kə ndi ce' ndə vun fur ndaya. Je' ɗaw rum gak tle litrə mbi ce' ndə gu coho' ko kis kə gu hoɓo. 7Zezu la' ne kə sum sini: «I il mbi nyen je' məni kuna.» Handay il mbi nyen vun nday peɗe. 8Zezu faŋ la' ne ndaya: «Mgbaŋ ni ne, i il mbi rum kî, ɓay i də ne kə toŋ dərə.» Handay il ta ne numu. 9Toŋ nə tuk mbi məni faŋ sum viŋə, mum cu we ke sum nə car mbə ka su mi, (ama sum sin məni il mbi rum we si). Zə rum, mum ɗe bə cin ma 10ɓay la' ne numu: «Sôwâ daŋ' wə ne sum mə ɓay ne kə sôwâ məni handay ɗe nday cop, ɓay kəki məni handay gal kə ndi si, handay nday ne mə dan kəɗam rum ɓo. Ama mə ha, ha pe' sum mə ɓay hâ mgbaŋ ni na!»

11Ndəna', Zezu gi yew mə vun kofo wə so Kana nya Galile. Mum ta' mbra' um ndəna' ɓay sum ta zə rum ve numu.

12Kəki rum, mum 'ya ta so Kapernawum kə ya um, kə daw ya um, ɓay kə sum ta zə rumu. Handay cu bar wə han bəka raw mi.

Zezu 'way sôwâ rawti so po' fur sôwâ Zuwif

(Mat 21.12-13; Mak 11.15-17; Luk 19.45-46)

13Cer sôwâ Zuwif mə ɗe kə Pakə nə həre', zə rum Zezu ta so Jeruzalem#Psi 12.1-27. 14Wə rawti so po' fur sôwâ Zuwif, mum za' sôwâ məni wə gi coɓ naw, kə cime, ɓay kuruk, ndəna' ta' kə sum gi sam səlay gay' wə vun tablə ndaya. 15Zə rum, mum ciɗi ləva kə zew ɓay 'way nday daŋ' wur ta rəka so po' fur rum kə cime kə naw nday ta'a. Mum ra' səlay sum gi sam səlay pik ta nya ɓay faŋ i tablə ndaya. 16Mum la' ne kə sum gi coɓ kuruku: «I ra' kwa mi daŋ' ti si, i gi so Ba man ce' ndə so gi coɓ kwa mi!» 17Sum ta zə rum dla' wa dan məni wây' wə du Ɗerwa Ifraya: Ifray, sây' də suk wə so wû nyen vunduk rin peɗe#Nye 69.10.

18Zə rum, sôwâ Zuwif ci vun rumu: «Ha gak gi yew mi kədan ha ta' mba ne i ha kə vari gi kwa rum ndəna' su?» 19Zezu ɗam vun ndaya: «I bru so po' fur sôwâ Zuwif məni nə, ɓay na də faŋ ɗam mə mbrew du bəka hinji'i#Mat 26.61; Mak 14.58; 15.29.» 20Sôwâ Zuwif la' ne numu: «Sôwâ gi kim gufəɗi' wa kanki' kə ɗam so po' fur məni nə, ɓay mə ha, ha də faŋ ɗam so rum du bəka hinji' su?» 21Ama so po' fur məni Zezu wə in dan wa rum nə wə ta' tu rumu. 22Kəri məni Zezu car mbə mar, sum ta zə Zezu dla' wa dan məni mum in ne nday, ɓay handay ve dan məni wây' wə du Ɗerwa Ifray ɓay dan məni Zezu in ne ndaya.

Zezu we kwa daŋ' məni wə vunduk sôwâ

23Kəri məni Zezu wə so Jeruzalem kəri cer sôwâ Zuwif mə ɗe kə Pakə, sôwâ juk ve num kəri məni handay we yew cem cem məni mum gi. 24Ama Zezu cu cin vunduk rum wa nday mi, zə mum we si nday daŋ'ŋ. 25Mum cu kə mê' kədan swə məsin ta' dan vunduk sôwâ ne num mi: Zə mum kə tu rum we kwa məni wə vunduk ndaya.

Currently Selected:

Zaŋ 2: KMN

Highlight

Copy