Zaŋ 6

Zezu ne kwati ne kə njiwkwa raw nday i mbu vatla

(Mat 14.13-21; Mak 6.30-44; Luk 9.10-17)

1Kəki rum, Zezu 'ya ta dapa ya mbi Galile ga' sini. Sôwâ wə ɗe ya mbi rum kə ya mbi Tiberiyadə ta'a. 2Raw sôwâ wə ji zu rum, zə handay we yew cem cem məni mum gi kə sum gaɓ məni mum cara. 3Zezu ur ta wa igway', ɓay mum suk wə han kə sum ta zə rumu. 4Cer sôwâ Zuwif mə ɗe kə Pakə nə həre'e. 5Zezu tle i ɓay we raw sôwâ wə mbə hay' rumu. Zə rum, mum ci vun Filip: «Namba də coɓ kwati wə ka kədan namba ne kə sôwâ məni kuni daŋ' ti su?» 6Mum in ndəna' kədan mum mun dan məni Filip wə də ɗama. Zə mum we kwa məni mum wə də gi nə si. 7Filip ɗam vun rumu: «Ko namba la' kə səlay kis hoɓ, namba cu gak coɓ kwati kədan ndap swə ɗaw ɗaw daŋ' du nday fe kî kî mi.» 8Andre, njər Simoŋ Piyer, mum ɗaw du sum ta zə Zezu, la' ne kə Zezu: 9«Vay jiɗ kəta' ti kə vun tləpe' fun vatl kə keve hoɓo. Ama kwa rum gak gi mi zə raw sôwâ məni kuni su?» 10Zezu la' ne ndaya: «I gi sôwâ daŋ' gay' də nya.» Za juk wə ri rumu. Zə rum, handay gay' ta nya. Raw njiwkwa i mbu vatla. 11Zezu ra' vun tləpe' fun ɓay gi soko ne kə Ifray, kəki rum, mum ɓul ne kə sôwâ məni gay' wə hana. Mum gi ndəna' kə keve ta'a. Sa su daŋ' fe i mê' umu. 12Kəri məni handay daŋ' ti ndak, Zezu la' ne kə sum ta zə rumu: «I ra' kam kwati məni gwa' kədan kwati rum nə ɗənok mi.» 13Handay ra' kam kwati məni gwa' kəki məni sôwâ ke ti vun tləpe' fun mə vatl, nyen ɗəŋâl guɓ wa hoɓ kə ndi.

14Sôwâ we yew məni Zezu gi, ɓay handay ini: «Kəzin', swə məni nə Bə Ka' Dan məni wə də mbə wə du sôwâ nya!» 15Ama Zezu we si, handay həre' kə um kaw kə gbəgboŋ cin jwə nday, zə rum, mum 'ya ta wa igway' kə ɗaw rum kəreme.

Zezu ta wa mbi kə seme

(Mat 14.22-33; Mak 6.45-52)

16Kə ɓel, sum ta zə Zezu car wa igway' rə dam ta vun ya mbi. 17Handay ur ta rawti da ɓay cin wa kə so Kapernawum vun dapa mbi ga' sini. Ri dli si, ama Zezu cu mbə hay' nday məto'o. 18Kəri rum, simbeɗ təŋ kə sa' kə gbəgboŋ, ɓay mbi təŋ kə səta. 19Kəri məni handay cinik da seŋ rum i kilometrə vatl ko kanki', handay we Zezu wə mbə hay' nday həre' ɓay mum wə ta wa mbi kə seme. Wəlok gi nday juku. 20Ama Zezu la' ne ndaya: «I ne wəlok mi. Na na!» 21Kəri rum, handay wa' kədan handay um tle də rawti da, ɓay kəkor sar da ta day nya wə ri məni handay wə də hana.

Raw sôwâ wə keɓ Zezu

22Siw rum, raw sôwâ məni ke gwa' dapa ya mbi ga' sin we i da ɗaw sar gwa' wə han, ɓay handay kə we rum, Zezu cu ur ta rawti da kə sum ta zə rum mi, ama sum ta zə rum 'ya kə ɗaw ndaya. 23Kəri rum, da məsin kuni car so Tiberiyadə mbə day həre' kə ri məni handay ke ti kwati məni Bârî gi soko ne kə Ifray wa kwati rumu. 24Kəri məni raw sôwâ cu we Zezu kə sum ta zə rum wə han mi, handay ur ta rawti da kuni ɓay 'ya ta so Kapernawum kədan um keɓe.

Zezu nə kwati məni wə ne nyî mə də hâ

25Kəri məni handay ta za' Zezu wə dapa ya mbi ga' sin, handay ci vun rumu: «Bə ta' kwa, ha mbə ti kə ma su?» 26Zezu ɗam vun ndaya: «Na in mi ne kəzin', hi cu wə man keɓ zə hi we yew cem cem məni na gi nə mi, ama zə hi ke ti kwati ɓay rawti ri sa'a. 27I gi sin zə kwati məni wə ndo' nə mi, ama i gi sin zə kwati məni wə ne nyî mə də hâ, kwati məni Vay sumra' də mi ne kwati rum zə Ifray, Ba man, cin lamba wa rumu.» 28Zə rum, handay ci vun rumu: «Namba də gi ma kədan namba gi sin məni Ifray wə wa' nə su?» 29Zezu ɗam vun ndaya: «Sin məni Ifray wə wa' kədan hi gi nə kə məni hi wə ve swə məni mum sini.» 30Handay ci vun rumu: «Ha də gi yew mi kədan namba we, ɓay namba wû ve su? Ha də gi sin mi su? 31Ba mbri ramba ti "manə" wə du igop ce' ndə məni Dan rum wây' wə du ɗerwa: Mum ne kwati məni car mbə wafray ne nday ti#Psi 16.4,15; Nye 78.24.» 32Zezu ɗam vun ndaya: «Na in mi ne kəzin', Moyizə cu kə məni ne kwati məni car mbə wafray ne ni nə mi, ama Ba man kə məni wə mi ne kwati mə kəzin' məni car mbə wafraya. 33Zə kwati məni Ifray wə ne, mum nə swə məni car mbə wafray mbə nya ɓay ne nyî mə də hâ ne kə sôwâ nya.» 34Handay la' ne numu: «Bârî, a ne kwati rum ne mba bəka daŋ'ŋ.» 35Zezu la' ne ndaya: «Na nə kwati məni wə ne nyî mə də hâ. Swə məni mbə hay' rin, mê' cu də ti bə rum kpe mi, ɓay swə məni ve nan, mê' mbi cu də ci bə rum kpe məta'a. 36Ama na in ne ni: Hi we nan si, ama hi cu ve nan mi. 37Sôwâ daŋ' məni Ba man ne nday ne nan, handay də mbə hay' rin, ɓay na cu də 'way swə ɗaw məni mbə hay' rin nə kpe mi. 38Zə na cu car wafray dam mbə nya kədan na gi kwa məni na wə wa' mi, ama kədan na gi kwa məni swə məni sin nan nə wə wa'a. 39Kwa məni swə məni sin nan wə wa' nə ni na: Mum cu wa' i a vi' swə ɗaw wə du sôwâ məni mum ne nday ne nan nə mi, ama mum wə wa' i a ra' nday daŋ' mbə mar kə bəka ndo' nya. 40Zə kwa məni Ba man wə wa' nə ni na: Mum wə wa' i sa su daŋ' məni we Vay ɓay ve num, handay də ke kə nyî mə də hâ, ɓay na də nday ra' mbə mar kə bəka ndo' nya.»

41Sôwâ Zuwif ra' bak kə Zezu zə mum ini: «Na nə kwati məni car wafray dam mbə nya.» 42Handay ini: «Mum cu Zezu, vay Zozef mi su? Namba we ba um kə ya umu. Gi ma tam, mum gak in i mum car wafray dam mbə nya su?» 43Zezu ɗam vun ndaya: «I ar mgbrum dan mbok ri si! 44Swə ɗaw cu gak mbə hay' rin mi, say ka Ba man məni sin nan nə gi num mba. Ɓay na də par bə rum mbə mar kə bəka ndo' nya. 45Sum ka' dan wây' dan məni na: Ifray də ta' kwa ne kə sôwâ daŋ'ŋ. Sa su daŋ' məni mun dan Ba man ɓay ve kwata' um, bə rum wə mbə hay' rini#Esa 54.13. 46Dan rum cu ta' i swə ɗaw we Ba man nə mi, say swə məni car mbə hay' Ifray ɗaw sar kə məni we Ba mana. 47Na in mi ne, kəzin', swə məni ve nan, bə rum kə nyî mə də hâ. 48Na nə kwati məni wə ne nyî mə də hâ. 49Ba mbri rami ti manə wə du igop, ɓay handay mara. 50Ama swə la' ti kwati məni car wafray dam mbə nya si, bə rum cu də mar mi.»

51«Na nə kwati məni wə ne nyî mə də hâ məni car wafray dam mbə nya. Swə la' ti kwati rum si, bə rum də ke kə nyî mə də hâ. Kwati məni na də ne, mum nə tlew tu rin məni na ne kədan sôwâ nya də ke kə nyî mə də hâ.» 52Sôwâ Zuwif təŋ kə way dan kuni mbok nji wa dan rum, handay ci vun nji mbok nji: «Swə məni nə gak ne tlew tu rum mba ne ti ma su?» 53Zezu la' ne ndaya: «Na in mi ne kəzin', hi la' cu ti tlew tu Vay sumra' mi si, ɓay hi la' cu ce vəswə tu rum mi si, hi cu də ke kə nyî mə də hâ mi. 54Swə məni ti tlew tu rin ɓay ce vəswə tu rin, bə rum kə nyî mə də hâ, ɓay na də um par mbə mar kə bəka ndo' nya. 55Zə tlew tu rin nə kwati mə kəzin' ɓay vəswə tu rin nə kwace mə kəzin' ta'a. 56Swə məni ti tlew tu rin ɓay ce vəswə tu rin, bə rum wə ke kə rin ɓay na wə ke kə rumu. 57Ba man məni sin nan, mum kə i, ɓay na kə i zə rum, ndəna' ta', swə məni ti tlew tu rin də ke kə nyî mə də hâ zə rini. 58Kwati məni car wafray dam mbə nya nə ni na: Mum nə cu ce' ndə kwati məni ba mbri rami ti ɓay mar mi. Swə məni ti kwati rum də ke kə nyî mə də hâ.» 59Zezu in dan rum kəri məni mum ta' kwa wə rawti so Ifray sôwâ Zuwif wə so Kapernawum.

Dan məni wə ne nyî mə də hâ

60Kəki məni sôwâ məni wə ta zə Zezu mun dan um, sôwâ juk du nday ini: «Kwata' rum kə ciki! Sa gak ve su?» 61Zezu we si, sôwâ məni wə ta zə rum wə mgbrum dan wa kwata' rum, zə rum, mum la' ne ndaya: «Kwata' rum wə mi cik su? 62Hi la' we Vay sumra' ur də ri məni mum ke han cop nə si, hi də gi ma su? 63Simbeɗ kə məni wə ne nyî. Tlew tu sumra' cu gak gi kwa məsin mi. Dan məni na in ne ni, handay kə məni wə mi ne Simbeɗ kə nyî. 64Ama sôwâ məsin du ri cu ve dan man mi.» (Zə daka təŋ zu rum, Zezu we sôwâ məni cu də um ve mi, kə swə məni wə də um ar də ɓa sôwâ.) 65Mum faŋ ini: «Zə rum, na in mi ne: Swə ɗaw cu gak mbə hay' rin mi, say ka Ba Vay kə məni ne vari ne numu.»

66Daka kəri rum, sôwâ juk wə du sôwâ məni wə ta zə Zezu par tu nday faŋ kəki ɓay cu ta zə rum za' mi. 67Zə rum, Zezu ci vun sum ta zə rum mə guɓ wa hoɓo: «Hi ta', hi wa' kədan hi par tu ri su?» 68Simoŋ Piyer ɗam vun rumu: «Bârî, namba də hay' sa su? Ha kə dan məni wə ne nyî mə də hâ. 69Mgbaŋ ni nə namba ve nu, ɓay namba we si: Ha nə Swə mə kəleŋ məni car mbə hay' Ifraya#Mat 16.16; Mak 8.29; Luk 9.20.» 70Zezu ɗam vun ndaya: «Na da' ni guɓ wa hoɓ daŋ', cu ndəna' mi su? Ama Satan suk wə vunduk swə ɗaw du ri!» 71Mum in dan wa Yudas, vay Simoŋ Iskariyot. Zə Yudas ko mum la' ɗaw wə du sum ta zə Zezu mə guɓ wa hoɓ, mum kə məni wə də um ar də ɓa sôwâ.

Currently Selected:

Zaŋ 6: KMN

Highlight

Copy