Lukə 11
11
Zezu ta' vari in dan kə Ifraya
(Mat 6.9-13; 7.7-11)
1Fəta məsin, Zezu wə in dan kə Ifray wə ri məsini. Kəri məni mum ndo' in dan kə Ifray si, swə ɗaw wə du sum ta zə rum la' ne numu: «Bârî, a ta' vari in dan kə Ifray ne mba ce' ndə məni Zaŋ ta' ne ke sum ta zə rumu.» 2Zezu la' ne ndaya: «Kəri məni hi wə in dan kə Ifray, i ini:
Bəba,
namba wa' i sôwâ daŋ' mbra' semɗe ru.
Namba wa' i a mbə suk jwə wa mba.
3A ne mba kwati i mê' mba bəka daŋ'ŋ.
4A vrum kwa mə bro' mba,
zə namba kə tu mba wə vrum kwa mə bro'
məni sôwâ məsin wə gi hay' mba.
Ɓay a də kə mba wə ri məni kwa mə bro'
gak mba ɓu han nə mi.»
5Zezu faŋ in ne ndaya: «I ɗik ri'i: Swə ɗaw du ri ta so bây um kə du dukri kədan mum o kwa ɓa rumu: "Bây man, a ne nan vun tləpe' fun hinji' ri', 6bây man məsin ɗaw car ri gaŋ mbə so man ɓay na cu kə kwa məsin kədan na um ne mi." 7Ɓay i ɗik ta'a: Swə mə rawti so nə ɗam vun bây umu: "A cik nan mi! Na ta' vun vari si. Na kə daw man daŋ' namba bar ri bar si. Na cu gak car kədan na wû ne fun za' mi," 8na in mi ne: Ko mum la' cu də car kədan mum um ne fun zə mum bây um mi, mum də car um ne kwa məni mum wə wa' zə mum wə um ciki.»
9«Ɓay na, na in mi ne: i o, ɓay hi də fe, i keɓ ɓay hi də za', i tu' vun vari, ɓay sôwâ də ar vun vari zə ri. 10Zə sa su daŋ' məni wə o, mum də fe, swə məni wə keɓ, bə rum də za', ɓay swə məni wə tu' vun vari, sôwâ də ar vun vari zə bə rumu. 11Ba vay mə ka du ri də ne wu' ne kə vay um kəri məni mum o keve ɓa rum su? 12Ko mum də ne jiɗwa ne kə vay um kəri məni mum o se' sinyek ɓa rum su? 13Hi sôwâ mə bro', hi we vari kədan hi ne kwa mə ɓay ne kə daw mi Ba man mə wafray də ne Simbeɗ mə Kəleŋ um ne kə sôwâ məni wə um o pâ kwa məni hi wə gi nə si.»
Zezu ɓay Belzebul
(Mat 12.22-30; Mak 3.20-27)
14Zezu 'way gam məni tak swə dan ge dana. Kəri məni gam nə pâ mbə wa swə nə, mum təŋ kə ge dan, ɓay kwa rum jin' wa ne kə raw sôwâ məni gay' wə hana. 15Ama sôwâ məsin wə du nday ini: «Jwə gam mə ɗe kə Belzebul kə məni ne gbəgboŋ ne num kədan mum 'way gama#Mat 9.34; 10.25.» 16Sôwâ məsin wə du nday wa' kədan handay um kaw kə dan ge vunu. Zə rum, handay ci vun rum kədan nə gi yew məni gak ta' i gbəgboŋ um car mbə hay' Ifray mə wafray ne ndaya. 17Ama Zezu we dan ɗik vunduk nday, ɓay mum la' ne ndaya: «Nya daŋ' məni sum nya rum car zi mbok nji, nya rum də ɗənok, ɓay so rum də njay də wa so məsini. 18Ndəna' ta', Satan la' car dan wa tu rum si, gbəgboŋ um gak də kofo mə ma su? Hi wə in i na wə 'way gam zə Belzebul ne gbəgboŋ ne nana. 19Na la' wə 'way gam kə gbəgboŋ Belzebul si, kə gbəgboŋ mə sa sum ta zə ri wə 'way gam nə su? Kwa gi sum ta zə ri kə ta nday wə ta' i hi vi' vari si. 20Ama na la' wə 'way gam kə gbəgboŋ Ifray si, kwa rum wə ta' i jwə Ifray nə mbə day hay' ri si. 21Kəri məni bə gbəgboŋ wə ji so um kə kwa zi um, doknay um gak gay' heɓe. 22Ama swə məni kə gbəgboŋ pâ num si la' mbə so um si, mum um kaw kulum, swə nə kəy hura kwa zi məni mum cin vunduk rum wa rum, ɓay mum ɓul doknay məni mum kəy hura rum ɓa rum daŋ' ne kə sôwâ məsini. 23Swə məni cu kə rin mi, ka bə rum sî nan, ɓay swə məni cu kawɓa rin kə keɓ sôwâ mi, ka bə rum wə nday 'waya.»
Gam faŋ gewa mbə wa swa
(Mat 12.43-45)
24«Kəri məni gam pâ mbə wa swə, mum də gaŋ wə ri məni mbi cu han mi kədan mum keɓ ri pemâya. Mum la' cu za' ri rum mi si, mum ini: "Na faŋ də so man məni na 'ya ara." 25Mum faŋ gewa mbə han, ɓay mum za' so rum ɓa ɓay gila' ɓaya. 26Zə rum, mum 'ya ta ɗe gam məsin seɗa' məni pâ num kə bro' si, ɓay handay mbə cok gay' wə so rumu. Ndəna' suk bə rum faŋ bro' pâ mə vun kofo nə si.»
Kəɗam mə kəzini
27Kəki məni Zezu in ndəna', ma məsin wə du raw sôwâ in ne numu: «Kəɗam zə ma məti vra' nu ɓay ne pa' ne nu!» 28Ama Zezu ɗama: «Zawa, kəɗam zə sôwâ məni wə mun dan Ifray ɓay wə ta zə dan rumu!»
Sôwâ ci vun yewe
(Mat 12.38-42)
29Kəri məni raw sôwâ ɓa reŋ wa Zezu, mum təŋ kə in dan nday ne: «Sôwâ mə tam, handay bro'o. Handay wə ci vun yew, ama Ifray cu də gi yew nday ne mi, say yew məni mum gi kə Zonas#Mat 16.4; Mak 8.12. 30Zə ce' ndə məni Ifray gi yew kə Zonas zə sôwâ so Ninivə, ndəna' ta' Ifray wə də gi yew kə Vay sumra' zə sôwâ mə tama#Zonas 3.4 . 31Kə bəka dan ɓok, ma məti suk jwə wə nya mə ga' zu də car kor sôwâ mə tam kədan ta də tum sem nday, zə ta car mbə nya mə seŋ kədan ta mun dan Salomoŋ məni nyen peɗ kə gwete#1Sja 10.1-10; 2Izd 9.1-12. Ɓay kwa məni pâ Salomoŋ kə toŋ kəta' wə ti ra. 32Ɓay kə bəka dan ɓok, sôwâ so Ninivə də car kor sôwâ mə tam kədan handay də tum sem ndaya. Zə handay faŋ vunduk nday kəri məni handay mun dan ka' Zonas. Ɓay kwa məni pâ Zonas kə toŋ kəta' wə ti ra.»
Ri mə ɓu mə tu
(Mat 5.15; 6.22-23; Mak 4.21)
33«Swə ɗaw cu də ge ku wə baŋgay kədan mum um pe' ko cin də ɗəŋâl mi, zawa, mum um cin wa kwa cin baŋgay kədan sôwâ məni cok rawti so rum weri mə ɓu rumu. 34I ru ce' ndə baŋgay mə tu ru. I ru la' ɓay si, tu ru daŋ' wə ke du ri mə ɓu. Ama i ru la' kə gaɓ si, tu ru daŋ' wə ke du ri mə ura'a. 35La' ndəna' si, a kaw wa ru kədan ri mə ɓu məni wə tu ru nə faŋ ri mə ura' mi. 36Tu ru daŋ' la' wə du ri mə ɓu si ɓay kwa tu ru məsin ɗaw la' cu wə du ri mə ura' mi si, tu ru daŋ' də ke du ri mə ɓu, ce' ndə baŋgay məni wəɗi kə ɗeri mə ɓu wû ne.»
Zezu dan sôwâ Farisiyen kə sum pay zu dan dlaya
(Mat 23.1-36; Mak 12.38-40)
37Kəri məni Zezu in dan ndo' si, swə ɗaw mə du kul sôwâ Zuwif mə ɗe kə Farisiyen ɗe num kədan mum də ti kwati kə rumu. Zezu ze so um ɓay suk wə vun tablə. 38Swə Farisiyen nə we Zezu cu kol ɓa rum cop ti kwati mi, ɓay kwa rum jin' wa ne numu. 39Zə rum, Bârî in ne numu: «Ndəna', hi kul sôwâ Zuwif mə ɗe kə Farisiyen, hi wə kol ga' ki timbi kə tasaw, ama vunduk ri nyen peɗ kə mê' kəy hura kə dan mə bro'o. 40Hi laya! Ifray məni gi ga' ki kwa, mum cu kə məni gi ga' rawti kwa ta' mi su? 41I ne kwa məni wə rawti timbi kə tasaw mi ne kə sum ca, ɓay kwa daŋ' də ke kəleŋ zə ri.»
42«Boni wa ri, kul sôwâ Zuwif mə ɗe kə Farisiyen, zə hi wə ne guɓ kwa kura ce' ndə za say mə wə hay' vari, tlap reɗ kə kwa kura cem cem juk ne kə Ifray, ama hi jeɗ njeŋ kə bə Ifraya. I gi kwa məni kuni, dan jeɗ kwa məsin rumu.
43Boni wa ri, kul sôwâ Zuwif mə ɗe kə Farisiyen, zə hi wə keɓ ri suk mə vun kofo wə rawti so Ifray sôwâ Zuwif, ɓay hi wa' i sôwâ kaw jeɓ ri wə ri ɓawa sôwâ. 44Boni wa ri, kul sôwâ Zuwif mə ɗe kə Farisiyen, zə hi ce' ndə 'wəy məni sôwâ cu we mi ɓay sôwâ wə ta wa rum dan nday we.»
45Swə ɗaw mə du sum pay zu dan dlay la' ne numu: «Bə ta' kwa, kəri məni ha in dan ndəna', ha wə mba i.»
46Zezu ɗama: «Boni wa ri ta', sum pay zu dan dlay, zə hi wə cin kwazi' mə kə mbra' də wa sôwâ, ama hi cu kawɓa nday kə tle kwazi' rum, ko ɗak kə vayɓa ri mi. 47Boni wa ri, zə hi wə ɗam kwa mə ɓay wa 'wəy sum ka' dan məni ba mbri rami ci ndaya. 48Ndəna', hi wə ta' i hi kawvun ɗaw kə sin məni ba mbri rami ke gi. Zə handay ci sum ka' dan, ɓay hi wə ɗam kwa mə ɓay wa 'wəy ndaya. 49Zə rum, wə du gwet Ifray, mum ini: "Na də sin sum ka' dan kə sum sin nday ne. Handay də ci sôwâ məsin du nday, ɓay handay də keɓ zə sôwâ məsini." 50Zə rum, dan mə wa sôwâ məni ci sum ka' dan daŋ' daka təŋ zu nya faŋ də wa sôwâ mə tam, 51daka ri məni swə ɗaw ci Abel hâ day ri məni sôwâ məsin ci Zakariya məni sôwâ ci num mbok du kwa cu kwa po' fur kə jew Ifray, faŋ də wa sôwâ mə tama#Tzk 4.8; 2Izd 24.20-21.»
52«Boni wa ri, sum pay zu dan dlaya! Zə hi tle kwa ar vun so kwawe wə ɓa ri: Hi kə tu ri, hi cu ze mi, ɓay hi wə tak sôwâ məsin məni wə wa' ze də hana.»
53Kəri məni Zezu 'ya ar ri rum, sum pay zu dan dlay kə kul sôwâ Zuwif mə ɗe kə Farisiyen təŋ ra' kuni bak kə rum, ɓay handay təŋ kə ci vun rum kə dan cem cem juku. 54Handay wa' kədan handay um kaw kə dan ge vun ke məsin mum də in dan mə bro' su na.
Currently Selected:
Lukə 11: KMN
Highlight
Share
Copy
Want to have your highlights saved across all your devices? Sign up or sign in
Le Nouveau Testament et Psaumes en Peve © Alliance Biblique du Tchad, 2014.
Lukə 11
11
Zezu ta' vari in dan kə Ifraya
(Mat 6.9-13; 7.7-11)
1Fəta məsin, Zezu wə in dan kə Ifray wə ri məsini. Kəri məni mum ndo' in dan kə Ifray si, swə ɗaw wə du sum ta zə rum la' ne numu: «Bârî, a ta' vari in dan kə Ifray ne mba ce' ndə məni Zaŋ ta' ne ke sum ta zə rumu.» 2Zezu la' ne ndaya: «Kəri məni hi wə in dan kə Ifray, i ini:
Bəba,
namba wa' i sôwâ daŋ' mbra' semɗe ru.
Namba wa' i a mbə suk jwə wa mba.
3A ne mba kwati i mê' mba bəka daŋ'ŋ.
4A vrum kwa mə bro' mba,
zə namba kə tu mba wə vrum kwa mə bro'
məni sôwâ məsin wə gi hay' mba.
Ɓay a də kə mba wə ri məni kwa mə bro'
gak mba ɓu han nə mi.»
5Zezu faŋ in ne ndaya: «I ɗik ri'i: Swə ɗaw du ri ta so bây um kə du dukri kədan mum o kwa ɓa rumu: "Bây man, a ne nan vun tləpe' fun hinji' ri', 6bây man məsin ɗaw car ri gaŋ mbə so man ɓay na cu kə kwa məsin kədan na um ne mi." 7Ɓay i ɗik ta'a: Swə mə rawti so nə ɗam vun bây umu: "A cik nan mi! Na ta' vun vari si. Na kə daw man daŋ' namba bar ri bar si. Na cu gak car kədan na wû ne fun za' mi," 8na in mi ne: Ko mum la' cu də car kədan mum um ne fun zə mum bây um mi, mum də car um ne kwa məni mum wə wa' zə mum wə um ciki.»
9«Ɓay na, na in mi ne: i o, ɓay hi də fe, i keɓ ɓay hi də za', i tu' vun vari, ɓay sôwâ də ar vun vari zə ri. 10Zə sa su daŋ' məni wə o, mum də fe, swə məni wə keɓ, bə rum də za', ɓay swə məni wə tu' vun vari, sôwâ də ar vun vari zə bə rumu. 11Ba vay mə ka du ri də ne wu' ne kə vay um kəri məni mum o keve ɓa rum su? 12Ko mum də ne jiɗwa ne kə vay um kəri məni mum o se' sinyek ɓa rum su? 13Hi sôwâ mə bro', hi we vari kədan hi ne kwa mə ɓay ne kə daw mi Ba man mə wafray də ne Simbeɗ mə Kəleŋ um ne kə sôwâ məni wə um o pâ kwa məni hi wə gi nə si.»
Zezu ɓay Belzebul
(Mat 12.22-30; Mak 3.20-27)
14Zezu 'way gam məni tak swə dan ge dana. Kəri məni gam nə pâ mbə wa swə nə, mum təŋ kə ge dan, ɓay kwa rum jin' wa ne kə raw sôwâ məni gay' wə hana. 15Ama sôwâ məsin wə du nday ini: «Jwə gam mə ɗe kə Belzebul kə məni ne gbəgboŋ ne num kədan mum 'way gama#Mat 9.34; 10.25.» 16Sôwâ məsin wə du nday wa' kədan handay um kaw kə dan ge vunu. Zə rum, handay ci vun rum kədan nə gi yew məni gak ta' i gbəgboŋ um car mbə hay' Ifray mə wafray ne ndaya. 17Ama Zezu we dan ɗik vunduk nday, ɓay mum la' ne ndaya: «Nya daŋ' məni sum nya rum car zi mbok nji, nya rum də ɗənok, ɓay so rum də njay də wa so məsini. 18Ndəna' ta', Satan la' car dan wa tu rum si, gbəgboŋ um gak də kofo mə ma su? Hi wə in i na wə 'way gam zə Belzebul ne gbəgboŋ ne nana. 19Na la' wə 'way gam kə gbəgboŋ Belzebul si, kə gbəgboŋ mə sa sum ta zə ri wə 'way gam nə su? Kwa gi sum ta zə ri kə ta nday wə ta' i hi vi' vari si. 20Ama na la' wə 'way gam kə gbəgboŋ Ifray si, kwa rum wə ta' i jwə Ifray nə mbə day hay' ri si. 21Kəri məni bə gbəgboŋ wə ji so um kə kwa zi um, doknay um gak gay' heɓe. 22Ama swə məni kə gbəgboŋ pâ num si la' mbə so um si, mum um kaw kulum, swə nə kəy hura kwa zi məni mum cin vunduk rum wa rum, ɓay mum ɓul doknay məni mum kəy hura rum ɓa rum daŋ' ne kə sôwâ məsini. 23Swə məni cu kə rin mi, ka bə rum sî nan, ɓay swə məni cu kawɓa rin kə keɓ sôwâ mi, ka bə rum wə nday 'waya.»
Gam faŋ gewa mbə wa swa
(Mat 12.43-45)
24«Kəri məni gam pâ mbə wa swə, mum də gaŋ wə ri məni mbi cu han mi kədan mum keɓ ri pemâya. Mum la' cu za' ri rum mi si, mum ini: "Na faŋ də so man məni na 'ya ara." 25Mum faŋ gewa mbə han, ɓay mum za' so rum ɓa ɓay gila' ɓaya. 26Zə rum, mum 'ya ta ɗe gam məsin seɗa' məni pâ num kə bro' si, ɓay handay mbə cok gay' wə so rumu. Ndəna' suk bə rum faŋ bro' pâ mə vun kofo nə si.»
Kəɗam mə kəzini
27Kəki məni Zezu in ndəna', ma məsin wə du raw sôwâ in ne numu: «Kəɗam zə ma məti vra' nu ɓay ne pa' ne nu!» 28Ama Zezu ɗama: «Zawa, kəɗam zə sôwâ məni wə mun dan Ifray ɓay wə ta zə dan rumu!»
Sôwâ ci vun yewe
(Mat 12.38-42)
29Kəri məni raw sôwâ ɓa reŋ wa Zezu, mum təŋ kə in dan nday ne: «Sôwâ mə tam, handay bro'o. Handay wə ci vun yew, ama Ifray cu də gi yew nday ne mi, say yew məni mum gi kə Zonas#Mat 16.4; Mak 8.12. 30Zə ce' ndə məni Ifray gi yew kə Zonas zə sôwâ so Ninivə, ndəna' ta' Ifray wə də gi yew kə Vay sumra' zə sôwâ mə tama#Zonas 3.4 . 31Kə bəka dan ɓok, ma məti suk jwə wə nya mə ga' zu də car kor sôwâ mə tam kədan ta də tum sem nday, zə ta car mbə nya mə seŋ kədan ta mun dan Salomoŋ məni nyen peɗ kə gwete#1Sja 10.1-10; 2Izd 9.1-12. Ɓay kwa məni pâ Salomoŋ kə toŋ kəta' wə ti ra. 32Ɓay kə bəka dan ɓok, sôwâ so Ninivə də car kor sôwâ mə tam kədan handay də tum sem ndaya. Zə handay faŋ vunduk nday kəri məni handay mun dan ka' Zonas. Ɓay kwa məni pâ Zonas kə toŋ kəta' wə ti ra.»
Ri mə ɓu mə tu
(Mat 5.15; 6.22-23; Mak 4.21)
33«Swə ɗaw cu də ge ku wə baŋgay kədan mum um pe' ko cin də ɗəŋâl mi, zawa, mum um cin wa kwa cin baŋgay kədan sôwâ məni cok rawti so rum weri mə ɓu rumu. 34I ru ce' ndə baŋgay mə tu ru. I ru la' ɓay si, tu ru daŋ' wə ke du ri mə ɓu. Ama i ru la' kə gaɓ si, tu ru daŋ' wə ke du ri mə ura'a. 35La' ndəna' si, a kaw wa ru kədan ri mə ɓu məni wə tu ru nə faŋ ri mə ura' mi. 36Tu ru daŋ' la' wə du ri mə ɓu si ɓay kwa tu ru məsin ɗaw la' cu wə du ri mə ura' mi si, tu ru daŋ' də ke du ri mə ɓu, ce' ndə baŋgay məni wəɗi kə ɗeri mə ɓu wû ne.»
Zezu dan sôwâ Farisiyen kə sum pay zu dan dlaya
(Mat 23.1-36; Mak 12.38-40)
37Kəri məni Zezu in dan ndo' si, swə ɗaw mə du kul sôwâ Zuwif mə ɗe kə Farisiyen ɗe num kədan mum də ti kwati kə rumu. Zezu ze so um ɓay suk wə vun tablə. 38Swə Farisiyen nə we Zezu cu kol ɓa rum cop ti kwati mi, ɓay kwa rum jin' wa ne numu. 39Zə rum, Bârî in ne numu: «Ndəna', hi kul sôwâ Zuwif mə ɗe kə Farisiyen, hi wə kol ga' ki timbi kə tasaw, ama vunduk ri nyen peɗ kə mê' kəy hura kə dan mə bro'o. 40Hi laya! Ifray məni gi ga' ki kwa, mum cu kə məni gi ga' rawti kwa ta' mi su? 41I ne kwa məni wə rawti timbi kə tasaw mi ne kə sum ca, ɓay kwa daŋ' də ke kəleŋ zə ri.»
42«Boni wa ri, kul sôwâ Zuwif mə ɗe kə Farisiyen, zə hi wə ne guɓ kwa kura ce' ndə za say mə wə hay' vari, tlap reɗ kə kwa kura cem cem juk ne kə Ifray, ama hi jeɗ njeŋ kə bə Ifraya. I gi kwa məni kuni, dan jeɗ kwa məsin rumu.
43Boni wa ri, kul sôwâ Zuwif mə ɗe kə Farisiyen, zə hi wə keɓ ri suk mə vun kofo wə rawti so Ifray sôwâ Zuwif, ɓay hi wa' i sôwâ kaw jeɓ ri wə ri ɓawa sôwâ. 44Boni wa ri, kul sôwâ Zuwif mə ɗe kə Farisiyen, zə hi ce' ndə 'wəy məni sôwâ cu we mi ɓay sôwâ wə ta wa rum dan nday we.»
45Swə ɗaw mə du sum pay zu dan dlay la' ne numu: «Bə ta' kwa, kəri məni ha in dan ndəna', ha wə mba i.»
46Zezu ɗama: «Boni wa ri ta', sum pay zu dan dlay, zə hi wə cin kwazi' mə kə mbra' də wa sôwâ, ama hi cu kawɓa nday kə tle kwazi' rum, ko ɗak kə vayɓa ri mi. 47Boni wa ri, zə hi wə ɗam kwa mə ɓay wa 'wəy sum ka' dan məni ba mbri rami ci ndaya. 48Ndəna', hi wə ta' i hi kawvun ɗaw kə sin məni ba mbri rami ke gi. Zə handay ci sum ka' dan, ɓay hi wə ɗam kwa mə ɓay wa 'wəy ndaya. 49Zə rum, wə du gwet Ifray, mum ini: "Na də sin sum ka' dan kə sum sin nday ne. Handay də ci sôwâ məsin du nday, ɓay handay də keɓ zə sôwâ məsini." 50Zə rum, dan mə wa sôwâ məni ci sum ka' dan daŋ' daka təŋ zu nya faŋ də wa sôwâ mə tam, 51daka ri məni swə ɗaw ci Abel hâ day ri məni sôwâ məsin ci Zakariya məni sôwâ ci num mbok du kwa cu kwa po' fur kə jew Ifray, faŋ də wa sôwâ mə tama#Tzk 4.8; 2Izd 24.20-21.»
52«Boni wa ri, sum pay zu dan dlaya! Zə hi tle kwa ar vun so kwawe wə ɓa ri: Hi kə tu ri, hi cu ze mi, ɓay hi wə tak sôwâ məsin məni wə wa' ze də hana.»
53Kəri məni Zezu 'ya ar ri rum, sum pay zu dan dlay kə kul sôwâ Zuwif mə ɗe kə Farisiyen təŋ ra' kuni bak kə rum, ɓay handay təŋ kə ci vun rum kə dan cem cem juku. 54Handay wa' kədan handay um kaw kə dan ge vun ke məsin mum də in dan mə bro' su na.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Le Nouveau Testament et Psaumes en Peve © Alliance Biblique du Tchad, 2014.