Matiye 23
23
I kaw wa ri hay' sum pay zu dan dlay kə sôwâ Farisiyen
(Mak 12.38-39; Luk 11.39-52; 20.45-46)
1Kəri rum, Zezu la' ne kə raw sôwâ kə sum ta zə rum kuna: 2«Sum pay zu dan dlay kə kul sôwâ Zuwif mə ɗe kə Farisiyen wə tle ri kə pay zu dan dlay Moyizə ne kə sôwâ. 3Zə rum, i mun vun nday, ɓay i gi kwa daŋ' məni handay wə mi in ne. Ama i jənok kwa gi nday mi, zə handay cu gi kwa məni handay wə ta' nə mi. 4Handay wə baŋ kwazi' mə kə mbra' məni cu gak tle mi ɓay cin də bəke ɓa sôwâ, ama handay cu bə kaw ɓa nday kə tle kwazi' rum, ko ɗak kə vay ɓa nday mi. 5Handay gi sin nday daŋ' kədan sôwâ nday kara. Handay wə ri ləlay rôwâ rôwâ ge jewre kə jew so ɓa, ɓay handay wə du' uluk zu mbraw nday jəraka#Mat 6.1; Irs 15.38. 6Handay wə keɓ ri suk mə kofo wə ri gi cer ɓay wə keɓ ri suk mə vun kofo wə rawti so Ifray sôwâ Zuwif. 7Handay wa' i sôwâ kaw jeɓ nday wə ri ɓawa sôwâ, ɓay handay wa' i sôwâ ɗe nday kə Bə ta' kwa. 8Ama mə hi, i ar sôwâ ɗe ni kə Bə ta' kwa mi, zə hi daŋ', hi daw bəba, ɓay hi kə Bə ta' kwa ɗaw sara. 9I ɗe swə ɗaw wa nya kə "Bəba" mi, zə hi kə Bəba ɗaw sara. Mum wə wafraya. 10I ar sôwâ ɗe ni kə "Bârî" mi ta', zə hi kə Bârî ɗaw sar, mum nə Kris. 11Swə mə kə mbra' mə du ri, nə faŋ bə gi sin mi#Mat 20.26-27; Mak 9.35; Luk 22.26. 12Swə məni wə mbra' tu rum, bə rum də nde, ɓay swə məni wə hom tu rum, bə rum də fe mbra'a.»
Zezu dan sum pay zu dan dlay kə Farisiyen
(Mak 12.40; Luk 11.39-42,44,52; 20.47)
13«Boni wa ri, sum pay zu dan dlay kə kul sôwâ Zuwif mə ɗe kə Farisiyen, hi sum vur vur, hi wə ta' vun vari ri məni Ifray wə də suk jwə wa sôwâ um wə kor sôwâ məsini! Hi kə tu ri, hi cu wə mun ze ri rum mi, ɓay hi cu wə ar sôwâ məni kə mê' ze də ri rum ze mi.
[14Boni wa ri, sum pay zu dan dlay kə kul sôwâ Zuwif mə ɗe kə Farisiyen, hi sum vur vuru! Hi ti kwa daŋ' məni wə ɓa rənda, ɓay kəri rum hi in dan kə Ifray hâ hâ kədan kəɗam tu sôwâ. Zə rum hi də fe dan ɓok mə toŋo#23.14 Ri ɗerwa rum cu wə du ɗerwa məni wây' cem cem məsin kuni mi.!]
15Boni wa ri, sum pay zu dan dlay kə kul sôwâ Zuwif mə ɗe kə Farisiyen, hi sum vur vuru! Hi wə gaŋ wa nya kə wa mbi daŋ' kədan hi keɓ swə ɗaw məni wə də ve dan mi, ɓay kəri məni hi də um za', hi um gi faŋ swə mə də ri ku hâ mi pâ sem hoɓo.
16Boni wa ri, hi dəŋâr məni wə ta' vari ne kə sôwâ! Hi wə ini: "Swə la' sur vun kə so po' fur sôwâ Zuwif si, dan ge cu wa bə rum mi, ama mum la' sur vun kə jiki mə bondo mə so rum, dan ge kəta' wa bə rumu." 17Hi lay ɓay hi dəŋâra! Mi nə kə mbra' pâ nji su? Njikə mə bondo su? Ko so po' fur məni gi jikə mə bondo rum faŋ ɓay su? 18Hi wə in ta'a: Swə la' sur vun kə kwa cu kwa po' fur si, dan ge cu wa bə rum mi, ama mum la' sur vun kə kwa po' fur məni wa kwa cu kwa po' fur si, dan ge kəta' wa bə rumu. 19Hi dəŋâra! Mi nə kə mbra' pâ nji su? Kwa po' fur su? Ko kwa cu kwa po' fur məni wə gi kwa po' fur rum faŋ ɓay su? 20Zə rum, swə məni sur vun kə kwa cu kwa po' fur, ka bə rum sur vun kə kwa cu kwa po' fur rum kə kwa daŋ' məni njay wə hana. 21Swə məni sur vun kə so po' fur sôwâ Zuwif, ka bə rum sur vun kə so po' fur rum kə Ifray məni suk wə hana. 22Swə məni sur vun kə wafray, ka bə rum sur vun kə kwasuk Ifray kə Ifray məni suk wə wa kwasuk rumu.
23Boni wa ri, sum pay zu dan dlay kə sôwâ Farisiyen, hi sum vur vur, hi wə ne guɓ kwa kura ce' ndə za say, kə tlap reɗ, ɓay dleɓ ne kə Ifray, ama hi wə jeɗ kwa mə kə mbra' məni wə du dan dlay ce' ndə gi kwa mə ɓay, kə we ca, ɓay gi njeŋ, i gi kwa məni kuni zaw, i kaw dan rum kə zel' mi. 24Hi dəŋâr məni wə ta' vari ne kə sôwâ! Hi wə zor kwace kədan hi tak gwâ', ama hi wə sa' njoŋnjoŋo!
25Boni wa ri, sum pay zu dan dlay kə kul sôwâ Zuwif mə ɗe kə Farisiyen, hi sum vur vur, hi wə kol ga' ki timbi kə tasaw, ama rawti nday nyen peɗ kə kwa hura mi kə kwa səna' mi mə bro'o. 26Swə Farisiyen mə dəŋâra! A kol rawti timbi cop, ɓay ndəna' ga' ki rum də ke kəleŋ ta'a.
27Boni wa ri, sum pay zu dan dlay kə kul sôwâ Zuwif mə ɗe kə Farisiyen, hi sum vur vur, hi ce' ndə 'wəy məni sôwâ gila' rum, ɓay kolko' kə ɓəho'o. Ga' rəka rum we ɓay, ama rawti rum nyen peɗ kə so mar kə kwa mə cicimi. 28Ndəna' kə ri ta'a: Sôwâ məsin wə kar ga' rəka mi ce' ndə njeŋ, ama vunduk ri nyen peɗ kə vur vur ɓay sin mə bro'o.»
Dan ɓok wa sum vur vuru
(Luk 11.47-51)
29«Boni wa ri, sum pay zu dan dlay kə kul sôwâ Zuwif mə ɗe kə Farisiyen, hi sum vur vur, hi wə ɗam kwa mə ɓay wa 'wəy sum ka' dan, ɓay hi wə kolko' 'wəy sôwâ mə njeŋ kə ɓəho'o. 30Ɓay hi ini: Namba la' kəzə kə ri mə ba mbri ramba si, namba cu kawvun kə nday kədan namba ci sum ka' dan mi. 31Ndəna', hi we kə tu ri i hi daw rawti sôwâ məni ci sum ka' dana. 32La' ndəna' si, i də kofo kə sin məni ba mbri rami təŋ zu rum nə ye! 33Hi wu', zep kay', hi gak siɗ tu ri wə du boni ri ku mə ma su? 34Zə rum, i mun, na də sin sum ka' dan kə sum gwet ɓay sum pay zu mi ne. Hi də ci sôwâ məsin, hi də gay' sôwâ məsin də wa gu, ɓay hi də pe sôwâ məsin kərem kə ləva wə rawti so Ifray sôwâ Zuwif mi, ɓay hi də keɓ zu nday so kə so. 35Zə rum, dan mə wa sôwâ məni ci sôwâ mə njeŋ daka ri məni swə ɗaw ci Abel, swə mə njeŋ, hâ day ri məni hi ci Zakariya, vay Baraki, mbok du jew Ifray kə kwa cu kwa po' fur, dan rum faŋ də wa ri#Tzk 4.8; 2Izd 24.20-21. 36Na in mi ne, kəzin', dan məni wa sum ci sôwâ məni kuni daŋ' faŋ də wa sôwâ mə tama!»
Zezu ɗik dan wa sôwâ Jeruzalem
(Luk 13.34-35)
37«Jeruzalem, Jeruzalem, həŋ kə məni ci sum ka' dan ɓay ge sôwâ məsin məni Ifray sin hay' riŋ kə gway'i. Sem ma dak na wə keɓ kədan na ɓawa sôwâ maŋ mbə hay' rin ce' ndə ya sinyek wə ɓawa daw sə zə lam tlaw sə su? Ama hi cu bə mi! 38La' ndəna' si, so mi də faŋ vri. 39Na in mi ne: Daka mgbaŋ ni nə hi cu də man we za' mi, hâ day ri məni hi də ini: Ifray nə kuswa' swə məni mbə kə semɗe Bârî!»
Currently Selected:
Matiye 23: KMN
Highlight
Share
Copy
Want to have your highlights saved across all your devices? Sign up or sign in
Le Nouveau Testament et Psaumes en Peve © Alliance Biblique du Tchad, 2014.
