Matiye 9

Zezu car hurbu

(Mak 2.1-12; Luk 5.17-26)

1Zezu ur ta rawti da, ɓay mum faŋ ur mbi gewa ta so umu. 2Sôwâ tle hurbu kə la' bar um daŋ' mbə hay' Zezu kə rumu. Kəri məni Zezu we i handay ve i mum gak car bə rum, mum la' ne kə hurbu: «Vay man, a kaw vunduk ru ye! Kwa mə bro' wû vrum si.» 3Kəri rum, sum pay zu dan dlay ɗik wə vunduk ndaya: «Swə məni nə wə ge dan mə bro' wa Ifraya#9.3 Sum pay zu dan dlay nə wə ta' sôwâ məni wə in dan dlay ɓay pay zə rumu. Ama cop rum si, handay nə sôwâ məni wə wây' kwa.!» 4Zezu we dan ɗik vunduk nday, ɓay mum ci vunu: «Zə mi hi kə dan ɗik mə bro' mə ni nə su? 5Kədan in ne kə hurbu: Kwa mə bro' wû vrum si, ko ini: a car fray ta ye, mə ka kəcik han câ' su? 6Ama na wa' kədan i we Vay sumra' kə gbəgboŋ wa nya kədan mum vrum kwa mə bro'o.» Zə rum, mum la' ne kə hurbu: «A car ye, a tle la' bar gaɓ wû, ɓay a faŋ də so wû kə ndi ye!»

7Swə nə car ɓay 'ya vari so umu. 8Kəri məni raw sôwâ we ndəna', wəlok gi nday, ɓay handay təŋ kə gi mbra' ne kə Ifray zə mum ne gbəgboŋ mə ndani ne kə sumra'a.

Zezu ɗe Matiye

(Mak 2.13-17; Luk 5.27-32)

9Zezu pâ mbə ri rum 'ya. Kəri məni mum wə dle də kofo, mum we swə ɗaw mə ɗe kə Matiye suk wə so ɓawa grama. Mum la' ne numu: «A ta zə rini.» Matiye car ɓay ta zə rumu.

10Kəki rum, Zezu wə ti kwati wə so Matiye. Sum ɓawa grama kə sum gi kwa mə bro' juk gay' wə vun tablə kə rum wanji kə sum ta zə rumu#Luk 15.1-2. 11Kəri məni kul sôwâ Zuwif mə ɗe kə Farisiyen we ndəna', handay ci vun sum ta zə rumu: «Zə mi bə ta' kwa mi wə ti kwati kə sum ɓawa grama wanji kə sum gi kwa mə bro' su?» 12Zezu mun dan nday ɓay la'a: «Sôwâ mə kə tu heɓ cu kə mê' bə waza mi, say sum gaɓa. 13I də keɓ mun zu dan məni nə, məni Ifray ini: Na cu kə mê' kwa po' fur mi, ama we ca. Zə na cu mbə kədan na ɗe sum gi kwa mə njeŋ mi, ama sum gi kwa mə bro'o#Mat 12.7; Oze 6.6.»

Ci vun wa saŋ kwa

(Mak 2.18-22; Luk 5.33-39)

14Kəri rum, sum ta zə Zaŋ-Baptistə mbə hay' Zezu ɓay ci vun rumu: «Zə mi namba kə kul sôwâ Zuwif mə ɗe kə Farisiyen wə saŋ kwa ɓay sum ta zə ru cu saŋ nday mi su?» 15Zezu ɗam vun ndaya: «Hi ɗik i sôwâ məni fe ɗe wə ri dər wə gak gay' sototo kəri məni bə cin ma kəta' du nday su? Cu ndəna' mi! Ama ri məni bə cin ma də pâ mbə du nday nə də mbə kəta'a. Kəri rum, handay də saŋ kwa ɓo. 16Swə ɗaw cu fur mbraw mə kəmbar kə vun zim mə mbrew mi, zə vun zim mə mbrew wə ŋgâr mbraw mə kəmbar, ɓay vun ŋgâr rum faŋ də kofo. 17Ɓay swə ɗaw cu wu' sum mə ɗe kə "viŋə" mə mbrew də rawti mbu sum mə kəmbar mi, zə mbu rum də mun, ɓay sum rum ne də rəka, ɓay mbu rum ɗənoko. Zawa, sôwâ wə wu' sum mə mbrew də mbu sum mə mbrewe. Ndəna' handay hoɓ jak də ke ɓaya.»

Zezu car vay bârî Zuwif mə ma, ɓay ma məti ɗak mbraw umu

(Mak 5.21-43; Luk 8.40-56)

18Kəri məni Zezu wə in dan rum nday ne ɓo, swə ɗaw mə du sum rôwâ Zuwif mbə daya. Mum kuduk nya kor Zezu ɓay la' ne numu: «Vay man mar mgbaŋ ni nə, ama a mbə cin ɓa ru wa sə, ɓay ta də car i.» 19Zezu kə sum ta zə rum car kuni ɓay ra' zə rum kə ta.

20Ma ɗaw kəta' məti wə ta' ca kə gaɓ saŋa. Ta gi kim guɓ wa hoɓ kə gaɓ rumu. Ta mbə hay' Zezu ga' ki Zezu ɓay ɗak zu mbraw umu. 21Zə ta ɗik wə vunduk sa: «Na la' za' ɗak mbraw um taw si, na də cara.» 22Zezu faŋ i we sə ɓay la'a: «Vay man, əŋ kaw vunduk riŋ ye! Zə həŋ ve nan, həŋ car si.» Kəkor sar, ma rə cara.

23Zezu mbə day so bârî Zuwif na. Kəri məni mum we sum pe duɓ kəya' kə raw sôwâ məni wə ci', 24mum la'a: «I wur ti si, zə vay rə cu mar mi, ama ta wə nde sene.» Handay mây numu. 25Kəri məni handay 'way raw sôwâ wur rəka, Zezu ze ta rawti tak i. Mum kaw ɓa vay rə, ɓay ta car fraya. 26Dan rum pla' wə nya rum daŋ'ŋ.

Zezu ar i ne kə dəŋâr hoɓo

27Zezu 'ya ar ri rum, ɓay kəri məni mum wə ta də ri məsin, dəŋâr hoɓ təŋ kə ta zə rumu. Handay do dana: «Vay David, a we ca wa mba!» 28Kəri məni Zezu ze ta rawti so, dəŋâr kuni mbə hay' rum, ɓay mum ci vun ndaya: «Hi ve i na gak gi kwa mə ni nə su?» Handay ɗam vun rumu: «Awo, Bârî.» 29Kəri rum, Zezu ɗak i nday ɓay la'a: «Kwa rum də gi hay' ri ce' ndə məni hi ve dan rumu!» 30Ɓay i nday faŋ weri. Zezu dlay nday kə gbəgboŋo: «I mun ri'i! I in dan rum ne kə swə ɗaw mi!» 31Ama handay 'ya pla' dan Zezu wə nya rum daŋ'ŋ.

Zezu car swə məni cu gak ge dan mi

32Kəri məni handay wə 'ya, sôwâ mbə hay' Zezu kə swə məni cu gak ge dan mi, zə mum kə gam wa rumu. 33Kəri məni Zezu 'way gam rum, swə nə təŋ kə ge dana. Kwa rum jin' wa ne kə raw sôwâ, ɓay handay ini: «Namba cu we kwa mə ndə ni nə wə nya Israyel ɗaw mi!» 34Ama sôwâ Farisiyen ini: «Jwə gam kə məni ne gbəgboŋ ne num kədan mum 'way gam mə ni kuna#Mat 10.25; Mak 3.22; Luk 11.15!»

Zezu ci' ca wa raw sôwâ

35Zezu gaŋ wə so mə rôwâ kə pəɗak nday daŋ'ŋ. Mum ta' kwa wə rawti so Ifray nday, mum ka' Dan mə Kəɗam məni wə in dan wa Jwə Ifray məni wə də mbə, ɓay mum car sôwâ məni kə gaɓ kə sôwâ məni kə rəɓo daŋ'ŋ. 36Kəri məni mum we raw sôwâ, mum ci' ca wa nday, zə handay cik, ɓay handay cu kə kwa məsin mi. Handay ce' ndə cime mə dan vay ji. 37Zə rum, mum la' ne kə sum ta zə rumu: «Sin wakaya juk, ama sum sin rum wə cepe. 38Zə rum, i o bə sine kədan nə sin sum sin məsin kədan handay ɓa wa kwa wakaya rumu.»

Currently Selected:

Matiye 9: KMN

Highlight

Copy