Kwidika 22
22
Mwakukiŋila maheta
1Neyi muntu wakeya hela ŋombi, hela mukoku nakumujaha, hela nakumulandisha, akafuti ŋombi jitanu naŋombi waneyiyi, #Luk 19:8akafuti nyikoku yiwana namukoku waneyiyi.
2Neyi akamukwata ikombi wudi nakubusa itala, neyi akamweta nafwi, hikwakekala muloŋa wawubanji hansaŋu yinduku.
3Neyi mwaana wakamutuntukila, kwakekali muloŋa wawubanji hansaŋu yindi, akafuti kwindi; neyi hakweti chumaku, akamulandi tuhu nawukombi windi wanakoŋiyi.
4Neyi kanyama aneyiyi akamushintakesha nindi wamumi, hela hiŋombi, hela hichimbulu, hela himukoku, akafuti kwindi ayedi.
5Neyi muntu wakadiisha hela iha, hela itempa danyivinyu, neyi wakaleka tuhu chimuna chindi adendeli tuhu, hakudya mwiha dambala damukwawu, akafuti hela yamwiha dindi yasweja kuwaha, hela yamwitempa dindi danyivinyu yasweja kuwaha.
6Neyi kesi kakabutuka kanakwatili kunyiŋa, nakushitula nyikuta yatidiku, hela tidiku yakubula kukesa, hela iha dadeni, wábutwili kesi chalala akafuti hohu.
7Neyi muntu wakamwinka mukwawu hela mali hela yuma kulonda kumuswekela, neyi akuyiyila mwitala danowu muntu, neyi ikombi anamukwati, akafuti chakweseka kayedi nayuma yaneyiyi.
8Neyi ikombi kumukwata nehi, mwiniitala wakakundama kwakwihi nawansompeshi kulonda akatali neyi nakwati chikasa hayuma yambala yamukwawu.
9Hanyiloŋa yejima, hela waŋombi, hela wachimbulu, hela wamukoku, indi kwiji wachuma chakuvwala, indi kwiji wachuma hichuma chakujimbala, wakatenayi muntu nindi, Hichuma chami, muloŋa wanana antu ayedi wakashika kudi ansompeshi. Yowu akatanyishawu ansompeshi, akafuti mukwawu muyedi.
10Neyi muntu wakasokeja kudi mukwawu hela chimbulu, hela ŋombi, hela mukoku, indi kwiji kanyamanyi, neyi wakafwa, indi kwiji akamukatisha, indi kwiji akamutemuna aya kwacheŋi nimuntu wakuchimona nehi,
11akasanyiki Yehova hakachi kawu, mukwawu nindi, Hinakwata chikasa chami hayuma yambala yamukwetuku, nimwenichi aketejumu, mukwawu hakafutaku.
12Ilaŋa neyi amwiyililichu, akafuti kudi mukwachuma chindi.
13Neyi anamusansoli kudi kanyama, chiŋa akamutwelelayu kulonda wunsahu, hakafuta chimuna chakusansola kudi kanyamaku.
14Neyi muntu wakambula chimuna kudi mukwawu, neyi akachikatisha, indi kwiji neyi chakafwa, neyi mwinichimuna wadiŋi wafumahu, akafuti.
15Neyi mwinichimuna wadiŋi hohu, hakafutaku; neyi hichuma chakutambula nakufwetela, chinafwili dehi muwulooku wachu.
Mwakushakaminayi muntu nawakwawu
16Neyi iyala wakamudimbeka mujiki niyena hiyamwotaku, neyi nakami nindi, chalala akaleti nsewu yakusumbula nachu kulonda akekali iŋodindi.
17Neyi tata yamumbanda kwonti kwindi kumwinkayi, akaleti mali mwesekela nsewu yasumbulaŋawu nachu ajiki.
18Mukwakupanda bayi mwakamwiteja kuhandaku.
19Yowu wakakama nakanyama, chiŋa kumujaha hohu.
20Muntu wakabula kumuketwila Yehova inkawindi hohu chimuna, hakamuketwila mukishi, akamukisaŋani chikupu.
21Bayi wakamwila mwenyi chatamaku, hela kumukabisha bayi wakamukabishaku, muloŋa ninenu mwadiŋi enyi mwituŋa daEjipitu.
22Bayi mwakakabisha hoku hela mumbanda wamfwila, hela mwana wanshonaku.
23Neyi wakayikabishahu hela chantesha, neyi akadilila kudami, chalala ami nakatiya kudila kwawu;
24nikuzuwa kwami kwakatata bu-su neyi kesi, nakayijaha nampoku yakabali, niaŋodijenu akekala amfwila, nianyanenu akekala anshona.
25Neyi wakasondamisha mali kudi kazweŋi kawantu ami iwudi nawu, bayi wakamwila neyi wumukwakusondamishaku; bayi wakamudiila yakushilahuku.
26Neyi ifuku dimu wakakwatila chuma chamukwenu chakuvwala, wakamufuntishilichu henohu itaŋwa dichidi kanda diholoki;
27muloŋa chuma chindi chakudibuta nachu chochenochu hohu, dichi chuma chindi chakuvwala chahamujimba windi; ochu wakakama nanka? Chamba kela, chakandililayi, ami nakatiya, muloŋa ami nikweti luwi.
28Bayi wakatuka Nzambuku, hela #Yil 23:5kushiŋa bayi wakashiŋa nyuuli yawantu eyuku.
29Bayi wakalaba kulambula hela yakudya yeyi yamumaha, hela vinyu yeyi yinavuli dehuku.
Wedi wahadi anyaneyi amayala wakanyinkiyi.
30Dichi chiwakela naŋombi jeyi, nanyikoku yeyi; akashakami mafuku atanu nayedi namama yindi, ifuku damuchitanu nachisatu wakanyinkiyi.
31Mwakekali antu ajila akunjililami; dichi bayi mwakadyaŋa mbiji yamukokaku, mwakayinatili atuwa.
Currently Selected:
Kwidika 22: MWW04
Highlight
Share
Copy
Want to have your highlights saved across all your devices? Sign up or sign in
The Holy Bible in Lunda Ndembu © United Bible Societies, 2003.
