Kutachika 38
38
Yuda naTamari
1Wena mwakowu Yuda wanyamukili kudi anakwindi, hakuya kudi muntu wakuAdulami, ijina dindi Hira.
2Kwenoku Yuda wamweni mumbanda mwana kamuntu wakuKenani, ijina dindi Shuwa, wamutambwili, hakwiŋila mudi yena.
3Yena wabaabili ivumu wavweli mwana weyala. Yuda wamutumbili ijina dindi, nindi Eri.
4Wabaabili cheŋi ivumu, wavweli mwana weyala, wamutumbili ijina dindi, nindi Onani.
5Wavweli cheŋi mwana weyala, wamutumbili ijina dindi, nindi Shela; hamuvweliyi Yuda wadiŋi kuKezibi.
6Yuda wamusumbwilili wedi windi Eri mumbanda, ijina dindi Tamari.
7Wedi waYuda Eri wadiŋi watama kumesu aYehova; Yehova wamujahili.
8Yuda wamwilili Onani, nindi, Iŋilaku mudi iŋodamanakweyi, wakamwilili mudimu wamfumwindi, wakamusaŋwili manakweyi mbutu.
9Onani welukili nindi mwana hakekala winduku, dichi cheŋililiyi mudi iŋodamanakwindi, wechilili mbutu hamaseki, kulonda abuli kumusaŋwila manakwindi mbutu.
10Chuma china cheliliyi Yehova wachimweni nindi chatama, wamujahili niyena nawa.
11Yuda wamwilili mukuwindi Tamari, nindi, Shakamaku wumfwila kwitala datata yeyi, wutalili kwamba kakulilayi mwanami Shela, muloŋa welili nindi wakenza kafwa neyi chafwiluwu anakwindi. Tamari wayili nakushakama kwitala datata yindi.
12Chimwahitili mafuku amavulu mwana kaShuwa iŋodaYuda wafwili. Yuda wakumishili kudila, hakuya kwadiŋuwu antu indi atewilaŋa nyikoku yindi, ayili niyena niibwambu dindi Hira wakuAdulami.
13Amulejeli Tamari nawu, Mukuweyi hakuya kuTimina akatewuli nyikoku yindi.
14Wavuulili mahinindi awumfwila, wadibutili ihina kumesu, nakuvwala chachiwahi, washakamini muchisu champwembu yakuEnayimi, kumbadi yanjila yaya kuTimina, muloŋa wamweni Shela nakuli dehi, kumwinkayi nawu amusumbuli nehi.
15Yuda chamumweniyi, watoŋojokeli nindi kwiji hichivumbi nanochu chanadibutiyi kumesu indi.
16Yuda hakuya kudi yena kumbadi yanjila, nindi, Tuyaŋa mwani, wuŋiteji kwiŋila mudeyi, muloŋa helukili nindi diyi mukuwinduku. Yena mumbanda nindi, Wukunyinkadi kulonda wiŋili mudi ami?
17Nindi, Nukukutemeshela mwana kampembi wakwiyinda dami. Mumbanda nindi, Wukunyinkadi nikwatuku nitalili nachu chiwakantemeshela?
18Yena nindi, Ochu nikwinkidi wukwatuku? Mumbanda nindi, Nikazeya keyi, nimuya weyi, nimukombu weyi yidi kuchikasa cheyi. Wamwinkeli, weŋilili mudi yena, niyena wabaabili ivumu.
19Wanyamukili kwindi, wayili, yosubula niihina dadibutiliyi kumesu, hakuvwala cheŋi mahinindi awumfwila.
20Yuda watemesheli mwana kampembi nebwambu dindi wakuAdulami, kulonda atambuli cheŋi kudi mumbanda yuma yamwinkeliyi kukwataku. Ilaŋa hamuwenuku.
21Wehwili amayala akwenoku, nindi, Chivumbi wadiŋi kuEnayimi hambadi yanjila wudi kudihi? Nawu, Akunu hikwadiŋi chivumbuku.
22Wafuntili cheŋi kudi Yuda, nindi, Hinamuwanuku, niamayala akwenoku nawu, Akunu hikwadiŋi chivumbuku.
23Yuda nindi, Asendi kwindi ayi nachu, akenda katukoolesha nsonyi. Tala ntahi ami mwana kampembi namutemeshi, ilaŋa hiwunamuwanuku.
24Chimwahitili kwiji neyi tukweji tusatu, amulejeli Yuda nawu, Mukuweyi Tamari neli wuvumbi, wudi nevumu. Yuda nindi, Kamwidishenu, kulonda #Lev 20:10; 21:9; Kuhit 22:21amushiti.
25Chamwidishiluwu, wamutemesheleli mukuwindi, nakwila nindi, Yenowu iyala wukweti yumiyi diyi wanyinka ivumu. Nindi, Shinshikaku chachiwahi mwani, yumiyi, nikazeya nimuya, nimukombu, yanyi?
26Yuda wayitejeli, nindi, Komana yena diyi #1 Sam 24:17waloŋa chakubadikami, nanochu chinabulili kumwinkayi mwanami Shela. Hadilukili nindi nawa cheŋuku.
27Hafunyishiliyi komana mwivumu dindi mwadiŋi anyana #25:24ampamba.
28Chafunyishiliyi wumu wedishili chikasa hanzi; nkoŋu wanoneni wanda wuchinana wamukasili kuchikasa chindi, nindi, Yeniwu diyi wasambila kwidika.
29Chafuntishiliyi chikasa chindi manakwindi hakwidika, kutiya nkoŋu nindi, Ehe-e, wunadibusili ŋahi? Dichi chamutumbililuwu ijina dindi, nawu #Luti 4:12, 18; Mat 1:3Perezi (Mukwakubusa).
30Nkumininaku manakwindi edika nikwidika, yenowu wadiŋi nawanda wuchinana kuchikasa chindi. Yena ijina dindi amutumbili, nawu Zera.
Currently Selected:
Kutachika 38: MWW04
Highlight
Share
Copy
Want to have your highlights saved across all your devices? Sign up or sign in
The Holy Bible in Lunda Ndembu © United Bible Societies, 2003.
