Yohanes 18

Yesu léle

(Mat 26.47-56; Mar 14.43-50; Luk 22.47-53)

1Esi Yesu do gbe sia ɖa vɔ la, eya kple eƒe nusrɔ̃lawo zɔ to Kidron-bali la me yi afi si abɔ aɖe le, eye woge ɖe eme. 2Azɔ Yuda, ame si fia eyomemɔ hã nya teƒea elabe Yesu kple eƒe nusrɔ̃lawo ƒoa ƒu ɖe afi ma enuenu. 3Ale Yuda xɔ asrafoha aɖe kpe ɖe nunɔlagãwo kple Farisitɔwo ƒe dɔlawo ŋu, eye wòkplɔ wo yi ɖe abɔ la me. Wotsɔ akaɖi, akakati kple lãnu vovovowo ɖe asi. 4Esi Yesu nya nu siwo katã gbɔna dzɔdzɔ ge ɖe edzi ta la, ezɔ va ŋgɔ bia wo be: “Ame ka dim miele?” 5Woɖo eŋu be: “Yesu Nazaretetɔ lae.”

Egblɔ na wo be: “Nyee.” Yuda, ame si fia eyomemɔ la le tsitre ɖe wo gbɔ. 6Esi Yesu gblɔ na wo be: “Nyee” la, wogbugbɔ ɖe megbe eye wodze anyi. 7Egabia wo be: “Ame ka dim miele?”

Woɖo eŋu be: “Yesu Nazaretetɔ lae.”

8Yesu gblɔ na wo be: “Megblɔ na mi xoxo be nyee. Eya ta nenye diyem miele la, miɖe mɔ na ame siawo nadzo.” 9Egblɔ esia be woawu nya si wògblɔ va yi la nu be: “Ame siwo nètsɔ nam la dometɔ aɖeke mebu o.” 10Tete Simon Petro he yi si le esi la ɖe go, eye wòda nunɔlagã la ƒe dɔla hekpa ɖusime to nɛ. Dɔla sia ŋkɔe nye Malxo. 11#Mat 26.39; Mar 14.36; Luk 22.42. Yesu gblɔ na Petro be: “Tsɔ wò yia de aku me! Ɖe mele nam be mano nu si le fukpekpekplu si Tɔ́ la tsɔ nam la me oa?”

Yesu le Hana ŋkume

12Ale asrafoha la kple woƒe aʋakplɔlagã kpakple Yudatɔwo ƒe dɔlawo lé Yesu heblae. 13Wokplɔe yi ɖe Hana gbɔe gbã. Hana nye Kayafa si nye nunɔlagã le ƒe ma me la, to. 14#Yoh 11.49, 50. Kayafae nye ame si ɖo aɖaŋu na Yudatɔwo, be enyo wu sãa be ame ɖeka naku ɖe dukɔa nu.

Petro gbe nu le Yesu gbɔ

(Mat 26.69-70; Mar 14.66-68; Luk 22.55-57)

15Simon Petro kple nusrɔ̃la bubu aɖe dze Yesu yome. Nusrɔ̃la bubu sia nye nunɔlagã la ƒe ame nyanyɛ, eya ta eya kplɔ Yesu ɖo ge ɖe nunɔlagã la ƒe aƒea me, 16esime Petro ya le tsitre le xexe ɖe agboa nu. Nusrɔ̃la bubu sia si nye nunɔlagã la ƒe ame nyanyɛ la do go yi ɖaƒo nu na nyɔnuvi si le agboa nu dzɔm la, eye wòkplɔ Petro ge ɖe eme. 17Nyɔnuvi agbonudzɔla sia bia Petro be: “Wò hã ɖe, menye ame sia ƒe nusrɔ̃lawo dometɔ ɖeka nènye oa?” Eɖo eŋu be: “Gbeɖe, nyemenye eƒe nusrɔ̃la o.” 18Azɔ esi vuvɔ nɔ wɔwɔm ta la, dɔlaawo kple dzɔlaawo do akadzo, tsi tsitre ƒo xlãe nɔ ƒuƒum. Petro hã le tsitre ɖe wo gbɔ nɔ dzoa ƒum.

Nunɔlagã la bia gbe Yesu

(Mat 26.59-66; Mar 14.55-64; Luk 22.66-71)

19Nunɔlagã la bia gbe Yesu le eƒe nusrɔ̃lawo kple eƒe nufiafia ŋuti. 20Yesu ɖo eŋu nɛ be: “Nye la, meƒoa nu le dutoƒo faa na amewo katã. Mefiaa nu le ƒuƒoƒewo kple le mawuƒe la me, afi siwo Yudatɔwo katã kpea ta ɖo, eye nyemegblɔa nya aɖeke le bebeme o. 21Nu ka tae nègale gbe biamem? Bia ame siwo se nye nyawo. Woawo la, wonya nya siwo megblɔ.” 22Esi wògblɔ nya sia la, dzɔlawo dometɔ ɖeka si le tsitre ɖe egbɔ la ƒo tome nɛ gblɔ be: “Mɔ kae nèkpɔ aɖo nya ŋu na nunɔlagã la nenema?” 23Yesu ɖo eŋu nɛ be: “Ne megblɔ nya masɔmasɔ aɖe la, gblɔe ne ame sia ame nase. Ke ne nu si megblɔ la nye nyateƒe ɖe, nu ka ta nèƒom?” 24Azɔ Yesu le babla nenema, eye Hana ɖoe ɖe Kayafa, nunɔlagã la gbɔ.

Petro gagbe nu le Yesu gbɔ

(Mat 26.71-75; Mar 14.69-72; Luk 22.58-62)

25Azɔ la, Simon Petro gale tsitre le dzoa ƒum ko. Wobiae be: “Wò hã ɖe, menye eƒe nusrɔ̃lawo dometɔ ɖeka nènye oa?” Ke esẽ nu gblɔ be: “Gbeɖe, nyemenye eƒe nusrɔ̃la o.” 26Nunɔlagã la ƒe dɔlawo dometɔ ɖeka, si nye ame si ƒe to Petro kpa nɔvi la biae be: “Ɖe nyemekpɔ wò le egbɔ le abɔa me oa?” 27Petro gasẽ nu ake. Enumake koklo ku atɔ.

Wokplɔ Yesu va Pilato gbɔe

(Mat 27.1-2, 11-14; Mar 15.1-5; Luk 23.1-5)

28Ŋdi kanya la, wokplɔ Yesu tso Kayafa ƒeme yi ɖe mɔ́mefia la ƒe fiasã me. Yudatɔwo ƒe amegãwo ŋutɔ mege ɖe fiasã la me o, elabe wodi be yewo ŋuti nanɔ kɔkɔe hena ŋutitoto la ɖuɖu. 29Eya ta Pilato do go yi wo gbɔ eye wòbia wo be: “Nya kae mietsɔ ɖe ame sia ŋu?” 30Woɖo eŋu nɛ be: “Ame sia ɖe menye nuvɔ̃ɖi wɔla o la, anye ne míekplɔe vɛ na wò o.” 31Pilato gblɔ na wo be: “Ke mikplɔe yii, ne miawo ŋutɔ miadrɔ̃ ʋɔnui ɖe miaƒe se nu.” Yudatɔwo ƒe amegãwo ɖo eŋu na Pilato be: “Womeɖe mɔ na mí be míawu ame o.” 32#Yoh 3.14; 12.32. Nu sia dzɔ be nya si Yesu gblɔ ɖi le ku si ƒomevi ku ge wòala ŋu la nava eme.

33Pilato trɔ yi ɖe fiasã la me eye wòyɔ Yesu biae be: “Wòe nye Yudatɔwo ƒe fia laa?”

34Yesu ɖo eŋu be: “Wò ŋutɔ koe bia nya siam loo, alo ame aɖewoe gblɔ nye nya na wò?” 35Pilato ɖo eŋu be: “Yudatɔwo menyea? Wò ŋutɔ mia detɔwo kple nunɔlagãwoe kplɔ wò vɛ nam. Nu kae nèwɔ?” 36Yesu ɖo eŋu be: “Nye fiaɖuƒe metso xexe sia me o. Ne nye fiaɖuƒe ɖe wòtso xexe sia me la, anye ne nye dɔlawo ʋli tanye eye nyemege ɖe Yudatɔwo si me o. Ke nye fiaɖuƒe la metso xexe sia me o.” 37Pilato biae be: “Ekema fiae nènyea?” Yesu ɖo eŋu be: “Wòe gblɔe be fiae menye. Nye la, esia tae medzɔ ɖo, eye eya tae meva xexea me ɖo be magblɔ nyateƒe la afia. Ame sia ame si ɖoa tom la tso nyateƒea me.”

38Pilato bia be: “Nu kae nye nyateƒe?”

Wotso kufia na Yesu

(Mat 27.15-31; Mar 15.6-20; Luk 23.13-25)

Esi Pilato gblɔ nya sia vɔ la, egado go yi Yudatɔwo gbɔ le xexe eye wògblɔ na wo be: “Nyemekpɔ be ame sia wɔ nuvɔ̃ɖi aɖeke o. 39Le miaƒe dekɔnu nu la, ele be maɖe asi le gaxɔmenɔla ɖeka ŋu na mi le Paskaa me. Miedi be maɖe asi le Yudatɔwo ƒe fia la ŋu na mia?” 40Wodo ɣli be: “Gbeɖe, menye ame sia o! Ɖe asi le Baraba ŋu na mí!” Ke Baraba la, adzodala wònye.

Currently Selected:

Yohanes 18: EB14

Highlight

Copy