ڢَارَوَ 39
39
يُوسُڢَ يَايِ وَ ڢُواْتِڢَرْ حِدِمَ
1عَكَ كُوَ غَنْغَرَ دَ يُوسُڢَ ذُوَا مَصَرْ؞ سَيْ ڢُواْتِڢَرْ مُتُمِنْ مَصَرْ، شُوغَبَنْ یَنْ غَادِنْ سَرْكِے ڢِرْعَوْنَ، يَسَيٜىٰشِ دَغَ حَنُّنْ إِسْمَٰعِيلَاوَا، وَطَنْدَ سُكَ غَنْغَرُواْ دَشِ ذُوَا ثَنْ؞ 2يَهْوٜىٰهْ كُوَ يَنَ تَرٜىٰدَ يُوسُڢَ، حَرْ يَذَمَ مُتُمْ مَيْ نَصَرَا ثِكِنْ غِدَنْ مَيْغِدَنْسَ مُتُمِنْ مَصَرْ؞#أَيُّكَنْ 7.9 3مَيْغِدَنْ يُوسُڢَ كُوَ يَا غَانٜىٰ ثٜىٰوَ يَهْوٜىٰهْ يَنَ تَرٜىٰدَ يُوسُڢَ؞ دُكَنْ أَبِنْدَ يُوسُڢَ يَيِ، يَهْوٜىٰهْ يَكَنْسَا أَبِنْ يَيَلْوَتَ أَ حَنُّنْسَ؞ 4يُوسُڢَ كُوَ يَا سَامِ ڢَضٍ جِنِ أَعِدُوانْ مَيْغِدَنْسَ، يَنَيِ مَسَ حِدِمَ؞ ڢُواْتِڢَرْ كُوَ يَا سَا يَذَمَ شُوغَبَا بِسَ غِدَنْسَ، كُمَ دُكَنْ أَبِنْدَ يَكٜىٰدَشِ يَا دَنْڧَ أَ حَنُّنْسَ؞ 5دَغَ لُواْكَثِنْ دَ ڢُواْتِڢَرْ مُتُمِنْ مَصَرْ نَنْ يَا سَا يُوسُڢَ يَذَمَ شُوغَبَا بِسَ غِدَنْسَ دَ دُكَنْ أَبِنْدَ يَكٜىٰدَشِ، يَهْوٜىٰهْ يَا أَلْبَرْكَثِ غِدَنْ ڢُواْتِڢَرْ سَبُواْدَ يُوسُڢَ؞ أَلْبَرْكَرْ يَهْوٜىٰهْ كُوَ تَنَ عَبِسَ دُكَنْ أَبِنْدَ يَكٜىٰدَشِ، نَغِدَا دَ نَڢِيلَيٜىٰ؞ 6يَا كُوَ بَرْ دُكَنْ أَبِنْدَ يَكٜىٰدَشِ أَ حَنُّنْ يُوسُڢَ؞ بَا يَتُنَانِنْ كُواْمٜىٰ، سَيْدَيْ عَبِنْثِنْ دَ ذَيْثِ؞
مَاتَرْ ڢُواْتِڢَرْ تَا نٜىٰمِ يُوسُڢَ يَݣُونَ دَ عِتَ
يُوسُڢَ ڢَا ݣَكْݣَاوَا نٜىٰ، مَيْ ݣَنْ غَنِ؞ 7وَتَرَانَ، مَاتَرْ مَيْغِدَنْسَ تَا سَا عِدُوانْتَ عَكَنْ يُوسُڢَ سَيْ تَثٜىٰ «كَݣُونَ دَنِے!» 8عَمَّا يُوسُڢَ يَڧِ، يَثٜىٰ وَ مَاتَرْ مَيْغِدَنْسَ «دُوبَ ڢَا، مَيْغِدَانَ بَا يَتُنَانِنْ كُواْمٜىٰ عَثِكِنْ غِدَنَّنْ، كُمَ كُواْوَنٜىٰ أَبِنْدَ يَكٜىٰدَشِ يَا بَرْ شِ أَ هَنُّونَ؞ 9شِے بَيْ ڢِينِ إِيكُواْ أَغِدَنَّنْبَ، بَيْ كُمَ حَنَ مِنِ كُواْمٜىٰبَ سَيْ كٜىٰ دَيَكٜىٰ كٜىٰثٜىٰ مَاتَرْسَ؞ دُوانْمٜىٰ ذَنْيِ وَنَّنْ بَبَّرْ مُغُنْتَا، إِنْيِ وَ اللَّهْ ذُنُوبِ؟» 10كُواْدَيَكٜىٰ تَايِتَيِ وَ يُوسُڢَ مَغَنَ كُواْوَثٜىٰ رَانَ، عَمَّا بَيْ سَوْرَرٜىٰتَبَ، بَلّٜىٰ يَيَرْدَ يَݣُونَ دَ عِتَ كُواْ يَذَوْنَ تَرٜىٰدَ عِتَ؞
11وَتَرَانَ، يُوسُڢَ يَا شِغَ غِدَنْ دُواْمِنْ يَيِ عَيْكِ، كُمَ بَابُ كُواْوَ دَغَ ثِكِنْ مَظَا مَاسُ عَيْكِ أَغِدَنْ، 12سَيْ تَكَامَ رِغَرْسَ، تَنَ ثٜىٰوَ «كَݣُونَ دَنِے؞» سَيْ يَبَرْ مَتَ رِغَرْ أَ حَنُّنْتَ، يَغُدُ وَجٜىٰ؞ 13دَ تَغَ يَا بَرْ رِغَرْسَ أَ حَنُّنْتَ يَا غُدُ يَا ڢِتَ وَجٜىٰ، 14سَيْ تَيِ تَ إِيهُ، تَكِرَا مُتَنٜىٰنْ غِدَنْ، تَثٜىٰمُسُ «كُدُوبَ كُغَنِ، مِجِنَ يَا كَٰوُاْ مَنَ طَنْ إِبْرَانِيَاوَا، غَاشِ يَنَ ثِنْ مُتُنْثِنْمُ! يَا ذُواْ وُرِينَ دُواْمِنْ يَݣُونَ دَنِے، سَيْنَيِ إِيهُ دَ ڧَرْڢِے؞ 15دَيَجِ نَتَادَ مُرْيَتَ نَيِ إِيهُ، سَيْ يَبَرْ مِنِ رِغَرْسَ يَغُدُ يَتَڢِے وَجٜىٰ؞»
16سَيْ تَ أَجِيٜىٰ رِغَرْ أَوُرِنْتَ حَرْ مَيْغِدَنْ يُوسُڢَ يَدَاوُاْ غِدَا؞ 17سَيْ تَمَيَرْ مَسَ دَ مَغَنَرْ حَكَ، تَنَ ثٜىٰوَ «بَاوَنَّنْ، طَنْ إِبْرَنِيَاوَنْ دَ كَكَٰوُاْ مَنَ، يَا ذُواْ وُرِينَ دُواْمِنْ يَثِ مُتُنْثِنَ؞ 18عَمَّا دَظَرَرْ نَا تَادَ مُرْيَتَ نَايِ إِيهُ، سَيْ يَغُدُ يَبَرْ رِغَرْسَ أَ هَنُّونَ، يَغُدُ ذُوَا وَجٜىٰ؞»
19بَايَنْدَ مَيْغِدَنْ يُوسُڢَ يَجِ مَغَنَرْ مَاتَرْسَ ثٜىٰوَ «أَبِنْدَ بَاوَنْكَ يَيِ دَنِے كٜىٰنَنْ،» سَيْ ڢُشِنْسَ يَتَاشِ سُواْسَيْ؞ 20سَيْ مَيْغِدَنْ يُوسُڢَ يَطَوْكٜىٰشِ يَجٜىٰڢَ شِ عَكُرْكُكُ عِنْدَ عَكٜىٰ كُلّٜىٰ یَنْ كُرْكُكُنْ سَرْكِے؞ يُوسُڢَ يَذَوْنَ عَكُرْكُكُنْ؞ 21عَمَّا يَهْوٜىٰهْ يَا كَسَنْثٜىٰ تَرٜىٰ دَشِ؞ يَا نُونَ مَسَ ڧَوْنَرْسَ، يَبَا شِ ڢَضٍ جِنِ أَعِدُوانْ شُوغَبَنْ مَاسُ غَادِنْ یَنْ كُرْكُكُنْ؞#أَيُّكَنْ 7.9 22سَيْ شُوغَبَنْ مَاسُ غَادِنْ یَنْ كُرْكُكُنْ يَدَنْڧَ وَ يُوسُڢَ سَوْرَنْ یَنْ كُرْكُكُنْ أَ حَنُّ؞ دُكْ أَبِنْدَ ذَاعَيِ أَوُرِنْ، يُوسُڢَ نٜىٰ يَكٜىٰيِ مُسُ جَغُواْرَ؞ 23شُوغَبَنْ مَاسُ غَادِنْ یَنْ كُرْكُكُنْ، بَيْدَامُبَ عَكَنْ أَبُبُوَنْ دَسُكٜىٰ عَڧَرْڧَشِنْ يُوسُڢَ، غَمَا يَهْوٜىٰهْ يَنَ تَرٜىٰدَ يُوسُڢَ؞ كُمَ دُكَنْ أَبِنْدَ يَيِ، يَهْوٜىٰهْ يَكَنْ بَاشِ نَصَرَا؞
Currently Selected:
ڢَارَوَ 39: hauAS
Highlight
Share
Copy
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020