IIMU/UUNGW 8

Alhhe'eesoó tluwoó da/tén

1Ala Mungú Noa guri insláy nee makaydá' baraá miringamoó i diriiá'. Mungú fur'ár ur gari ya/aáw gawaá daanduú yaamu, ma'aay nay /aaruyé'. 2Kutlaay sleémeero oo iloodá' uren kuri tseék, nee foxaá gawaá doori kiri tseék, tluwaay iri tsatiít. 3Ma'aay nay /aaraaruyé' gawaá yaamuwo. Alaá deelór tsiiru nee mibeeraá kooane, ma'aay nay /aaruwa hhe'eesiyé'. 4Bál slahhángw faanqw tawa mibaá nee faanqw miringamo ina iwiít gawaá tlom'aá Ararati. 5Ma'aay nay /araaruyé' ay slahhángw mibaangw. Bál slahhángw mibaangw tawa wak, sagér tlom'i niri geehhouúr.

6Alaá deelo mibeeraá tsiyáhh iwa waaráhh, Noa fooxadá' aa tleéhh gawaá miringamií alé, gana kiís. 7Xwaa'ari gari ya/aáw, ala xwaa'ari ina harweeraariín ay ma'aay ngar wa faakiyé' gawaá daanduú yaamuwo. 8Hhooki sleeme gari ya/aáw as ngiwa tsaahhi, xáy, ma'aay naa faakií'i daanduú yaamuwo.

9Ala hhookidá' dír ya'aawós ngi qas ngiwa aandiiká, ina kí/ amór Noa baraá miringamo. Asma ma'aay i hatsiyá' gawaá daanduú yaamu sleémeerowo. Noa hhooki gari taataáhh, gari óh, gari amoorós i dahaás baraá miringamií alé. 10Noa iri malé dán deelo faanqw, aluuwo hhookidá' gari malé ya/aáw ki/imaá tsare. 11Hhookidá' nay kí/ tsiindoowo, i loo/ír naá/ koón afkose, ar xa'anoó ta bay seituúni. Naagáy Noa gari tsaáhh adór ma'aay nira faakiyé' gawaá yaamuwo. 12Noa iri malé dán deelo faanqw, hhooki gari malé ya/aáw, ala naa baloó amoorósí ki/ká.

13Qoomár Noa kureeriiwós tawa tsiire lahhoó' nee wak, slahhángw geera tawa wak, qoomaadae ma'aay naa /oné' gawaá daanduú yaamuwo. Noa tuuntukmár miringamo gari hingeés, nee iri qaytsiít, naxés, yaamu naa kahiyé'. 14Nee slahhángw tsár tawa mibeeri tsár nee faanqw, yaamu naa kahmu hhe'eesiyé'.

15Mungú Noa guri báy, 16«Ti'iít baraá miringamoowo, kuúng nee aamaarók nee daaqaywók nee tlaawoó daaqaywoge. 17Umuúqo gár slafa, tsir/o nee makaay, nee muruú gur'eérár hi'iimita ar ti'iiteek, as iwa kumiitiya' xwaylaro, iwa doogina', nee iwa hatsiya' baraá yaamuwo.» 18Noa iri ti'iít, inós nee daaqaywós nee aamaarós nee tlaawoó daaqaywose. 19Umuúqo makiito'ooro nee umuúqo gár gurúr hi'iimita, nee umuúqo tsir/ooro nina ti'iitiyé' baraá miringamoowo, umuúqo gaaro nee daa'awtós.

Ilahhooár Noa

20Noa kitángw ilahhooa#8:20 Kitángw ilahhooa: A dír Mungú kuwa ilahhooárí duxaaxin. guri tleéhh as AAKOÓ MUNGÚ, makiito'ór wák gari taataáhh baraá umuúqo daa'aweemaá makaá hhohhoe, nee tsir/ír wák gari taataáhh baraá umuúqo daa'aweemaá tsir/ór hhohhoe, gari didá' wa daá/ ilahhooár wá ale. 21AAKOÓ MUNGÚ slaahhareraá tsuuá' giri sláy awa ngwa sla'atisiye'. AAKOÓ MUNGÚ iri baraá muunaáwós i oó', «Yaamu i baloó lu'usaaká alaá adoorihe asma muu, asma inslawoó hee ku tlákw iimír iimu/uungose. Aníng muruú slaáf sleémeero u malé qwaareesaaká baloó alé, ar adoodá' ngira tleéhh. 22Qooma sleémeero ar yaamu iwa kumiitiya', qoomár dahaasiingw nee bu'uungw, qoomár tsaaqwa nee tsee/amá, qoomár age nee buhaare, tam tlaatla/aangw nee xweera i baloó lakiitiaaká.»

Currently Selected:

IIMU/UUNGW 8: IRQW

Highlight

Copy