LUKA 2

Yesu kuwa laqwaál

(Mat 1:18-25)

1Qoomaadae waawutmoó múk Roma, kudá' ta bay Augusto, hara'aya gana oó' umér múk baraá yaamu sleémeero kawa gooin. 2Gooirí ar geera qoomár Kurenio tawa ga/aawusmoó yaamaá Shamu. 3Muu sleémeero tari umer'ín gooír áy, umuúqo heewo amór gixsarós.

4Yosefu sleeme iri Galilayár wa tláy, baraá gixsár Nasareti, iri tsa/án yaamaá Yudea, ay dír gixsár Daudi, ar ta bay Betilehemu, asma inós oo guruú doó Daudi. 5Inós nee Maria tidá' aa lehhiít tina alkoné' as kiwa gooin, nee qoomaadae Maria a tsiiháy. 6Tawa amoodií kahhi, deelór xwaylarós iri xeér, 7na/oó garma guri xwayluúr oo baris. Guri tsiitís ar inqwaruú na/oó qawri. Guri qaatís baraá miringamoó gitsór hikwa ki qamaamin. Asma baraá doó dahaayeero pa/aangw kwaa slayká.

De'eemuuse nee malayke

8Baraá yaamuudae de'eemuuserka i deer ar baraá tleesantá hoot, nee bee/angw'ín kun xumxaaxún xweeraawo ar baalaqaasi. 9Malaykamoó Aako giri gaanslár harati'iít, xirfuú Aako gay i gwa/aát bihhe sleémeero, tari ló'wa da'ayuut. 10Ala malaykamo giri báy, «Ma da'ayumiitaara', asma án kuungá' nuna Ya/abtór hhó' i huúw ar qwal/amaayér ur dír muu sleémeero. 11Asma laarí baraá gixsár Daudiwo ba/amusmoohúng kwaa laqwaál, inós an Krístó Aako. 12Layár ta aanda' a tí, ‹Na/oó qawri u didií eerá', kwaa tsiitiís ar inqwaruú na/oó qawri, kwaa qaatiís baraá miringamoó gitsór hikwa ki qamaamin.› »

13Naxés siiwadár kilae daqtá yaariir ar malaykér gawaá doori ta dinkwa nee malaykamoodá', ta Munguú xirfayeemiis, ta kaahi,

14«Munguú gawaá doorií dirií' i xirfuuti,

nee wayda ni baraá yaamií hardihi

dír mukdá' aa gurií baá/.»

15Qoomár malaykeedá' iwa gawaá doorí kí/, de'eemuusér aáng tari axweés ta kaahi, «Gimsé', a tlawaán ay Betilehemu, tidá' aa tleehharut, Aako naa atén i oó' a artá awaán.»

16Tari gaanslár tláy, Maria nee Yosefu kay didií áy, nee na/ayduú qawri kwaa qaatiís baraá miringamoó gitsór hikwa ki qamaamin. 17Na/aydá' kuwa ár, kangwdá' kaa báy daanduú na/aywihe kuri oó'. 18Mukdá' sleémeero aa axaas tari waa/oó/, asma tí de'eemuuse aa ó'. 19Ala Maria tí sleémeero gari alhoorés baraá muunaáwose. 20De'eemuuseedá' iri kí/, ta hara Munguú xirfayeemiis, nee kuwa diidi'iimisi, as tidá' sleémeero taa axaás nee taa ár, adoodá' kara dir'ín i oó' nee malaykamo.

Hheehhe'eesár Yesu

21Bál dakaát an hheehhe'eesár na/aay, umuuwós kuri báy Yesu, adoodá' malaykamo ngura oó' iimír kuwa tsihiiká.

Yesu kuwa baraá Doó Mungú i huúw

22Deelór Yosefu nee Maria tiwa hheehhe'eesiya' iwa xeér tari Yerusalemúr káy as na/aay kuwa dír Aakoó i haniisi ar adoodá' hara'ayár Mose i kat. 23(adór kara gooín baraá hara'ayár Aakoowo, «Umuúqo na/oó garma oo baris dír aayoorose ku bay oo hhoohhoó' dír Aakoowo.») 24Gár hatlá' sleeme a ilahhooár muruú ta tsu/i kawa haniisi, adoodá' hara'ayár Aako i kat, «Hhooka tsár laqaá na/aá tsár awa hhooka.»

25Baraadá' Yerusalemuwo heeko i deer, umuuwós a Simeon. Inós a heé hota ganaá' oo Mungú gwa haratlintii'. Gurkwa/asár múk Israeli gan daamaarán ar haraxu'uti. Inós Qeeruú hhoohhoó' oo Mungú gu kón. 26Inós kwa geerií ádbáy nee Qeeruú hhoohhoó' oo Mungú gídaabá i gwaaiiká ay dír Krístó Aako ngway ari. 27Simeon kuna geerahaár nee Qeeruú hhoohhoó' oo Mungú ay baraá Doó Mungú, qoomaarihe Yesu xwayliteérós guna húp baraá Doó Mungú as hariimadaá hara'aya kiwa boo/eesi daanduuwose, 28Simeon guri ilaóh ar dabaawós, Mungú guri xirfayeemiís iri oó',

29«Aáko, daxta sagadiyusmoowók ya/aámár gwa'ara

ngi slay ar wayda adoodá' kara ó',

30asma ilaaeé' ba/amarók ngaa ariyé',

31tidá' taa amohhe'és dír ilaá muu sleémeerowo,

32tawa gwa/aateemaá gwa/aatá' dír xoorduuwo,

nee tawa xirif dír mukók oo Israeli.»

33Baabuúwós nee aayooro tidá' ta inós i kaahi kari waa/oó/. 34Simeon giri tsuúq, Maria aayír na/aay gari báy, «Ga/aaweegáy, kwí kwa qaás asma awa yaariir niwa huuiya', nee kuqá' niwa sihhiitiya', baraá múk Israeliwo, nee iwa laya tleehhiti ar tar kaangaanuusi, 35asma inslawoó baraá munér múk yaariír iwa geehhoouy. Nee kiíng sleeme gurhaamír tlaaqaam adór tsataay muunaáwók gu slahhaés.»

36Aaruso'orkar ar /ameeni i deer, umuuwós a Anár Fanueli, ar tlahhoó Asheri. Inós a /ameenír aa ló'wa diin. Tana al hoót nee hhawaatuuwós kureeri faanqw alaá duuxoro. 37Daxta inós a kwaalo'ór kureeri mibeeri dakaát nee tsiyáhh. Baraá Doó Munguhe i ququtlaatliindaaká, aqo in sluufmaamís xweera nee tlaatla/aango, iwa gwaawiwiin nee iwa fiririin. 38Inós hamtidár kilae nina ti'ít, i Munguú sluufmís. Kángw na/aay guri ó' dír kudá' sleémeero awa harahhifor'ín ngaa qaasiye' gawaá ba/amár Yerusalemu.

Ki/imá Nasareti

39Tidá' sleémeero baraá hara'ayár Aakoowo taa oó', tlehhmuuwo kawa hhe'eés, tari kií/ Galilaya ay dír gixsar'ín ar Nasareti. 40Nee na/aydá' iri uráy, /uuru gway tleéhh, fuquraango i haats, nee i tsuuqaá Munguú kón.

Yesu iwa baraá Doó Mungú

41Xwayliteérós i Yerusalémú kaakeér umuú kurko qoomár deelór ur ar Pasaákuwo. 42Qoomár Yesu kureeraá mibaá nee tsár ngiwa áy, tari tsa/án Yerusalemu, adoodá' ta /iimamisi. 43Deeloodá' ur iwa waaráhh, qoomár ki/imaine, na/ay'ín Yesu iri alií meét baraá Yerusalemu. Ala xwayliteérós kaangwí gu xu'uká. 44Inooín geera kawa xui inooine ta al dinkwa nee Yesu baraá boo/ayduú aauuseero. Tari kumiít aaiiwo. Looa iwa dát kuri leelehhiít dír mar'eefooine nee dír múk ta xui. 45Kuwa slaslayká, tay kií/ Yerusalemu kuwa leelehhiiti. 46Alaá deelo tame kuri baraá Doó Mungú wa sláy, aa tla/ángw intsaahhatuusér i iwiít, gi iiárií qamín nee gin yaahamiis. 47Mukdá' sleémeero axamiís sagalooarós kari waa/oó/, nee adoodá' axweesani ngira mu/aywatsín. 48Qoomár xwayliteérós nguwa aán, tari waa/oó/, aayo guri beér, «Garmaaeé', mista adoorí láq? Ga/aaweegáy, aníng nee baabuúwoge kuúng una leelehhahhitaán ar gurhaami.»

49Gari báy, «Ahaá, mihar leelehhitá'? Aga xui'ikáhe adór gár án tiwa hariím, an baraá doó Baabuúeé' wa hoót?» 50Ala adoodá' ngaa báy inooín ngaa tsaahhi'iiká.

51Tari al aweér ay Nasareti. Inós iri kumiít xwayliteérós ngiwa iialooeemiisi. Aayírós tí sleémeero gari alhoorén baraá muunaáwose. 52Yesu iri kumiít iwa uraaray, sagalooarós iri doogigiín kuri gurií baá/ nee Mungú nee muko.

Currently Selected:

LUKA 2: IRQW

Highlight

Copy