LUKA Alki/ituú niiná daanduú kitaábuuwihe
Alki/ituú niiná daanduú kitaábuuwihe
Luka a goousmoó kitaábuuwí oo tám oo ya/abtór hho'. Inós a heé gadiyér qwaslaari'iima gaa soomuus. Inós a heé Yahudiroká, sleeme inós Yesu gwaa ariiká ilaawose, ala inós Yesu nguwa haratlintií', kángw daanduú Yesu guna «tsee/aaríngw áy dír mukdá' aáng Yesu ilaaine gwaa ar.» Slám inós nee ya/abusmo Paulo tana algadiyuús deelór hhaawaakahe baraá alki/ituú ya/abtór hhoe (Kol 4:14; 2 Tim 4:11; Filem 1:24):
Baraá Ya/abtór hho' adór Luka ngira gooini kaa geehhooeés adór Mungú muu sleémeero ngur slaá', tam Yesu nguri ya/aáw as muu sleémeero nguwa ba/amisi. Slaqsa'aá taa baraá kitaábuuwií gooín, awa ngi geehhooeemisá' adór Mungú muu sleémeero ngur slaá', a slaqsoó heé Samaria oo hhoó', nee slaqsoó bee/ír aa qwat, nee slaqsoó garmoó aa qwaar. Kitaábuuwí ga kah sleeme adór Yesu ira /aymár áy dír doó heé taa aáhh nee muu sleémeero, doó ohmusmoó koódi, kudá' ta bay Sakayo (19:1-10), nee adór Yesu slafíngw alhhe'eesay wásl ngura al'axweés dír tlakusmoodá' taa alkikií' dinkwa nee inós gawaá Msalaába (23:39-43).
Baraá kitaábuuwihe ka geehhoo' adór hotaá firo tar gár ló'wa slahhaa' dír Yesuwo. Qoomár baatisaro kuwa hhe'eés ina firín (3:21). Dír eeharuuseerós ngira tsawaariiká ina firín (6:12). Dír eeharuuseerós ngira yaahasiiká daanduuwose, axáy inós a heemá, ina firín (9:18). Dír kalaywós ira warqayká, ina firín (9:29). Nee dír slafingós ngura haniisiíká as kuwa kikii'i gawaá Msalaába ina firín. Baraá kitaábuuwihe slaqsa'aá tám awa Yesu aa alki/iít daanduú firooro in slaslaawaán.
Baraá kitábuuwihe sleeme gadiyér Yesu daanduú narkuuteero kaa geehhooeés, ar slaqsaywo: «Ya/abtór hho' ka alki/iit dír narkuuteero (4:18; 7:22), narkuute waawuti'iimár Mungú ga sleér (6:20), narkuute kana dahi'ís baraá muruú /aymár úr (14:13;21), Lasaroduú narkutamo kuna huúw nee malayke ay gawaá doori (16:20,22), nee Yesu eeharuuseerós gana hara'ayín muruuín kudá' i kona' nguwa weerisiya', nee peésaadá' taa sláy kawa tu/i ar narkuute (12:33).
Luka gaa geehhooeés sleeme kángw Yesu iwa waasleé/ baraá slaqwto adór tar gár tlaankuú ya/aamaká, asma Yésuudá' naa waaslee/ fu'unír siyoó taa kikií' gana /aáy. Gari geehhooeés adór waasle/uú Yesu tar oo ló'. Yesu a qeeru kiloseeká, ala ina waasleé/ baraá slaqwto nee qeeruwo. Luka kitaábuú hatlá' sleeme gwaa gooín oo ta bay, «Tlehhma'aá ya/abuuse». Kitaábuudá' muruú aa tleehharuumiit guna alki/iít alaá Yesu iwa waasleé/ nee iri tsa/án gawaá Doori.
Digir wakeetíngw kitaábuuwí:
Axweesanoó geera 1:1-4
Xwaylár Yohanedá' Baatimaamiís, nee ar Yesu, nee na/uumar'ín 1:5—2:52
Gadiyér Yohanedá' Baatimaamiís 3:1-20
Yesu kuwa baatiís nee kuwa iiaraa'ár 3:21—4:13
Yesu gadiyeé ngiwa tleéhh ar geehhooeema baraá Galilayaro 4:14—9:50
Galilayár wa tleemu ay Yerusalemu 9:51—19:27
Gadiyér Yesu aa tleéhh wiíkidár alhhe'eesaywo baraá Yerusalemuro nee inslaawaydae 19:28—23:56
Aako Yesu niwa waasleé/ nee tiwa geehhooeés nee iwa tsa/án gawaá doori 24:1-53.
Currently Selected:
LUKA Alki/ituú niiná daanduú kitaábuuwihe: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.