Psom 104
104
Anou selebre Bondie Kreater
1Ar tou seki mo ete mo dir mersi LESEGNER!
SEGNER mo Bondie tomem pli gran.
To abiye ar mazeste ek laglwar,
2lalimier anvlop twa kouma enn manto.
To finn kree lesiel kouma enn latant zean
3e to finn ranz to lakaz lor losean seles.
To fer bann niaz vinn to kales,
e to vwayaz lor lezel divan.
4Divan delivre to mesaz,
dife ek zekler exekit to lord.
5To finn kree later lor soubasman solid
ki nanye pa pou bouze.
6Lor later to finn met enn tapi dilo
ki mont ziska some montagn.
7Kan to ti reprimann dilo, li ti retir li;
li ti sove ler li ti tann to instriksion kouma loraz.
8Lor vites li mont lor montagn e redesann,
al dan vale, dan landrwa ki to ti fer pou li.
9To ti tras frontier ki li pa ti gagn drwa depase;
sa ti pou anpes li deborde pou kouver later.
10To finn fer lasours koule dan vale;
to finn fer larivier koule ant montagn ek kolinn.
11Koumsa ena ase dilo pou tou zanimo,
bann bourik sovaz ti vinn kalme zot laswaf.
12Akote bor dilo, lor bann pie
bann zwazo fer zot nik e kapav tann zot sante.
13Depi lesiel lapli tonbe, aroz kolinn ek montagn
e later li rasazie ar bienfe to louvraz.
14To fer lerb pouse dan patiraz;
to fer plant pouse pou dimounn servi;
pou li prodir manze pou li viv,
15divin pou fer leker kontan,
delwil zoliv pou so lasante
e dipin pou li gagn lafors.
16Bann pie dan lafore gagn bien dilo,
sirtou bann pie zean ki LESEGNER limem ti plante.
17Laba bann zwazo fer zot nik;
bann sigongn fer zot lakaz lor pie sipre.
18Kabri sovaz gagn lavi lor montagn,
bann liev kasiet parmi bann ros.
19To finn kree lalinn pou nou kapav kont bann mwa;
soley kone ki ler bizin kouse.
20To finn kree lanwit ek lobskirite,
pou ki zanimo kapav lasas dan nwar;
21bann zenn lion kriye for zot lafin
ler zot rod manze ki Bondie finn prepare pou zot.
22Kan soley leve zot retourn
dan zot lakav pou repoze.
23Lerla dimounn al okip zot lokipasion
ziska ki soley kouse.
24SEGNER, to finn fer otan kiksoz extra!
Sak kiksoz finn kree par to sazes.
Later ranpli ar enn trale kreatir ki to finn kree.
25Get lamer laba, li gran, li profon
e li plin ar kreatir,
so gran kouma so piti.
26Lao dilo, bann bato navige,
anba, Leviatan, mons marin ki to finn kree pou zwe ar li.
27Zot tou depann lor twa
pou gagn zot nouritir kan zot bizin.
28To donn zot manze ki nouri zot;
kan to ouver to lame, nouritir-la plin zot vant.
29Kan to vir ledo ar zot, zot gagn per;
kan to koup zot souf, zot mor
e zot retourn dan lapousier kot zot ti sorti.
30Kan to soufle to souf
to kree zot e later gagn nouvo lavi.
31SEGNER, to laglwar li eternel!
SEGNER, trouv to lazwa dan to louvraz.
32Li zet enn regar lor later e later tranble;
li tous montagn e volkan eklate.
33Mo pou sant louanz LESEGNER touletan;
tanki mo ena lavi mo pou sant so grander.
34Mo espere ki mo meditasion fer li plezir,
parski mo dan lazwa akoz li.
35Ki bann ki dan lemal zot disparet depi later;
bann ki nouri pese fini net dan lemond.
Ar tou seki mo ete mo dir mersi LESEGNER!
Alelouya, nou sant louanz LESEGNER!
Currently Selected:
Psom 104: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.