Psom 109
109
Konplint enn dimounn dan traka
Pou sef koral. Enn Psom David.
1Bondie, twa ki mo loue, pa gard silans.
2Move dimounn, ipokrit ek manter,
pe atak mwa ar zot lalang mansonz.
3Zot invant zistwar lor mwa
e fer mwa ditor san okenn rezon.
4Zot akiz mwa malgre mo kontan zot
e mo finn priye pou zot.
5Pou dibien ki mo fer, zot rann mwa par lemal;
pou lamour ki mo done, zot rann mwa laenn.
6Swazir enn akizater kont li,
swazir enn move dimounn pou debout dan so kote drwat.
7Fer ziz-la deklar li koupab lafin so prose;
fer ki mem so lapriyer enn ofans kont Bondie.
8Fer lamor zwenn li vit;
fer enn lot dimounn gagn so travay!
9Fer so fam vinn vev
ek so zanfan orfelin!
10Fer so zanfan vinn mandian e viv dan lari;
ki zot al mandie lwin ar zot lakaz an-rwinn!
11Fer bann kaser sezi so dibien;
fer bann etranze profit so travay!
12Pa les personn montre li zantiyes;
pa les personn okip so zanfan kan li mor!
13Pran lavi tou so desandan!
Koumsa so nom pou disparet pou touletan.
14Rapel LESEGNER pese so bann anset;
zame bliye pese so mama!
15SEGNER, rapel bien tou zot pese
me bliye vit zot lexistans!
16Sa move dimounn-la zame li ti fer dibien pou lezot;
li ti zis konn fer mizer bann pov ek seki pena nanye,
kraz enn malere ziska fini li net.
17Li ti kontan modi lezot.
Aster fer li sarye malediksion.
Zame li ti demann Bondie beni lezot.
Aster les li viv san benediksion!
18Li ti modi lezot koumadir malediksion enn zafer normal;
aster fer so prop malediksion tranp so lapo
e kouma delwil, rant partou ziska so dan so lezo!
19Fer so prop malediksion kouver so lekor kouma linz
e ser so lerin toulezour kouma sang.
20SEGNER, koumsa ki to bizin pini mo lennmi;
koumsa to bizin pini bann ki fer mwa ditor.
21SEGNER, mo Segner,
ed mwa pou loner to nom;
parski to lamour infini telman bon, sov mwa.
22Mo pov; mo enn malere;
mo blese dan profonder mo leker.
23Mo lavi pase, kouma lonbraz letan aswar aprose;
kouma sotrel ki divan siklonn soufle kot li anvi.
24Telman mo pa finn manze, mo zenou pe tranble;
mo finn vinn lapo-lezo.
25Kan dimounn trouv mwa zot sikane;
zot sakouy latet pou montre zot mepriz mwa.
26Ed mwa, SEGNER, mo Bondie!
Parski to lamour li infini, sov mwa!
27Fer mo lennmi kone ki twa ki finn azir
ki twa, SEGNER, to mars ar mwa.
28Mem si bann-la modi mwa, twa to beni mwa.
Fer bann ki martiriz mwa konn defet
e fer mwa, to serviter, gagn enn gran boner.
29Anvlop mo lennmi dan disgras;
fer zot met kostim laont.
30Mo pou dir LESEGNER mersi for-for;
mo pou koz so grander dan lasanble lepep
31parski li defann bann pov
e sov zot kont dominer
ki rod kondann zot amor.
Currently Selected:
Psom 109: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.