Psom 20
20
Segner Bondie, donn nou laviktwar
Pou sef koral. Enn Psom David.
1Mo priye ki LESEGNER reponn ou kan ou dan lapenn!
Ki Bondie, ki nou anset Zakob ti priye, protez ou.
2Mo priye ki li avoy ou so led depi Tanp sakre
e beni ou depi montagn Sion.
3Ki li aksepte tou ou bann ofrand
e ki ou sakrifis fer li plezir.
4Mo priye ki li donn ou seki ou bizin
e ki li fer ou bann plan realize.
5Nou pou kriy nou lazwa pou partaz ou laviktwar,
nou pou loue nou Bondie ar bann banier pou selebre ou triyonf.
Mo priye ki LESEGNER realiz tou ou dezir.
6Mo sir aster ki LESEGNER pou donn laviktwar
so lerwa ki li finn konsakre;
Bondie pou reponn lerwa depi so sanktier dan lesiel
e par so pwisans pou donn li laviktwar.
7Ena ki krwar dan saryo ki servi pou lager;
ena ki krwar dan pwisans so seval,
me nou, nou fer konfians LESEGNER nou Bondie.
8Bann ki krwar dan saryo ek dan seval pou pliye ek pou tonbe
me nou, nou pou leve e nou pou tini dibout.
9SEGNER, donn lerwa laviktwar.
Reponn nou letan nou apel twa!
Currently Selected:
Psom 20: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
