Psom 22
22
Dezespwar ek lespwar
Pou sef koral. Zwe sa lor ler “Serf dan boner gramatin”. Enn Psom David.
1Bondie, mo Bondie, kifer to finn abandonn mwa?
Dan dezespwar mo kriye osekour, me to sekour pa vini.
2Mo Bondie, lizour mo sipliy twa ed mwa, me san repons;
lanwit mo kriye, mo pa gagn okenn repo.
3Pourtan tomem sel Bondie ki Sin;
to lor to tronn, omilie louanz lepep Izrael.
4Nou anset ti met zot konfians total dan twa;
zot ti fer twa konfians e to ti delivre zot.
5Zot ti sipliy twa vinn ed zot, e to ti sov zot;
zot lafwa ti dan twa e zame zot ti regrete.
6Me mwa, pa kapav dir mo enn imin; mo kouma enn lever;
bann dimounn insilte mwa, lepep rezet mwa.
7Tou dimounn mepriz mwa, mok mwa;
zot boufonn mwa, zot fer grimas.
8Zot dir, “Get li! Li fer konfians LESEGNER!
Kifer to Bondie pa vinn delivre twa?
Si li kontan twa kifer li pa vinn ed twa?”
9Pourtan Bondie, twa ki ti ed mwa travers lakousman;
twa ki ti poz mwa an sekirite pre kot leker mo mama.
10Depi mo nesans finn konfie mwa dan to lame;
depi dan vant mo mama tomem mo Bondie.
11Bondie, pa res lwin ar mwa.
Traka ek danze pe koste.
To tousel kapav ed mwa.
12Mo lennmi pe antour mwa kouma toro feros;
kouma toro ki sorti Basann zot pe fons otour mwa.
13Zot mizo ouver kouma lion afame
ki pou desir mwa bout par bout.
14Mo lafors pe ale, pe koule kouma dilo;
tou bann lezo dan mo lekor finn disloke net,
e mo leker kouma lasir,
li pe fonn dan mwa.
15Mo labous sek; mo lalang tas ar mo pale;
mo lagorz amare.
Koumadir to finn larg mwa dan lapousier lamor!
16Bann lisien pe tom lor mwa;
enn group kriminel finn anserkle mwa,
zot pers mo lame mo lipie.
17Mo finn vinn lapo-lezo, tou mo lezo deor;
dimounn fixe zot regar lor mwa;
18mo lennmi pe lager pou gagn mo linz;
zot tir lakourtpay.
19Me twa, SEGNER, pa res lwin ar mwa!
Vini vit, vinn sov mwa, twa mo lafors!
20Anpes lepe mo lennmi pran mo lavi;
sov mwa dan grif bann lisien;
21anpes lion devor mwa;
protez mwa kont korn bann toro sovaz.
To finn reponn mwa!
22Mo pou rakont tou dimounn tou seki to finn fer;
dan nou lasanble mo pou sant to louanz.
23Zot tou ki respekte ek ador LESEGNER, donn li laglwar!
Zot tou desandan Zakob, donn li tou loner!
Zot tou pep Izrael, ador li avek reverans!
24Li pa abandonn ni mepriz bann malere;
zame li pa bliye zot douler.
Li pa detourn so regar,
li touletan reponn lapel dimounn pov ki dimann led.
25Tomem lasours mo louanz dan gran lasanble bann fidel;
mo pou akonplir mo promes devan tou bann ki ador twa.
26Pou ena boukou manze pou bann pov;
bann ki pe rod LESEGNER pou loue li.
Ki LESEGNER donn zot tou boner ek prosperite pou touletan.
27Ziska finfon later, zot tou pou rapel
e zot tou pou retourn ver LESEGNER.
Bann fami diferan tribi ek nasion
pou prostern devan li ek ador li.
28Limem SEGNER lerwa
ki diriz liniver.
29Tou bann ki ris pou fer fet e pou ador Lesegner;
seki pe desann dan lapousier lamor,
seki pa kapav gard lavi,
pou bes latet divan so grander.
30Zenerasion fitir pou servi li;
enn zenerasion pou rakont enn lot grander nou Segner.
31Zanfan ki pa finn ankor ne enn zour pou tann dir,
“Lesegner ti defann e protez so pep.”
Currently Selected:
Psom 22: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
