Psom 27
27
Lesegner limem mo Sover
Enn Psom David.
1LESEGNER, limem mo lalimier;
limem mo sover.
Mo pena pou per personn.
LESEGNER protez mwa kont tou danze;
mo pena pou tranble devan personn.
2Kan move dimounn atak mwa pou fer mwa ditor,
mo bann adverser e bann lennmi
zot ki kogne; zot ki tonbe.
3Mem kan enn larme antour mwa
mo leker pa per nanye;
mem si lager deklare kont mwa
mo lafwa res ferm.
4Mo finn dimann LESEGNER enn sel zafer;
zis enn zafer, pa plis:
permet mwa viv dan lakaz LESEGNER pou touzour;
permet mwa get avek admirasion magnifisans LESEGNER;
e dimann li gid mwa.
5Kan letan dir vini
li pou gard mwa an sekirite dan so Tanp;
li pou kasiet mwa anba so latant;
li pou plas mwa an sekirite dan enn landrwa bien ot.
6Lerla mo pou gagn laviktwar lor mo lennmi;
dan lazwa san limit mo pou ofer sakrifis dan so Tanp
e mo pou sant louanz e zwe lamizik pou LESEGNER.
7Ekout mwa SEGNER, letan mo apel twa;
ena pitie pou mwa, reponn mwa.
8Mo leker dir, “Tourn twa ver LESEGNER!”
Ver tomem ki mo tourne pou adore, SEGNER.
9Pa tourn to ledo ar mwa!
Pa abandonn to serviter fidel avek koler;
to finn touletan soutenir mwa;
pa rezet mwa, pa abandonn mwa,
Bondie mo Sover.
10Mama papa kapav abandonn zanfan
me LESEGNER li pou touletan akeyir mwa, so zanfan.
11Montre mwa SEGNER, seki bizin fer;
ed mwa pran bon sime ki pena obstak,
parski mo ena boukou lennmi.
12Pa larg mwa dan grif mo lennmi
ki servi mansonz bann fos temwin
pou menas mwa avek violans.
13Mwa mo sir mo pou trouv bonte LESEGNER
isi dan sa lavi la.
14Fer konfians LESEGNER.
Gard lafwa, pa perdi kouraz.
Atann LESEGNER ar konfians.
Currently Selected:
Psom 27: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
