Psom 50
50
Lapriyer onet ek sinser
1LESEGNER, Bondie Toupwisan,
ouver so labous pou koze;
Li koz ar lemond antie,
depi soley leve ziska soley kouse.
2Bondie briye depi Sion,
so gran lavil parfe ki bengn dan bote.
3Nou Bondie pe vini, pa krwar so demars trankil!
Divan li enn gran laflam ki devor tou;
otour li enn siklonn violan pe balie tou.
4Li ordonn later ek lesiel vinn dibout temwin
pou get kouma li ziz so pep.
5Li dir, “Rasanble mo pep fidel;
rasanble bann ki finn fer enn lalians ar mwa
atraver ofrand ek sakrifis.”
6Liniver pe proklame ki Bondie
Li bon ek zis
e limem pli gran ziz.
7“Mo pep, ouver zorey parski
Mo ena zafer inportan pou dir zot;
Mo pou denons Izrael!
Mwa ki Bondie, zot Bondie,
8Mo pa pe kritik zot akoz zot sakrifis
oubien akoz zot ofrand ki devan mwa toulezour.
9Pa krwar mo bizin gro-gro toro
ouswa bouk bien-bien gra.
10Pa bliye ki tou zanimo
dan karo, dan patiraz ouswa dan lafore
zot tou pou mwa;
11zanimo dan lezer kouma lor later
zot tou pou mwa.
12Ler mo fin mo pa bizin zot manze.
Tou seki ena dan lemond zot pou mwa!
13Zot krwar mwa mo bizin laviann toro
ouswa disan kabri?
14Ofer Bondie enn sakrifis aksiondegras.
Onor zot promes ki zot finn fer ar Bondie Toupwisan.
15Kan zot dan dife, apel mwa
e mo pou vinn sov zot. Lerla zot sant mo louanz.”
16Lerla Bondie koz ar bann move dimounn,
“Ki serti zot resit mo instriksion?
Ki serti zot koz lor mo lalians?
17Kan zot refiz mo konsey;
e zot rezet mo parol.
18Kan zot zwenn voler, zot fer kamarad ar li;
zot frekant dimounn ki komet adilter.
19Zot parol pese koule fasilman;
zot koz boukou manti.
20Zot dir foste lor zot prop frer;
zot trenn garson zot mama dan labou.
21Ler zot ti fer tousala
mo pa ti dir nanye.
Akoz sa zot ti krwar mo parey kouma zot.
Aster mo pou akiz zot,
e zot pou konn laverite.
22Ekout mwa bien, bann ki bliye Bondie,
sinon mo desir zot an morso.
Pa krwar ki pou ena kikenn pou tir zot dan dife!
23Mo bizin zis zot rekonesans.
Sel sakrifis ki ena valer pou mwa.
Obeir mwa e mo pou sov zot.”
Currently Selected:
Psom 50: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
