Psom 74
74
Segner Bondie sov nou pei
Instriksion Asaf.
1Ayo Bondie, kifer to abandonn nou pou touletan?
Kifer to ankoler kont nou, troupo dan to patiraz?
2Rapel to pep ki tomem to ti swazir lontan, bien lontan.
To ti kas zot lasenn lesklavaz pou fer zot vinn to prop posesion.
Rapel Montagn Sion kot lontan to ti viv.
3Vinn get demolision partou;
nou lennmi finn kraz tou dan to Tanp.
4Andan to Tanp to lennmi finn kriye laviktwar;
zot finn met zot pavion pou fer twa vwar.
5Zot finn netway partou
koumadir bisron pe koup pie dan lafore.
6Zot finn defons travay artistik dan pano dibwa
ar lars ek teti;
7zot finn kraz tou dan Tanp
e zot finn alim dife.
Zot finn profann landrwa sakre
kot nou priye twa.
8Zot ti anvi fini nou net;
zot ti bril tou bann landrwa lapriyer dan nou pei,
landrwa sakre kot ti zwenn ar Bondie.
9Bann sinbol sakre finn elimine;
inn nepli ena okenn profet.
Personn pa kone komie letan sa pou dire.
10Pandan komie letan ankor nou bann lennmi
pou boufonn twa, nou Bondie?
To pou les zot insilte twa eternelman?
11Kifer to pa oule ed nou?
Kifer to gard to lebra krwaze?
12Me depi koumansman letan
se twa Bondie ki finn nou Lerwa,
e ki finn touletan sov nou dan detres.
13Ar to lafors sirnatirel
To ti separ lamer pou fer sime;
To ti kraz latet bann mons losean;
14To ti eklat latet Leviatan, mons malefik,
e donn zanimo dezer manz so lekor.
15To ti fer dilo sourse e koule dan larivier;
To ti fer bann flev profon vinn sek enn kou.
16To ti kree lizour ek lanwit;
To ti plas soley ek lalinn dan zot plas;
17To ti desinn frontier later;
To ti fer lete ek liver.
18Me pa bliye, SEGNER, ki to lennmi pe boufonn twa;
pa bliye zot pena lafwa e ki zot mepriz to nom.
19Pa abandonn to kolonb dan grif bann zanimo sovaz,
sirtou pa zame bliye to pep ki pe soufer.
20Pa bliye to lalians ki to ti fer ar nou!
Violans ranpli dan tou kwin ek rekwin nwar.
21Pa les bann oprime soufer imiliasion;
permet bann dimounn pov e bann ki bizin led loue twa.
22Bondie, lev twa! Defann to lintere!
Pa bliye! Bann ki pena lafwa
kritike e boufonn twa gramatin-tanto.
23Pa bliye e rapel bien!
To lennmi fer enn ta tapaz,
to adverser pe touzour kriye mem.
Currently Selected:
Psom 74: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.