Psom 86
86
Segner Bondie, sov mwa!
Lapriyer David.
1SEGNER, ekout mwa e exos mo lapriyer.
Mo pov, mo feb e mo san resours.
2Prezerv mo lavi parski mo to serviter lwayal.
Protez ek sov to serviter ki finn met so konfians dan twa.
3Tomem mo Bondie! Pitie mwa, Segner.
Mo priye twa lanwit-lizour.
4Donn to serviter lazwa, Segner,
parski mo tourn ver twa dan mo lapriyer.
5Segner, to ranpli ar bonte ek pardon;
to lamour infini pena born pou dimounn ki kriye twa.
6Ekout mo lapriyer, SEGNER;
ekout mwa ki pe sipliye twa.
7Kan maler tom lor mwa, mo kriye twa
parski mo kone to reponn mwa.
8Pena lot bondie ki twa, Segner;
pena lot ki kapav fer seki to finn fer.
9Tou bann nasion ki to finn kree
pou vinn ver twa pou prezant zot respe;
zot pou glorifie to nom.
10Tomem pli gran e to finn fer bann mervey;
Pena lot bondie ki twa, to tousel Bondie.
11SEGNER, aprann mwa ki bizin fer
e mo pou swiv to laverite,
montre mwa kouma servi twa ar devouman
e mo pou ena gran respe pou to nom.
12Mo pou sant to grander ar sinserite,
O Segner mo Bondie;
mo pou glorifie to nom pou touzour.
13To lamour infini pou mwa li depas tou!
To finn tir mwa dan trou lamor.
14O Bondie, enn larme vantar pe fons lor mwa;
enn bann vwayou pe rod mwa pou touye.
Sa bann-la pa pran Bondie kont.
15Me twa, Segner, to enn Bondie konpatisan e bienveyan,
To ena gran pasians, to ranpli ar lamour infini ek fidelite.
16Tourn ver mwa. Ena pitie pou mwa.
Donn to serviter to lafors;
sov mwa, zanfan to servant.
17Montre enn sign ki to kontan mwa;
koumsa mo lennmi pou gagn laont ler zot trouv sa,
parski twa, SEGNER, to finn sekour mwa, to finn konsol mwa.
Currently Selected:
Psom 86: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.