Zenez 25
25
Lezot desandan Abraam
1Abraam pran enn lot fam ki apel Ketoura. 2Li donn li sis zanfan: Zimrann, Yoksann, Medann, Madian, Isbak ek Soua. 3Yoksann papa Seba ek Dedann. Plitar, Dedann vinn anset bann Asourit, bann Letousit ek bann Leoumit. 4Bann zanfan Madian apel Efa, Efer, Anok, Abida ek Elda. Tousala bann desandan Ketoura.
5Abraam fer Izaak vinn so eritie. 6Li donn bann zanfan Agar ek Ketoura bann kado. Apre sa, li fer zot al res dan bann pei les, lwin ek so garson Izaak.
Lamor Abraam
7Abraam viv ziska laz 175 an. 8Li rann so dernie soupir e li mor apre enn vieyes ere. 9So bann garson, Izaak ek Ismael, anter li dan kavern Makpela. Sa kavern la trouv dan les Mamre. Li lor terin Efron, garson Soar, enn Itit. 10Abraam ti aste sa terin la avek bann Itit kan li ti ankor vivan. Bannla anter Abraam akote so fam Sara. 11Bondie beni Izaak apre lamor so papa Abraam. Izaak al res pre kot pwi Lahai-Roi.
Bann desandan Ismael
12Ala lalis bann desandan Ismael, garson Abraam. So mama apel Agar, enn Ezipsienn, servant Sara. 13Ala nom bann garson Ismael depi pli gran ziska pli tipti: Nebayot, Kedar, Adbeel, Mibsam, 14Misma, Douma, Masa, 15Hadad, Tema, Yetour, Nafis, ek Kedma. 16Sa douz lamem bann garson Ismael. Zot vinn bann sef dan zot tribi. Zot donn zot vilaz zot prop nom. 17Ismael ena 137 an kan li rann so dernie soupir e li mor. 18So bann zanfan res dan bann rezion ant Avila ek Sour. Sa bann rezion la pre ar Lezip, dan direksion Asiri. Zot res lwin ar bann lezot desandan Abraam.
Zakob 25 - 36
Nesans Ezai ek Zakob
19Ala zistwar Izaak, garson Abraam. 20Izaak ena 40 an kan li marye avek Rebeka. Papa Rebeka apel Betouel, enn abitan Padann-Aram. Frer Rebeka apel Laban. Betouel ek so garson Laban enn bann Arameen. 21Rebeka pa kapav gagn zanfan. Alor, Izaak priye LESEGNER pou li. LESEGNER ekzos so lapriyer, e Rebeka tom ansint. 22Bann zanfan Rebeka lager dan so vant. Sa fer Rebeka dekouraze, e li dir: “Si sa pou koumsa, kifer mo ti bizin tom ansint?” Lerla li al priye LESEGNER pou li gagn enn repons.
23LESEGNER reponn li:
“Ena de nasion dan to vant,
To pou donn nesans de pep diferan.
Enn ladan pou pli for.
Seki pli gran pou servi seki pli zenn.”
24Kan ler arive pou Rebeka akouse, li gagn zimo. 25Premie tibaba la rouz e so lekor kouver ar pwal. Alor zot apel li Ezai#25:25 Dan langaz Ebre, Ezai vedir “kouver ar pwal”.. 26Letan so frer ne, so lame pe trap talon Ezai. Alor zot apel li Zakob. Izaak ena 60 an kan zot ne.
27De garson la grandi. Ezai vinn enn gran saser. Li pas so letan dan bwa. Zakob enn zom trankil. Li prefer res dan latant. 28Izaak ena enn preferans pou Ezai. Li kontan manz zanimo ki Ezai lasas. Me Rebeka prefer Zakob.
Ezai vann so drwa premie garson
29Enn zour, Zakob pe kwi enn bon lasoup. Anmemtan, Ezai sorti lasas e li bien fatige. 30Li dir Zakob: “Les mo manz inpe to lasoup rouz. Mo pe gagn extra fin.” Ala ki manier Ezai gagn nom Edom, setadir rouz.
31Zakob dir li: “Vann to drwa premie garson avek mwa avan.” 32Ezai reponn: “Mo pre pou mordefin. Ki mo pou fer ek mo drwa premie garson?” 33Zakob dir li: “Fer enn serman avan.” Alor, Ezai fer serman e li donn Zakob so drwa premie garson. 34Lerla, Zakob donn Ezai dipin ek lasoup lanti. Ezai manze-bwar, apre li ale. Li pa kas latet ek so drwa premie garson.
Currently Selected:
Zenez 25: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
