Génesis 14
14
Abram sobrinon Lotta librasqanmanta
1Chay tiempokunapin guerra karan. Primer kaq grupopin kay *reykuna karanku: Sinar llaqtapi Amrafel sutiyoq rey, Elasar llaqtapi Arioc sutiyoq rey. Elam llaqtapi Quedorlaomer sutiyoq rey hinallataq Goim llaqtapipas Tidal sutiyoq rey. 2Chay tawa reykunan ishkay kaq grupopi kaq reykunawan guerrapi peleaq riranku. Chaymi primer kaq grupowan guerrapi peleanankupaq juntanakuranku. Kay ishkay kaq grupopi reykunan karanku: Sodoma llaqtapi Beraq sutiyoq rey, Gomorra llaqtapi Birsaq sutiyoq rey, Adma llaqtapi Sinab sutiyoq rey, Zeboim llaqtapi Semeber sutiyoq rey hinallataq Bela llaqtamanta reypas. Chay Bela llaqtapa huknin sutinmi karan Zoar. 3Kay ishkay kaq grupopi kay pishqantin reykunan primer kaq grupopi reykunawan peleanankupaq Sidim nisqa sutiyoq pampapi huñunakuranku. Chay Sidim pampaqa karan Kachiyoq Lamar Qochapa kasqan lugarpin. 4Chay ishkay kaq grupopi kaq reykunan, chunka ishkayniyoq wataña Quedorlaomer sutiyoq reyta serviranku. Ichaqa chunka kinsayoq kaq watapitaqmi chay Quedorlaomer reypa contranpi sayariranku. 5Chunka tawayoq kaq watapitaqmi Quedorlaomer reyqa paywan kaq reykunapiwan ima hamuranku peleaq. Hinaspan guerrapi peleaspa venceranku kay runakunata: Refain sutiyoq runakunata Astarot Carnaim lugarpi, Zuzita sutiyoq runakunata Ham lugarpi, Emita sutiyoq runakunata Save Quiriataim lugarpi, 6hinallataq Horeo sutiyoq runakunatapas Seir sutiyoq orqokunapi. Hinaspan qatikacharanku Parán sutiyoq pampakama. Chay Parán pampaqa karan ch'inñeq lugarpa ladonpin. 7Chay peleasqanmanta kutimuspanmi Quedorlaomer sutiyoq reyqa, paywan kushka kaq reykunapiwan chayamuranku En-mispat sutiyoq lugarkama. Chay lugartaqa reqsillarankutaqmi Cades sutiwanpas. Hinaspan Amalecita sutiyoq runakunapa llaqtankutapas thuñichiranku. Saynallataqmi Amorreo sutiyoq runakunapa tiyasqanku Hazezon-Tamar sutiyoq llaqtatapas thuñichillarankutaq.
8Hinaqtinmi ishkay kaq grupopi pishqantin reykunaqa lloqsimuranku, guerrapi peleanankupaq. Chay reykunan karanku kay sutiyoq llaqtakunamanta: Sodoma llaqtamanta, Gomorra llaqtamanta, Adma llaqtamanta, Zeboim llaqtamanta hinallataq Bela llaqtamantawan ima. Chay Bela llaqtapa huknin sutinmi karan Zoar. Hinaspan pelearanku Sidim sutiyoq pampapi. 9Chay ishkay kaq grupopi kaq reykunaqa pelearanku primer kaq grupopi kaq reykunawanmi. Primer kaq grupopi kaq reykunan kaykuna karanku: Elam llaqtapi Quedorlaomer sutiyoq rey, Goin llaqtapi Tidal sutiyoq rey, Sinar llaqtapi Amrafel sutiyoq rey hinallataq Elasar llaqtapi Arioc sutiyoq rey ima. 10Sidim pampapiqa ashkan t'oqokuna breawan hunt'asqa karan. Hinaqtinmi Sodoma llaqtapa reyninqa, Gomorra llaqtapa reyninpiwan ima, llapallan soldadokunantin ayqekushaspanku, wakinqa chay brea t'oqokunaman urmayuranku. Ichaqa wakin reykunañataqmi soldadonkunantin ishkapakuranku orqokunaman.
11Hinaqtinmi chay guerrapi peleaspa venceq reykunaqa, Sodoma llaqtamanta hinallataq Gomorra llaqtamantawan ima, tukuy ima mikhunakunata hinallataq tukuy valorniyoq kaqkunatawan aparikuspanku ripuranku. 12Saynallataqmi Abrampa sobrinon Lottapas, Sodoma llaqtapi tiyasqanrayku hap'ispa, presota aparitakamuranku tukuy kaqninkunatawan ima. 13Ichaqa huk ishkapakamuq runan, Abrampa kasqanman hamuspan, willaran tukuy ima pasasqanmanta. Abramqa tiyaran encinar sutiyoq sach'apa ladonpin, Mamre sutiyoq runapa tiyasqan lugarpi. Chay Mamre runaqa Amorreo llaqtayoqmi karan. Hinaspapas chay Mamre runapa wawqenkunaqa kaykunan karanku: Escol sutiyoq runa hinallataq Aner sutiyoq runa ima. Paykunan Abramwan juntakuranku, huk runa hinalla peleanankupaq.
14Abramqa sobrinon Lot preso kasqanta yacharuspanmi, 318 runakunata huñuran guerrapi peleanankupaq. Chay runakunaqa Abrampa wasinpi naceq sirviente runakunan karanku. Hinaspapas paykunaqa allin entrenasqa runakunan karanku. Chay runakunan Abramwan kushka chay primer kaq grupopi kaq reykunapa qepanta riranku asta Dan llaqtakama. 15Hinaspan Abramqa chay runankunapiwan ima, sorpresalla tuta haykuspa, chay tawa reykunata ganaranku. Chaymi chay tawantin reykuna ayqekuqtinku, asta Damasco llaqtapa wichayninpi Hoba sutiyoq lugarkama qatiranku. 16Chaymi Abramqa runankunapiwan ima, chay tawantin reykunapa tukuy ima apasqanku cosaskunata qechumuspan kutichimuranku. Saynallataqmi sobrinon Lottapas kaqninkunantinta rescatamullarankutaq. Hinaspapas rescatamullarankutaqmi ashka warmikunatapas hinallataq ashka qarikunatapas.
Abramta Melquisedec bendecisqanmanta
17Abramqa chay *rey Quedorlaomerta hinallataq chay reywan kushka kaq reykunatawan guerrapi ganaruspanmi, kutinpusharan. Hinaqtinmi Sodoma llaqtamanta reyqa chashkiq taripamuran Save sutiyoq pampa urayman. Chay Save pampa uraypa huknin sutinqa karan Reypa Pampanwan sutichasqan. 18Salem llaqtamanta rey Melquisedecpas Abrammanmi apamuran t'antata vinotawan. Payqa karan Hatu-hatun Atiyniyoq Diosta serviq *sacerdoten. 19Hinaspan Abramta bendeciran khaynata:
—Hatu-hatun Atiyniyoq Diosyá anchata bendecisunki.
Paymi hanaq pachata kay pachatawan unancharan.
20Hatu-hatun Atiyniyoq Diosyá ancha alabasqa kachun.
Paymi enemigoykikunata makiykiman entregasuranki, nispa.
Hinaqtinmi Abramqa sacerdote Melquisedecman diezmota qoran guerrapi peleaspa tukuy ima qechumusqanmanta. 21Sodoma llaqtamanta reytaqmi Abramta khaynata niran:
—Chay enemigo runakunapa apasqan runakunata qoway. Hinaspa qantaq hap'ikapuy chay cosaskuna qechumusqaykita, nispa.
22Abramtaqmi ichaqa Sodoma llaqtamanta reyta contestaran khaynata:
—Noqaqa juramentotan ruwarani cielotapas kay pachatapas unanchaq Hatu-hatun Atiyniyoq Diosman, 23mana ni imaykitapas chashkikunaypaq, ni huk q'aytutapas nitaq usut'aykipa watuntapas, saynapi ama ni hayk'aqpas khaynata rimanaykipaq: “Noqan Abramtaqa qapaq runaman tukuchirani”, nispa. 24Chayraykun noqaqa mana ni imatapas noqapaqqa munanichu. Aswanqa noqawan hamuq runakunallan noqawanqa ripunqa; hinaspapas paykunapa mikhuna mikhusqallankun huk pagoy hinaqa kanqa. Ichaqa noqawan hamuq Aner, Escol hinallataq Mamre runakunaqa, tupaqninkutayá chashkikapuchunku, nispa.
Currently Selected:
Génesis 14: QEAÑT
Highlight
Share
Copy
Want to have your highlights saved across all your devices? Sign up or sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional
