Génesis 23
23
Sara wañukapusqanmanta
1Saraqa 127 watankaman kawsaran. 2Hinaspan Saraqa Canaán allpapi Quiriat-arba nisqa sutiyoq lugarpi wañukapuran. Hinaqtinmi Abrahamqa Saramanta llakikuspa waqaran. Chay lugartaqa reqsillarankutaqmi Hebrón nisqa sutiwan. 3Chaymantan Abrahamqa wañuq Sarapa ladonmanta sayarispa, Het sutiyoq runapa wawankunata khaynata niran:
4—Noqaqa qankuna ukhupiqa karu llaqtayoq hinallataq forastero runan kani. Huk pedazo allpatayá vendeykuwaychis, chay allpapi wañukuq warmiyta p'amparunaypaq, nispa.
5Hinaqtinmi Het sutiyoq runapa miraynin runakunaqa khaynata niranku:
6—Wiraqocha, uyariwayku, qanqa ancha importante runan kanki noqayku ukhupiqa, Diospa akllasqan runa kasqaykirayku. Wañuq warmiykitaqa allinnin kaq alma p'ampanayku sepulturapiyá p'ampamuy. Manan ni mayqenniykupas wañuq warmiykita chay sepulturapi p'ampamunaykitaqa hark'akuykumanchu, nispa.
7Hinaqtinmi Abrahamqa sayarispa Het sutiyoq runapa miraynin runakunaman respetowan k'umuykuran. 8Hinaspan paykunata khaynata niran:
—Wañuq warmiyta p'ampamunaypaq acuerdopi kashankichis chayqa, noqapa partiymantayá Zohar sutiyoq runapa wawan Efronta ruegapuwaychis. 9Saynapi chakranpa patanpi kaq qaqa sikipi Macpela sutiyoq mach'ayta vendewachun. Noqaqa allin preciotan pagapusaq. Saynapin qankunapa llaqtaykichis ukhupi chay rantisqay sepulturaqa noqapaña kanqa, nispa.
10Chaypin Hetpa mirayninmanta chay Efrón runaqa kasharan, heteo runamasinkunapiwan kushka. Hinaspan chay heteo runakunapa ñawpaqninpi hinallataq llaqtapa punkunta haykuq runakunapa uyarinanpaq ima, Abrahamqa khaynata niran:
11—Señorlláy, uyariykuway; manan noqaqa vendeykimanchu. Aswanmi noqaqa llapallan kaypi kaq testigokunapa ñawpaqninpi regalasqayki chay chakrata mach'aynintinta, chaypi warmiykita p'ampamunaykipaq, nispa.
12Hinaqtinmi Abrahamqa heteo runakunapa ñawpaqninpi kaqmanta k'umuykuran. 13Hinaspan llapallan runakunapa ñawpaqninpi Efrón sutiyoq runata khaynata niran:
—Ama hina kaychu uyariykuway. Chay allpamantaqa allin preciotan noqaqa pagapusqayki. Chashkiykuway qolqeta, chay lugarpi wañukuq warmiyta p'ampamunaypaq, nispa.
14Efronñataqmi Abrahamta contestaran khaynata:
15—Señorlláy, uyariway. Chay allpaqa valen 400 qolqepa chaninmi. Ichaqa chay qolqeqa qanpaqpas hinallataq noqapaqpas manan ashka qolqechu. Saynaqa piensasqaykiman hinayá ruway; hinaspa wañukuq warmiykita chaypi p'ampamuy, nispa.
16Hinaqtinmi Abrahamqa Efrón sutiyoq runapa precio churasqanwan acuerdopi kaspa tawa pachak (400) ancha valorniyoq qolqeta pagapuran. Hinaspan Abrahamqa chay allpata rantispa heteo sutiyoq runakunapa ñawpaqninpi pagapuran, imaynan negociante runakunapas ruwanku saynata. 17Chaymi Efrón sutiyoq runapa allpanqa Abrahampaña karan, mach'aynintin hinallataq chay allpapi wiñaq sach'akunantin ima. Chay allpaqa karan Macpela lugarpin, Mamre sutiyoq runapa tiyasqan lugarpa chimpanpi. 18Saynapin Abrahamqa chay allpa rantikusqanpa dueñonña karan. Hinaspapas chay allpa rantikusqanmantaqa llapallan heteo runakuna hinallataq chay llaqtapa punkunta haykuq runakuna iman testigo karanku.
19Chaymantan Abrahamqa allpa rantikusqan mach'aypi warmin Sarata p'ampamuran. Chay rantikusqan allpaqa Macpela lugarpin karan, Mamre sutiyoq runapa tiyasqan lugarpa chimpanpi. Hinaspapas chay lugartaqa reqsillankutaqmi Hebrón sutiwan. Chay Hebrón lugarqa Canaán nacionpin kashan. 20Saynapin heteo runakunamanta rantisqan allpaqa hinallataq chay qaqa sikipi kaq mach'aypas, Abrahampaña karan, Abrahampa familiankuna chaypi p'ampasqa kanankupaq.
Currently Selected:
Génesis 23: QEAÑT
Highlight
Share
Copy
Want to have your highlights saved across all your devices? Sign up or sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional
