Nya ǹ dín 18
18
Korɛnti a Lawa a sɔmɔ minin giala kɔ
1Bɛ kio, Pooli soo Atɛni á woo Korɛnti kiwi. 2Á kaa Zuifu goon lɛ walan, a tɔ n Akilaasi, Pɔn gána min ni. A na á bɔ Italii gána-n sisia, á daa kun ka a lɔ Prisili ni. Sonbore, kii gole gole Klodo na á goã á pɛ, mà Zuifun tumaa soo ǹ nə n bɔ Rɔmu kiwi. Pooli woo bɛa giĩ kɛ lɛ laanka a lɔ li. 3Pooli laanka Akilaasi bɛ́ ǹ nə́ goã dí tɔrɔ goon nyɛɛ, mɔnaa kion zɛnaa ǹ dí ke, á woo giã ǹ li, á dí nya kunun ǹ ni. 4*Susu ǹ pii tumaa li, á goã boo diɛ lɛsɔkɔn kion, á n giɛ li mà Zuifun laanka Grɛkin nə golee Yezu li.
5Silaasi laanka Timote bɛ́ ǹ nə́ bɔ Masedoanɛ gána nɛ ǹ nə́ daa, Pooli boo la á n din kɔ Lawa a boo lɛ a pɛ ganaa taãn-taãnɛ. A n pii Zuifun lɛn manɛ, mà Lawa pɛ mà á re Nyin-sili mɛn diɛ, mà Yezu ni. 6Zuifun lɛn bɛ́ n piɛ̃, ǹ nə́ sɔ koe, Pooli nə́ n gɔn pii á bɔ ǹ sii ni. Á pɛ ǹ nɛ: «A n kuĩ ka dinin mìi ni, màn kɔ́n ba boe masɛ li doo wa. Sisia kəni, masɛ n die n yɔrɔ diɛ tɔrɔ kɔsɔn la.»
7Pooli lɛsɔkɔn kion lɛ toa walan, á woo giĩ kɔ́n a piɛ, a tɔ n Titusu Zustusu, Lawa gugurukɔle ne, a kion nə kunu lɛsɔkɔn kion lɛ ganaa. 8Ǹ bɛ́ ǹ nə́ n too kɔ Pooli lon, Kripuusu mɛn bɛ́ lɛsɔkɔn kion lɛ a goledɛnaa lɛa, bɛ laanka a kion minin tumaa golee Dɛnaa li. Korɛnti kiwi min gigiã dɔ Lawa-nyankɔlen baa, ǹ nə́ lɛ kɔ ǹ nə́ *batɛmu si.
9Tèlò kɔ́n nɛ Lawa sii nyaa Pooli ni, á pɛ nɛ: «N baran nyɛ́ɛ baa wa, maa a boo lɛ pɛ n wo-n nyɛɛnɛ, n baran n lɛ tã wa. 10Masɛ Lawa tá kunun n ni taãn-taãnɛ, min kɔ́n ba re boe la a n kũ a fuu nyaa nɛ wa, a giala, kiwi kɛ lɛ nɛ, min gigiã tan, ǹ nə́ die masɛ wɔn biɛ.» 11Pooli lɛ̀ goon ka talɛɛ zɛnaa kiwi lɛ nɛ, a n minin darɛɛ Lawa a boo ganaa.
Kiri mɛn nə n wɔ Pooli ganaa kii Galiɔn yɔrɔ-a
12Galiɔn bɛ́ Grɛki gána mìi la ǹ mɛn waáraa, Zuifun nə́ kaa kun ǹ nə́ yoo Pooli gialaa. Ǹ nə́ kũ ǹ nə́ woo ne kiri wɔ ǹ bǎã nɛ. 13Ǹ nə́ pɛ: «Wɔsɛn landa siin bɛ́ ǹ ba lɛ koe Lawa guguru kɔ ǹ gɔn mɛn-a wa, kɛa giĩ kɛ n giɛ li á minin diɛ bɛ ganaa.»
14Pooli mà a n die n lɛ buĩ á boo diɛ, yǎa Galiɔn pɛ Zuifun lɛn manɛ: «Bɛ̀ basaã gole hinlaa sii kɔkɔrɔ kɔ́n sii ni bɛ̀ ma á lɛ koe kaa da kànaa lɛ ganaa. 15Sɛnɛ, kaa zia lɛ bɛ́ daraa laanka tɔn wɔ lɛa, ka ka dinin landa siin ni, a tá ka gɔn. Masɛ a bɛ miã sii kɛ a kiri-wɔle biɛ wa.»
16Galiɔn nə́ ǹ loo á ǹ bɔ a yɔrɔ-a. 17Ǹ tumaa yoo ǹ nə́ kaa lɛsɔkɔn kion goledɛnaa Sɔstɛnɛ la, ǹ nə́ dɛdɛ kiri-wɔlen lɛn yɔrɔ-a. Sɛnɛ, Galiɔn din baa sii lɛa wa.
Pooli a wusoo a wo Antiɔsi boo
18 #
MNS 6.18. Pooli giã Korɛnti á biikoo gigiã zɛnaa. Bɛ kio, á dɔɔ̃n Lawa-nyankɔlen lɛn toa walan, á wɔ tà kuru ǹ goo ne, á woo Siirii gána-n kun ka Prisili laanka Akilaasi ni. A bɛ́ á dɔ Sankree kiwi, á n mìi kɔɔ̃ kəni, a giala, a na á goã á n lɛ kɔ Lawa la. 19Ǹ bɛ́ ǹ nə́ dɔ Efɛɛzi kiwi, Pooli nə́ n na á n bɔ Prisili laanka Akilaasi ganaa. Asɛ woo lɛsɔkɔn kion, á boo da Zuifun manɛ. 20Bɛn bɛ́ ǹ nə́ pɛ nɛ mà a giã a belebɔ kunun ǹsɛn nɛ, á n piã. 21Sɛnɛ, a bɛ́ re woe á pɛ ǹ nɛ: «Bɛ̀ Lawa ná a lɛ kɔ, ma á re wusii ma da ka li biikoo kɔsɔ li.»
Á wɔ tà kuru ǹ goo ne Efɛɛzi, 22á woo gisĩ Sezaaree kiwi, á tɔ́n tɔ wɔ, á woo fòo da Lawa a sɔmɔ minin manɛ Zeruzalɛmu. Bɛ kio, á woo Antiɔsi kiwi. 23Á biikoo kɔ́n zɛnaa walan, bɛ kio, á wusoo á zii kũ doo, á woo Galaasi gána nɛ ka Frizii gána nɛ, bɛ̀ a ǹ Lawa-nyankɔlen foo taã.
Apolɔɔsi a wo Efɛɛzi laanka Korɛnti boo
24Bɛa biikoo kɛ li Zuifu goon ne, a tɔ n Apolɔɔsi, a n boe Alɛksandrii kiwi, á daa á dɔ Efɛɛzi kiwi. A na á goã boo-doɛ̃ wole gole lɛa, á n daraa Lawa a boo lɛ ganaa taãn-taãnɛ. 25Á Dɛnaa a zii lɛ dɔ̃, a yiri dɔ bɛ́ kɔɔ̃nɛ, màn mɛn tumaa bɛ́ Yezu wɔ gɔn la, a na á goã bɛ yii pii, á n minin darɛɛ a ganaa pere-pere-pere, a da yaa, a na á goã ZAÃ a batɛmu diɛ kɛ dinsɔɔ̃ doɛ̃. 26Á yoo á Lawa a boo pɛ lɛsɔkɔn kion ka foo tãbaa nɛ. Prisili laanka Akilaasi bɛ́ ǹ nə́ n too kɔ a lon, ǹ nə́ kũ ǹ nə́ da kunun ǹ dinin ni, ǹ nə́ wusoo ǹ nə́ Lawa a zii lɛ nyaa-n doo ka a peperebaa nɛ.
27Apolɔɔsi bɛ́ mà a n woe Grɛki gána nɛ, dɔɔ̃nɔn lɛn ná a sii lɛ yɛ siĩni, ǹ nə́ sɛ́wɔ dia Lawa-nyankɔlen la walan, mà bɛ̀ á dɔ ǹ li mà ǹ kũ doɛ̃. A bɛ́ á dɔ, á dɔmalɛ gigiã wɔ Lawa-nyankɔlen lɛn manɛ walan, ka bǐɛ̃baa ǹ màn kɛ nɛ, Lawa kɔ la. 28A giala, a boo lɛ pàã boo Zuifun lɛn la zaman bii. Á bɔ Lawa a boo ne á nyaa, mà Lawa Minin Nyin-sili mɛn boo da, mà á re diɛ, mà Yezu ni.
Currently Selected:
Nya ǹ dín 18: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
