Siin Giala 18
18
Lawa boo mɛn da Saaraa a nɛ yɛ wɔ paǹ li
1Dɛnaa nə́ n din nyaa Abrahamu ni Manbre dan kɛn li, bɛ̀ a n giã-n tán a zìã kiɛnlɛ-a, wasa lɛ a kakaarɛ kɔ biikoo li. 2#EBR 13.2. Abrahamu nə́ n mìi saa lon, á giĩ min sɔɔ yɛ golee-n lon kunu a din ganaa. A bɛ́ á ǹ yɛ, á n toa a zìã kiɛnlɛ-a, á baa si á woo n da ǹ lɛ, á kaa tán ǹ giulun, 3á pɛ ǹ goon ne: «Dɛnaa, bɛ̀ masɛ sii á kɔɔ̃nɛ n ganaa, masɛ nə n nyankoe ka bɔ maa kion, ka tɔn kiɛ̃. 4Ka toa ǹ da mu boɛɛn kɔ ka la, ka n gòãn pii, ka n susu da kɛ giulun. 5Ma á die màn-bii boɛɛn koe ka la, ka da ka foo ganaa, ka tɔn wo sɔsɔɔ. A giala, kaa da bɔ ma li ke, ka n ka ma guguru kɔ.»
Ǹ dɔn ná a lɛ si kɛnɛn: «Wɔ lɛ kɔ. A n zɛnaa ka n bɛ́ ń pɛ lɔn.»
6Abrahamu nə́ n bɔyaa fufuu á woo zìã nɛ, á pɛ Saaraa nɛ: «Haya! N nanaa n wùsu nɔnɔɔ bɔ, wùsu mɛn bɛ́ boe la a wù nɛ diɛ sɔɔ bɔ, ń yia, ń màn-bii zɛnaa nɛ.»
7Bɛ kio, á baa si á woo a tɔɔn bii, á diin nɛ kasiɛ̃ wole goon kũ, á kɔ a dí-nyali goon la, bɛ nə́ n nanaa á kakã. 8Siĩ lɛ bɛ á ma, Abrahamu saa á woo koa tán ǹ giulun. Á woo ka bɔ̀nyaa guguru laanka bɔ̀nyaa fu dɔ nɛ. Á màn-bii kɔ ǹ la, á golee ǹ li da lɛ giulun, ǹ nə́ màn bii.
9Ǹ nə́ nɔ̀n da la: «N lɔ Saaraa lɛ n maa?»
Abrahamu nə́ ǹ lɛ si kɛnɛn: «A tá zìã-n kànaa.»
10Dɛnaa tɔ́n pɛ: «Masɛ doamaa nɛ man bɔyaa ma da lɛ̀-boe kɛnɛn yoroo doo. N lɔ Saaraa lɛ á die nɛgiĩ yii.»
A bɛ́ boo lɛ diɛ, bɛ̀ Saaraa á golee-n zìã kiɛnlɛ-a Abrahamu kio, n too koe. 11-12#PIƐ1 3.6. A bɛ́ á boo lɛ ma, á yaa wɔ a din gɔ́ɔ̃ nɛ. A giala Abrahamu laanka Saaraa zizi kɔ parsiini, lɔn lɛawaa din ba Saaraa kuĩ doo wa. Á tɔ́n pɛ kɛnɛn: «Masɛ din zinziin ke, giĩ sii n siɛ lɔn, a masɛ kũ doo? Masɛ a dɛnaa dɔ á ke á zizi kɔ ka wàa baa!»
13Dɛnaa tɔ́n pɛ Abrahamu ni: «Wàa na á baa Saaraa á yaa we? A n pii dɔn mà asɛ din zinziin kɛ á boe la, a nɛ yɛ doo sonbore? 14#LUK 1.37. Sii tan, bɛ n kaka á la yii ni, masɛ Dɛnaa Lawa n foɛ̃ bɛa zɛnaa li? Ma bɛ́ re n bɔyɛɛ, ma da n li ǹ mɛn waáraa lɛ̀ boe kɛnɛn yoroo, Saaraa á die nɛgiĩ yii.»
15Nyɛ́ɛ bɛ́ á Saaraa kũ, a ná a liere kɔ á pɛ mà asɛ yaa wɔ wa.
Dɛnaa tɔ́n pɛ: «Haayii, ń yaa wɔ dɛ!»
Abrahamu gòã kũ mɛn da Lawa ganaa Sodɔmu a lɛa
16Giĩn lɛn nə́ yoo walan, ǹ nə́ n yɔrɔ dia Sodɔmu kiwi la. Abrahamu dɔ́ soo kunun ǹ ni, mà asɛ n woe ǹ gòã boe zii, a tɔn nə n bɔyaa. 17Dɛnaa pɛ: «Ma bɛ́ re sii mɛn zɛnɛɛ, ma a re bɛ duri Abrahamu ganaa wa. 18Abrahamu tɔrɔn tá re mɔnɛɛ, ǹ gána gole baa, pàã nə́ ǹ lon, bɛa sàabiɛ wa. Kanaa a tɔrɔn tumaa wɔ á re bǐɛ̃ koe a wɔ gɔ́ɔ̃ nɛ. 19Man má Abrahamu bɔ, máa a maa dí pɛ a nɛnyaanan laanka a kion minin ni a kio, a pɛ a laa ǹ ganaa, mà ǹ kɔ Dɛnaa a zii lɛ ka peperebaa nɛ, ka sonborebaa nɛ. Bɛ̀ á n baa miɛ̃, Dɛnaa nə n lɛ kɔ Abrahamu la ka sii mɛn nɛ, á re bɛ zɛnɛɛ nɛ.»
20Dɛnaa tɔ́n pɛ Abrahamu ni: «Ǹ bɛ́ zɛ̀rɛ mɛn koɛ Sodɔmu minin laanka Gomɔɔrɔ minin ganaa, á gole parsiini, ǹ sii baraa dɔ mɔnaa. 21Bɛ lɛ nɛ, ma doamaa nɛ ma gisĩ, ǹ zɛ̀rɛbaa lɛ dɔ ma li ka yɔrɔ mɛn nɛ, ma ga a ganaa, bɛ̀ ǹ nə́ bɛa sii baraa kɛ lɛ tumaa zɛnaa sonbore, ma á re doɛ̃.»
22Tiin lɛn min paa yoo walan, ǹ nə́ n yɔrɔ dia Sodɔmu la. Bɛa biikoo li, bɛ̀ Abrahamu á tɔn golee-n Dɛnaa yɔrɔ-a. 23Abrahamu nə́ n zɔ̃ á dɔ á pɛ: «Dɛnaa, n din parsii-n, mà n nə ǹ die zɛ̀rɛbaãnaa bɔ̀n biɛ kun ka zɛ̀rɛdɛnaa-n sonbore? 24Kɔntan, min posooro á boe la a yɛ kiwi lɛ nɛ, zɛ̀rɛbaãnaan lɛa. N nə n die ǹ tiɛ̃ bɛ yii la, n kiwi lɛ yu? Min posooro kɛ lɛ a nɛ, n ba toɛ walan bɛn lɛn lɛa wa? 25Zɛ̀rɛbaãnaa laanka zɛ̀rɛdɛnaa nə n dɛ kun? Haayii dɛ! N din mɛn bɛ́ kiri kuri kanaa minbuiinin tumaa la, n ba re kuri ka peperebaa-n wa?»
26Dɛnaa tɔ́n pɛ: «Bɛ̀ má min posooro yɛ kiwi lɛ gɔ́ɔ̃ nɛ, zɛ̀rɛbaãnaan lɛa, ma á re bɛa bǎã lɛ tumaa toɛ walan bɛn lɛn lɛa.»
27Abrahamu wusoo á pɛ: «Masɛ mɛn bɛ́ tii kooro laanka ton lɛa, man die n yii we maa Dɛnaa la, ma boo da nɛ. 28Min mɛnɛn bɛ́ yii kiwi lɛ nɛ zɛ̀rɛbaãnaan lɛa, kɔntan sooro tá ǹ nyaabiɛ posooro ganaa. Ma n die kiwi lɛ din tumaa yui bɛa min sooro lɛ dinsɔɔ̃ a lɛa?»
Lawa pɛ: «Bɛ̀ má min pusiwensooro yɛ kiwi lɛ nɛ, zɛ̀rɛbaãnaan lɛa, maa kiwi lɛ yui wa.»
29Abrahamu wusoo á pɛ-n doo: «Kɔntan min pusi á boe la, a yɛ kiwi lɛ nɛ zɛ̀rɛbaãnaan lɛa.»
Dɛnaa pɛ: «Bɛ̀ pusi yɛ, bɛn lɛn taman yii, ma a re kiwi lɛ yui wa.»
30Abrahamu wusoo á pɛ: «Dɛnaa, n foo baran yoo ma li wa. Toa ma boo da doo. Kɔntan, pɔsɔɔ á yii kiwi lɛ nɛ.»
Dɛnaa pɛ doo: «Bɛ̀ ma bɛa min pɔsɔɔ lɛ yɛ a nɛ, ma á kiwi lɛ toɛ walan.»
31Abrahamu wusoo á pɛ bɛ kio: «Man die n yii we maa Dɛnaa la, ma boo da-n doo: Kɔntan, a fuə á boe la a yɛ a nɛ!»
Dɛnaa pɛ doo: «Bɛ̀ min fuə yɛ, ma á toɛ walan bɛn lɛn taman yii.»
32Bɛ tumaa kio, Abrahamu mà Dɛnaa ganaa: «N foo baran yoo ma li wa. Toa ma maa boo giala-nyɔmɔɔ da n nɛ. Kɔntan, a fù á boe la a yɛ a nɛ!»
Dɛnaa pɛ doo: «Bɛ̀ fù yɛ a nɛ, ma á kiwi lɛ toɛ walan.»
33Dɛnaa bɛ́ á boo da Abrahamu ni á nya, á woo, Abrahamu dɔ nə́ n bɔyaa á woo piɛ.
Currently Selected:
Siin Giala 18: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
